Read Makhuwa-Shirima Yohaane 3 Bible Online

Yohaane 3 - Makhuwa-Shirima bible

Yohaane 3

¹Aakhala muFarisi* mmoha iitthaniwa Nikodemu, mutokweene mmoha a aYuda.

²Owo aahoowa wa Yeesu ohiyu eeraka: “Muhusiha, noosuwela weera Nyuwo Muhusiha ongwa wa Muluku, niwoko khaawo ongwera opaka ineneero sootikhiniheya Nyuwo mumpakaanyu, Muluku ahikhanle ni yoowo.”

³Yeesu aamwaakhula: “Kinooleelani ekhakhai: khaawo ongwera woona omwene wa Muluku owo ahiyariwetho wa osulu.”

⁴Nikodemu aamukoha: “Ongwereya hai mukina oyariwa areene namuuluvala? Vekhaikhai khangwera ovolowatho mmirimani mwa amayawe ni ayariwetho!”

⁵Yeesu aamwaakhula: “Kinooleelani ekhaikhai: khaawo ongwera ovolowa moomweneni wa Muluku owo ahiyariwe wa maahi ni wa Munepa.

⁶Yaawo angyariwa wa erutthu ti a mweerutthuni, ni yaawo angyariwa wa Munepa ti a mmunepani.

⁷Muhitikhine niwoko kooleenlaakani ontthuneya weera muyariwe veeli.

⁸Epheyo enoopela weiwo entthunaayawo. Nyuwo munimwiiwa, mene khamungwera ohima enkhumaaya, naari enkelaaya. Hiihotho enkhumelela ni ootheene ooyariwa wa Munepa.”

⁹Nikodemu aamukoha: “Ongwereya hai hiiho?”

¹⁰Yeesu aamweerela: “Nyuwo muhusiha a oYixrayeli ni khamuniiwexexa itthu iya?

¹¹Kinoororomelihani weera hiyo ninuuluma sa yeeyo ninsuwelaahu ni ninkhalela onamoona sa yeeyo nnoonaahu, hata hiihotho, mulokwaanyu khoonaakhulela onamoonaahu.

¹²Miyo kohooleelani itthu sa vathi ni khamuroromenle. Mmwiroromele hai Miyo kooleelani itthu sa wiirimu?

¹³Khaawo owenle wiirimu, ahikhanle Yoole owiiye wiirimu, eyo tiiyo Mwaana a mutthu.

¹⁴Mooteene yoowo Moisesi eemenxaawe enowa munikareni, hiihotho ontthuneya weera Mwaana a mutthu akhale oowelihiwa

¹⁵weera ootheene animuroromela Yoowo, ekhalane okumi woohimala.

¹⁶Vano Muluku aasivela elapo ya vathi moota wooweera aamvahalaawe Mwanawe mmoharu weera atthu ootheene animuroromela Yoowo kheeriheya, mene anookhalano okumi woohimala.

¹⁷Muluku khaamurumihenle Mwanawe mweelaponi ya vathi weera athorihe, mene weera elapo evuluxiwe ni Yoowo.

¹⁸Yoowo onimuroromela khanthorihiwa, mene yoowo ohinimuroromela, oothorihiwa niwoko na ohiroromela mwa Nsina na Mwaana mmoharu a Muluku.

¹⁹Nthorihelo ti nna: waara wohoowa vathi, mene atthu yaasivela epiphi ohiya waara niwoko mitekosaya saari soonanara.

²⁰Yoowo ompaka soonanara, onthanya waara. Owo khanaattamela waara oovaka weera mitekosawe nsisuweliwe.

²¹Vano yoowo ompaka ekhakhai, onimwaattamela waara weera mitekosawe sooneiye mwaatthuni ntoko soopakiwa ni Muluku.”

²²Vahoolowaya, Yeesu aarowa ni oohuseraawe wa elapo ya oYudeiya ni weiwo aakhala ehuhu vakhaani vamoha ni yaawo nitho aapatisa.

²³Yohaanetho eera apatisaka wAinooni, vakhiviru wa oSalimi niwoko weiwo yaahaatta maahi ni muloko wa atthu wannarowa weera opatisiwe.

²⁴Eyo yaakhumelenle ahinaaye Yohaane otthukiwa.

²⁵Waahaakhulaniwa akina oohusera a Yohaane ni muYuda mukina mwaha wa ekhovelelo ya orapiha.

²⁶Awo yaarowa wa Yohaane ni yaamweerela: “Muhusiha, Mulopwana Owo aari ni nyuwo okhopela wa Yordanu, mwa Yoole mwaamukhalenlaanyu onamoona, ompatisa ni ootheene anrowa wa Yoowo.”

²⁷Yohaane aawaakhula: “Mutthu ongwera waakhela paahi yeeyo omvahiwaawe wiirimu.

²⁸Nyuwo asineenaanyu muri anamoona a yeeyo kaahimmaaka: ‘Miyo nkihiyono Kristu, mene aani kiri yoole orumihiwe vahoolowawe.’

²⁹Namatthomeriwa ori a namatthomera. Nthamwene onimurumeela namatthomera oningweherera ni onimwiiwelela ni iiwaka nsu na namatthomera onoohakalalaxa. Wu ti ohakalalawaka ni vano wookwaniheriwa.

³⁰Ontthuneya weera Owo akhale oottittimiheyaxa ni miyo ooyevaxa.

³¹Yoole onrweela osulu ori Mutokweene a ootheene. Yoole onrweela wa vathi ori a vathi ni onuuluma ntoko mutthu a vathi. Yoole onrweela wiirimu ori Mutokweene a ootheene.

³²Owo onkhalela onamoona yeeyo oonnaawe ni iiwalaawe, mene khaawo anaakhulela onamoonaawe.

³³Yoole onaakhulela, onaakhuleliha weera Muluku ti a ekhaikhai.

³⁴Vano, Yoole Muluku omurummaawe, onuuluma masu a Muluku niwoko Owo onnavaha Munepa moota woohikhalano mwiinaano.

³⁵Atiithi animusivela Mwaana ni aamwinnyerera sootheene mmatatanimwawe.

³⁶Yoowo onimuroromela Mwaana, ookhalano okumi woohimala. Vaheera yoowo onimukhootta Mwaana, kharwa oona okumi, mene isara sa Muluku sinkhala ni yoowo.”