Read Makhuwa-Shirima Yohaane 21 Bible Online

Yohaane 21 - Makhuwa-Shirima bible

Yohaane 21

¹Vahoolowaya Yeesu aahiixooniheratho wa oohuseraawe mukerekhere wa ephareiya ya oTiberiyade.

²Yaakhumelenle ha: Aari weiwe Simeyoni Pedru, Tomaxi (iitthaniwa maphapo), Nathaneyeli a oKaana oGalileiya, anamwane a Zebedeyo ni oohusera eeli akina.

³Simeyoni Pedru aaweerela: “Kinkela okoka.” Awo yaaheera: “Hiyo ninrowa ni weyo.” Vano yaavenya, enavolowa munikulani, mene ohiyuweene yoole, khayaaphwannye etthu.

⁴Oxaaka, Yeesu aari mukerekhere wa ephareiya, oohuseratho khayaamusuwenle.

⁵Owo aahaakoha: “Anamwane, nyuwo mookhalano etthu ya oca?” Awo yaamwaakhula: “Hoye”

⁶Owo aaweerela: “Muvonyere ntthavi moonowaanyu mulopwana ni mmwiphwanye.” Yaapaka hiiho, ni khayaawenre opurula ntthavi niwoko na ihopa soowaatta.

⁷Oohusera aamusivelaawe Yeesu aamweerela Pedru: “Ti Apwiya!” Simeyoni Pedru, amwiiwaka ahimaka yeeyo, aawara mukaandyowawe, niwoko aaroorula, anakhumbwela mphareiyani.

⁸Oohusera akina yaatthara ni nikula epurulaka ntthavi noosareya ni ihopa niwoko yaari vakhiviru wa mukerekhere, wookwanaka imeetru* miloko mithanniixexe.

⁹Ekhuruwaka yaahoona mooro ni makhala ooviha ni ihopa vayikho vaavaale nitho ipaawu sikina.

¹⁰Yeesu aaweerela: “Mukiruuheleke ihopa sikina mphwannyaanyu vaanaano va.”

¹¹Simeyoni Pedru aavolowa munikulani, anapurulela ntthavi mukerekhere wa ephareiya. Nne naasareya ni ihopa sitokweene 153. Saarookhalaru ihopa sincipale ntthavi khanaahungwe.

¹²Yeesu aaweerela: “Ngweeke, muceeke.” Khaawo oohusera mmoha uumihale murima weera amukohe: ‘Nyuwo taani?’ Awo yaasuwela weera ti Apwiya.

¹³Yeesu aawaattamela, anakuxa ipaawu, anaavaha, apakaka hiihotho ni ihopa.

¹⁴Eyo yaari emaara yanaararu Yeesu iixoonihenraawe wa oohuseraawe vahoolo wa ovenyerera mookhwaani.

¹⁵Emalihaka oca, Yeesu aamukoha Pedru: “Simeyoni, mwaana a Yohaane, munookisivela waapwaha ala?” Owo aamweerela: “Aani Apwiya, moosuwela weera kinnoosivelani.” Yeesu aamweerela: “Muciheke iputtiputthisaka.

¹⁶Yeesu aamukoha veeli: “Simeyoni, mwaana a Yohaane, munookisivela?” Owo aamwaakhula: “Aani Apwiya, moosuwela weera kinnoosivelani.” Yeesu aamweerela: “Mukukhule ikhondoolosaka.”

¹⁷Emaara yanaararu Yeesu aamukoha: “Simeyoni, mwaana a Yohaane, munookisivela?” Pedru aathanana niwoko na omukoha Yeesu emaara yanaararu:‘nyuwo munookisivela?’ ni aamwaakhula: “Apwiya, moosuwela itthu sootheene ni moosuwela weera kinnoosivelani.” Yeesu aamweerela: “Muciheke ikhondoolosaka.

¹⁸Kinooleelani ekhaikhai: Mwaaraanyu mmiravo, mwaangwarela ni mwaanrowa weiwo mwaatthunaanyu, mene muuluvalaka, mmweemexe matataanyu ni mutthu mukina anoowariheni ni anookuxeeni ooronghakani weiwo muhinghaawelaanyu.”

¹⁹Yeesu aahima yeeyo weera amoonihere ni moota heeni wa okhwa Pedru eeraawe amvuwihe Muluku. Vano aamweerela: “Mukitthare!”

²⁰Pedru aarukunuwa ni aamoona weera oohusera Yeesu aamusivelaawe eera aattharaka. Owo aari yoole aamuuramenle Yeesu wa ehuhu yaacaaya efesta ya mPaska* amukohaka: ‘Apwiya taani aneera oovariheni.’

²¹Amoonaka yoowo, Pedru aamukoha Yeesu: “Apwiya ankha ola?”

²²Yeesu aamwaakhula: “Miyo kaatthuna weera owo akhale ni okumi mpaka kineeraaka kihokolowe, eheeni mumpwatthaanyu? Mukitthareke nyuwo.”

²³Tivawo yiiwanyeyaaya masu weera oohusera owo kharwa akhwa. Yeesutho kheenre weera owo kharwa akhwa. Eenre paahi: “Miyo kaatthuna weera owo akhale ni okumi mpaka kineeraaka kihokolowe, eheeni mumpwatthaanyu?”

²⁴Owo oohusera onkhalela onamoona itthu iya ni olempe seiya. Noosuwela weera onamoonaawe ti wa ekhaikhai.

²⁵Ohiya toko yeeyo, Yeesu aapaka itthu sikina sincipale. Sootheene sa seiyo saalempwale, kinuupuwela weera hata mweelaponi ya vathi yootheene saano ehikhanle mapuro oowaatta wa ilivuru seera silempwe.