Read Makhuwa-Shirima Yohaane 5 Bible Online

Yohaane 5 - Makhuwa-Shirima bible

Yohaane 5

¹Eviraka ehuhu ekina, Yeesu aarowa oYerusaleemu ofestani emoha ya aYuda.

²Vano naakhala oYerusaleemu, vakhiviru wa mulako wa ikhondoolo, ntthiya nniitthaniwa vaHeberi ‘Betzatha’ naarino milako mithanu.

³Weiwo yaakhovelela okhalawo atthu ancipale oovoreiwa ni oorakala: oohoona, ootuthunya ni ooheetta.

⁴

⁵Mmoha a yaale yaari weiwe aakhalawo aheettaka wa iyaakha miloko miraru niithannatthaaru.

⁶Amoonaka iixaatalenleene ni asuwelaka weera owo aakhala ooheetta wa ehuhu eromoliwe, Yeesu aamukoha: “Nyuwo muntthuna olamihiwa?”

⁷Mutthu ooheetta aamweerela: “Apwiya, nkinono mutthu ookikhavihera ovolowa vatthiyani maahi etekumaka. Miyo keereraka ovolowa, mukina omvolova miyo kihinaaye.”

⁸Yeesu aamweerela: “Muvenye, mukuxe nrepananyu ni mweette!”

⁹Woowaakuveya mulopwana aalama, aakuxa nrepanawe ni aapacera weetta. Nihuku yeereiyaaya yeeyo naari eSaabadu,

¹⁰tivawo aYuda yaamweerenlaaya mulopwana aalamihiwe: “Olelo eSaabadu! Khoontthuniheriwa okuxa nrepa.”

¹¹Mene owo aawaakhula: “Mulopwana ookilamihale ookeerela: ‘Mukuxe nrepananyu ni mweette.’”

¹²Vano yaamukoha: “Mulopwana heeni ooweerenle weera okuxe nrepa ni weette?”

¹³Mulopwana aalamihiwe khaamusuwenle niwoko Yeesu aalakaseya eriyari ya atthu ancipale.

¹⁴Vahoolo vakhaani Yeesu aamuphwanya Mpaani mwa Muluku ni aamweerela: “Moone, nyuwo moolama. Muhihokoleele ottheka weera etthu yootepa ehookhumeleleni.”

¹⁵Mulopwana aarowa ni aahaathalihera aYuda weera ti Yeesu omulamihale.

¹⁶Vano aYuda yaapacera omuttharatthara Yeesu niwoko Owo aapaka etthu ele eSaabadu.

¹⁷Yeesu aaweerela: “Atithaka annavara muteko mpaka olelo ni Miyotho kinnavara muteko.”

¹⁸Niwoko nenenenno, aYuda yannatepa otthuna omwiiva, khoohiyono niwoko na ohiiwelela nlamulo na eSaabadu paahi, mene aaheeratho weera Muluku ti Atithawe muneenaawe navetho iilikanxaka ni Muluku.

¹⁹Yeesu aaweerela: “Miyo kinooleelani vekhaikai weera Mwaana khangwera opaka etthu muneenaawe. Paahi ongwera opaka yeeyo owoonenlaawe Atithawe epakaka niwoko yeeyo Atiithi ampakaaya, Mwaana onoopakatho.

²⁰Atiithi animusivela Mwaana ni animoonihera sootheene ampakaaya. Aani, Awo eniimoonihere miteko soopwaha iya weera mutikhine.

²¹Vano, mooteene yoowo Atiithi anaavenyererihaaya akhwiiye ni anaavahaaya okumi, hiihotho Mwaana onaavaha okumi yaale Owo onaatthunaawe.

²²Atiithi khaawo animuthorihaaya, mene aamwinnyerera Mwaana nthorihelo nootheene

²³weera ootheene emuttittimihe Mwaana ntoko anaattittimihaaya Atiithi. Yoole ohinimuttittimiha Mwaana, khanaattittimihatho Atiithi yaamurumihale.

²⁴Miyo kinoororomelihani: Yoowo oniiwa maswaaka ni anaaroromela Yaawo aakirumihale, ookhalano okumi woohimala ni kharwa athorihiwa, mene oolapuwa mookhwaani aphiyaka mpaka mookumini.

²⁵Miyo kinoororomelihani vekhaikhai weera enoophiya ehuhu, aani, yoophiya, akhwiiye eneeraaya yiiwe nsu na Mwaana a Muluku ni yaale aniiwa nsu, eniikhale ni okumi.

²⁶Vano, mooteene yoowo Atiithi ankhalanaaya okumi mwa aneenaaya, hiihotho aamvaha Mwaana weera akhalenotho okumi mwa muneenaawe.

²⁷Aamvahatho ikuru weera athorihe niwoko ori Mwaana a mutthu.

²⁸Muhitikhine yeeyo, niwoko enoophiya ehuhu ootheene ari mmahiyeni eneeraaya yiiwe nsunawe ni eniivenye.

²⁹Yaale yaapanke yooreera eniivenyerere wa okumi, ni yaale yaapanke yoonanara weera ethorihiwe.

³⁰Miyo nkingwera opaka naari etthu muneenaakaru. Kinthoriha paahi ntoko kiniiwaaka ni nthorihelonaka ti na ekhaikhai niwoko nkinaasaasa wiisiveliha, mene waasiveliha Yaale yaakirumihale.

³¹Kiikhalelaka onamoona Miyo muneenaaka, onamoonaaka khoohiyono wa ekhaikhai.

³²Aakhala Akina ankikhalela onamoona ni koosuwela weera onamoonaaya mwaha wa Miyo ti wa ekhaikhai.

³³Nyuwo mwaamurumihela atthu Yohaane ni owo aakhalela onamoona mwaha wa ekhaikhai.

³⁴Nkinaakhulela onamoona wa atthu, mene kinghima yeeyo weera nyuwo muvuluxiwe.

³⁵Yohaane aari onyaari waavarela ni waamwaleela waara, ni mweehuhuni ekina nyuwo mwaatthuna ohakalala niwoko na waarawawe.

³⁶Miyo kookhalano onamoona woompwaha Yohaane. Mutekweene yoowo Atiithi akivanghaaya weera kikwanihere ni Miyo kineera kikwaniheraka, onkhalela onamoona weera Atiithi akirumihale.

³⁷Atiithi akirumihale, Awo aneenaaya yaakikhalela onamoona. Nyuwo khamunatoko wiiwa nsunaya, hata woona ekhalelowaaya.

³⁸Mpaka nsunaya khaninkhala mwa nyuwo niwoko khamunimuroromela Yoowo Atiithi amurumihalaaya.

³⁹Nyuwo munsoma Yoolempwa* nnenesene niwoko munuupuwela weera mmwiphwanyemo okumi woohimala. Ti Yoolempwa* enkikhalela onamoona.

⁴⁰Wa soothesene, nyuwo khamuntthuna orwa wa Miyo weera mphwanye okumi woohimala.

⁴¹Miyo nkinaakhulela ovuwa wa atthu,

⁴²mene kohoosuwelani nyuwo. Koosuwela weera nyuwo khamunono osivela wa Muluku.

⁴³Miyo kirwiiye mwa Nsina na Atithaka ni nyuwo khamukaakhulenle, mukinatho awa mwa nsinanaweru, nyuwo mmwimwaakhulele.

⁴⁴Mmwiroromele hai mwaakhulelanaka mukina ni mukhwaawe ovuwa, mene khamunaasaasa ovuwa ongwa wa Muluku mmoharu.

⁴⁵Muhuupuwele weera Miyo nkiwoothereni ohoolo wa Atiithi. Ti Moisesi munimuroromelaanyu ori namootheraanyu.

⁴⁶Nyuwo mwaamuroromela Moisesi, saano mukiroromenleenetho Miyo niwoko owo aalepa mwaha wa Miyo.

⁴⁷Woonaka weera khamunroromela yeeyo aalempaawe, mmwiroromele hai yeeyo kinghimaaka?”