Read Makhuwa-Shirima Yohaane 20 Bible Online

Yohaane 20 - Makhuwa-Shirima bible

Yohaane 20

¹Wa nihuku noopacera na esimana, oyaaka ni oxa, nlelo ereene epiphi, Mariya oMagadalene aaphiya onikhukuni ni aahoona weera nluku ntokotoko na vamulako naakakhiwa.

²Vano, aamutthimakela Simeyoni Pedru ni oohusera mukina, yoole Yeesu aamusivelaawe, anaweerela: “Ahaakhumiha Apwiya munikhukuni ni khanisuwenle awiikaathiyaayawo.”

³Pedru ni oohusera mukina yaavenya erowaka onikhukuni.

⁴Ooweeli yaatthimaka, mene oohusera mukina aatepa otthimaka ni aapacera ophiya onikhukuni.

⁵Owo aahuurama ni aawehexexa munikhukuni. Aahoona esaanda mwemmwe, mene khaavolongwe.

⁶Vattuliwawe Simeyoni Pedru aamutthara, anaphiya, anavolowa munikhukuni ni ahoona esaanda

⁷nitho ekuwo yaatthukiwaaya mmuru mwa Yeesu. Eyo yaari yoopindiwa mpattaaya emwalamwalihiweene esaanda.

⁸Vahoolowaya oohusera mukina aapacenre ophiya onikhukuni aavolowatho. Owo aahoona ni aaroromela.

⁹Awo nlelo khayiiwexexa weera, ntoko yeenraaya Yoolempwa*, waatthuneya Yeesu ovenyerera mookhwaani.

¹⁰Hiiho oohusera yaahokoleela owaani,

¹¹mene Mariya aahala vamulako wa nikhuku, iinlaka. Iinlaka hiihaale, aahuurama weera awehexexe mpuwa

¹²ni aawoona andyelo eeli ewanreene sootteela ni ekilaantheene vaavaawo waaraayawo muttembo wa Yeesu, mmoha waamuru ni mukina waametto.

¹³Awo yaamukoha: “Muthiyana, heeni muniinlaanyu?” Owo aawaakhula: “Ahaakuxa Apwiyaaka ni nkisuwenle awiikaathiyaayawo.”

¹⁴Wa yeeyo, aarukunuwa ni aamoona Yeesu vaavaale, mene khaamusuwenle.

¹⁵Yeesu aamweerela: “Muthiyana, heeni nyuwo muniinlaanyu?” Mummwaasa taani?” Uupuwelaka weera aari mwaneene a nttimbe, owo aamweerela: “Nyuwo mwaakuxaleene, mukileele nipuro mwiikaathiyaanyu ni miyo kinookuxa.”

¹⁶Yeesu aamweerela: “Mariya!” Vano, amurukunuwelaka, owo aakhuwela vaHeberi: “Rabuni!’” entaphulela: ‘Muhusiha.’

¹⁷Yeesu aamweerela: “Muhikivarele niwoko nlelo nkinaaye waahokoleela Atithaka. Murowe toko wa axunnaka ni mwaaleele weera Miyo kinghokoleela wa Atithaka ni Atithinyu ni wa Mulukwaaka ni Mulukwaanyu.”

¹⁸Mariya oMagadalene aarowa ni aahaalaleera oohusera: “Koowoona Apwiya!” Ni aahaathalihera yeeyo Owo aamuleenlaawe.

¹⁹Wiilaka nihuku nenne noopacera na esimana ni ethukumanneene oohusera mpaani ni milako soowaliweene niwoko na owoova aYuda, Yeesu aavolowa, aakhala eriyaraaya, anaweerela: “Murettele okhale ni nyuwo.”

²⁰Ahimaka yeeyo, aawoonihera matataawe ni nipararinawe. Oohusera yaahakalalaxa ewoonakaru Apwiya.

²¹Yeesu aaweerela veeli: “Murettele okhale ni nyuwo. Ntoko Atiithi akirumihale, hiihotho Miyo kinimoorumihani.”

²²Wa yeeyo, aawiiseelela yaawo, anaweerela: “Mwaakhele Munepa Wootteela.

²³Nyuwo mwalevelela soottheka sa mukina, anaaleveleliwe; mwaahilevelela soottheka sa mukina, khanleveleliwa sootthekasawe.”

²⁴Tomaxi, iitthaniwa maphapo, mmoha a muloko neeli, khaakhanle vamoha ni oohusera aaphiyalaawe Yeesu.

²⁵Oohusera akina yaamweerela: “Nowoona Apwiya!” Mene owo aaweerela: “Miyo kaahoona ineneero sa misomaari mmatatanimwaya, kaahivoleiha ekathaaka mwemmo saaraaya misomaari ni kaahivoleiha ntatanaka mpararinimwaya, nkinroromela.”

²⁶Yaaviralaaya esimana emoha, oohuseraawe yaaritho vaavaale ni Tomaxi vamoha ni yaawo. Saarookhalaru milako soowaliwasene, Yeesu aavolowa, aaheemela eriyaraaya, anaweerela: “Murettele okhale ni nyuwo.”

²⁷Vano aamweerela Tomaxi: “Muvoleihe ekathaanyu; moone matataaka. Mookole moonowaanyu ni muvoleihe ntata mpararinimwaka. Muhihovele — muroromele!”

²⁸Tomaxi aamweerela: “Apwiyaaka ni Mulukwaaka!”

²⁹Vano Yeesu aamweerela: “Munroromela niwoko mukoonnaanyu? Ooreelihiwa ti yaawo ahikoonne enaroromelatho.”

³⁰Yeesu aapaka variyari wa oohuseraawe ineneero sikina sootikhiniheya sincipale sihilempwe mulivuruni ela.

³¹Iyatho silempwe weera nyuwo muroromele weera Yeesu ti Kristu, Mwaana a Muluku ni muroromelaka mukhalane okumi mwa Nsinanawe.