Read Makhuwa-Shirima Yohaane 2 Bible Online

Yohaane 2 - Makhuwa-Shirima bible

Yohaane 2

¹Vano, vanihukuni nanaararu waakhala okwatti oKana oGalileiya. Amayawe Yeesu yaari weiwe.

²Yeesu ni oohuseraawe yaalattuliwatho wookwattini ole.

³Yaamalaaya eviinyu, amayawe Yeesu yaamweerela: “Awo khaanono eviinyu ekina.”

⁴Yeesu aawaakhula: “Nri ni heeni Miyo ni nyuwo? Ehuhuwaaka kheenaaye ophiya.”

⁵Amayawe yaaweerela arumeiyi: “Mpake sootheene Owo aneeraawe oorumeeni.”

⁶Vano, vakhiviru vaavaale saakhala nyaapu mithannamosa sa maluku, moota yaavarelaaya muteko aYuda woorapihani, ettharaka ekhovelelowaaya. Mwaapu ti mwaapu waawera okhalano okhuma iliitru* miloko mithannamiili niithanu mpakatho sikina iliitru* ncira ni muloko niithanu.

⁷Yeesu aaweerela arumeiyi: “Musarihe munyaapuni maahi.” Yaasariha nyaapu mpaka mukalani.

⁸Vanotho aaweerela: “Mukuxe vakhaani ni muronghe wa mutokweene a efesta.” Yaapaka yeeyo

⁹ni mutokweene a efesta aalawiha maahi yaathatungwe eviinyu. Owo khaasuwenle yaaweelaaya eviinyu ele, yaari mweeraru arumeiyi yaakunxe esuwenleene. Vano aamwiitthana aatthomenre

¹⁰ni aamweerela: “Ootheene amvaha woopacera eviinyu yoosiva ni ewuraka oolattuliwa nnene, amvahiwa eviinyu yoohisiva. Vaheera nyuwo moothokorora eviinyu yoosivaxa mpaka vaanaano.”

¹¹Eneneero ele yootikhiniheya oKana oGalileiya yaari yoopacera Yeesu aapankaawe. Hiiho aathupulula ovuwawawe ni oohuseraawe yaamuroromela.

¹²Vahoolowaya aarowa oKafaranawu vamoha ni amayawe, axunneiye ni oohuseraawe. Weiwo yaakhala mahuku makina.

¹³Yaakhuveelaaya ehuhu ya mPaska* a aYuda, Yeesu aarowa oYerusaleemu.

¹⁴Mpaani mwa Muluku aawoona akina ethumihaka imombe, ikhondoolo ni ikhunda ni akina ekilaantheene vameesa eceendyaka musurukhu.

¹⁵Vano aapaka ekhwamba ya mikoyi ni aawoomola ootheene Mpaani mwa Muluku nitho ikhondoolo ni imombe. Aamwaraxa makhoobiri a anamaceendya ni aapittula meesaaya.

¹⁶Aaweerela yaathumiha ikhunda: “Muvenxe itthu iya va. Muhipake Empa ya Atithaka emerekadu!”

¹⁷Oohuseraawe yaahuupuwelela weera yaalempwa: “Okhalelawaka nthiti Empaanyu onnavarela ntoko mooro mmurimanimwaka.”

¹⁸Vano aYuda yaamukoha: “Eneneero heeni yootikhiniheya mungweraanyu onoonihera weera yaakhuleliwe yeeyo mumpakaanyu vaanaano vaava?”

¹⁹Yeesu aawaakhula: “Mukankhanyule Empa ya Muluku ela ni Miyo kinooteka wa mahuku mararu.”

²⁰aYuda yaamwaakhula: “Empa ya Muluku ela etekiwe wookwana iyaakha 46 ni Nyuwo munooteka wa mahuku mararu?”

²¹Empatho aahimmaawe yaari erutthwaawe.

²²Avenyererakaru mookhwaani, oohuseraawe yaahuupuwelela yeeyo aahimmaawe. Vano yaaroromela mwa Yoolempwa* ni mwa masu Yeesu aahimmaawe.

²³Areene Yeesu oYerusaleemu, ofestani ya mPaska*, atthu ancipale yaahoona ineneero sootikhiniheya Owo aapakaawe ni yaaroromela mwa Nsinanawe.

²⁴Yeesutho khaaroromela yaawo niwoko aahaasuwela atthu ootheene.

²⁵Khawaatthuneya weera akhaleliwe onamoona mwaha wa mutthu niwoko aasuwela nnenesene yeeyo yaari mmurimani mwa atthu.