Read Makhuwa-Shirima Yohaane 6 Bible Online

Yohaane 6 - Makhuwa-Shirima bible

Yohaane 6

¹Eviraka ehuhu ekina Yeesu aarowa okhopela okina wa ephareiya ya oGalileiya (eyo tiiyo ephareiya ya oTiberiyade).

²Atthu ancipalexa yaamutthara niwoko yaahoona ineneero sootikhiniheya Owo aapakenlaawe aretta.

³Vano Yeesu aawela vamwaakoni ni aakilaathi ni oohuseraawe.

⁵Awelihaka maitho ni awoonaka atthu ancipalexa ekhuveelaka, Yeesu aamukoha Filipe: “Nnithumele woowi ipaawu muloko ola?”

⁶Aakoha yeeyo paahi weera amuyese, niwoko aasuwela nnene yeeyo eeraawe apake.

⁷Filipe aamwaakhula: “Idinaariyu* macira meeli khasinaathumela ipaawu soowaatta weera khula mutthu aakhele yoomeyanyiwa!”

⁸Andreiya, oohusera mmoha mukina, munneiye Simeyoni Pedru, aamweerela Yeesu:

⁹“Ookhala va mmiravo orino ipaawu ithanu sa esevada* ni ihopa piili sikhaanene, mene eheeni iya wa atthu ancipale ala?”

¹⁰Yeesu aaweerela: “Mweerele muloko wa atthu okilaathi.” Waakhala munyepu mwincipale nipuro nenne ni ootheene yaakilaathi. Asilopwanaru yaari wookwanaka macira miloko mithanu.

¹¹Yeesu aakuxa ipaawu, anatthapela, anaakawela yaawo yaakilaanthe mpaka yaatthunaaya. Aaheerihatho hiiho ihopa.

¹²Ootheene evonaka, Yeesu aaweerela oohuseraawe: “Muthukumanye mivithe weera sihiriheye.”

¹³Vanonto, yaathukumanya ni yaasariha mipapara muloko ni miili sa mivithe sa ipaawu sa esevada* saahiiwe ni yaale yaaciiye.

¹⁴Woonaka eneneero yootikhiniheya Yeesu aapankaawe, muloko wa atthu waapacera weera: “Vekhaikhai, Ola ti Mprofeeti eera awe mweelaponi ya vathi.”

¹⁵Yeesu asuwelaka weera awo yaatthuna omunyesereriha omvara omwene, aavenyatho arowaka omwaako meekhaawe.

¹⁶Wiilaka, oohuseraawe yaarowa ophareiya

¹⁷weiwo yaavolongwaaya munikulani ni yaalapuwela oKafarnawu. Waahiila ni Yeesu eera ahinaaye orowa mpaka weiwo yaaraayawo.

¹⁸Yaanoopa epheyo etokotoko ni ephareiya yaakhala ni mitekuteku.

¹⁹Yeettihalaaya nikula ikilomeetru* ithanu, hoye hoye ithannamosa, yaamoona Yeesu akhuveelaka nikula eettaka vasulu vaphareiyani ni yaahoova vancipale.

²⁰Vano Owo aaweerela: “Ti Yoomi, muhoove!”

²¹Vano yaatthuna omwaakhelela munikulani ni woowaakuveya yaaphiya okhopela weiwo yaarowaaya.

²²Oxaawaya, atthu ancipale yaari okhopela okina yaahoona weera naakhalawo nikula nimoha paahi nitho weera Yeesu khaavolongwe mwemmo vamoha ni oohuseraawe, mene weera awo yaarongwe yaaworu.

²³Vano, makula makina ekhumaka oTiberiyade yaakhuveela nipuro weiwo atthu ancipale yaaciiyaaya ipaawu Apwiya emalingheene omtthapela Muluku.

²⁴Esuwelaka atthu ancipale weera, hata Yeesu, naari oohuseraawe, khayaakhanle weiwo, yaavolowa mmakulani enarowa oKafaranawu emwaasaka Yeesu.

²⁵Emphwanyaka Yeesu okhopela, yaamukoha: “Muhusiha, muphiyale yaakhani nno?”

²⁶Yeesu aawaakhula: “Vekhaikhai, nyuwo munkaasaasa khoohiyono niwoko moonnaanyu ineneero sootikhiniheya, mene niwoko mwaahooca ipaawu ni mwaavona.

²⁷Muhivarele muteko yooca emmala, mene yooca enkhala mpaka mookumini woohimala, mwa yeeyo Mwaana a mutthu anoovaheeni. Muluku Atiithi aamvaha Yoowo eneneero ya waakhuleleya.”

²⁸Vano yaamukoha: “Ontthuneya opaka eheeni weera nivare miteko seiyo Muluku ontthunaawe?”

²⁹Yeesu aawaakhula: “Muteko wa Muluku ti ola: omuroromela Yoole Muluku omurumihalaawe.”

³⁰Vanonto yaamukoha: “Eneneero heeni yootikhiniheya muneeraanyu moonihere weera noone ni noororomeleni? Mmwipake eheeni?

³¹Makholowaahu yaahooca emana* munikareni, ntoko elempwalaaya: ‘Owo aahaavaha oca sooca sa wiirimu.’”

³²Yeesu aaweerela: “Miyo kinooleelani ekhaikhai: Khaahiyono Moisesi oovangheni sooca sa wiirimu, mene ti Atithaka anoovahani sooca sa ekhaikhai sa wiirimu.

³³Vano, Yooca ya Muluku ti Yoowo okhurungwe wiirimu ni omvaha okumi wa elapo ya vathi.”

³⁴Awo yaaweerela: “Apwiya, munivahe yooceene yeeyo mahuku ootheene.”

³⁵Vano Yeesu aahima: “Miyo ti Yooca ya okumi. Yoole ongwa wa Miyo khawa avoliwa etala ni yoole onkiroromela Miyo khawa avoliwa ntthona.”

³⁶Ntokotho kooleenlaakani: nyuwo mookoona nlelotho khamunroromela.”

³⁷Ootheene Atiithi ankivahaaya, eniiwe wa Miyo. Ni yoole anaawe wa Miyo, nkiwa kimoomola.

³⁸Vano, kookhuruwa wiirimu khoohiyono opaka otthunawaka, mene otthuna wa Yaawo akiruminghe.

³⁹Ni wu ti otthuna wa Yaale akirumihale: weera Miyo nkiwa kimuyeleela hata mmoha a yaawo Atiithi yaakivanghaaya, mene weera kaavenyererihe nihuku noomaliha.

⁴⁰Otthuna wa Atithaka ti weera ootheene aningweha Mwaana a mutthu ni animuroromela Yoowo, ekhalane okumi woohimala. Ni Miyo nkimvenyererihe nihuku noomaliha.”

⁴¹Wa yeeyo aYuda yaapacera omuttaandawula Yeesu niwoko Owo aaheera: “Miyo ti Yooca ekhurungwe wiirimu.”

⁴²Vano yaaheera: “Ola khahiyono Yeesu mwaana a Yoseefe, mwa Yoowo atithawe ni amayawe hiyo naasuwenlaahu? Ongwereya hai weera: ‘Kikhurungwe wiirimu’?”

⁴³Yeesu aawaakhula: “Mmaale ni ottaandawulawanyu.

⁴⁴Khaawo ongwera owa wa Miyo, ehikhanle Atiithi akirumihale ampurunle mmunepani, ni Miyo nkimvenyererihe nihuku noomaliha.

⁴⁵Elempwale mmaprofeetini: Ootheene eniixuttihiwe ni Muluku.” Ootheene angwiiwa Atiithi ni anxuttihiwa ni Yaawo angwa wa Miyo.

⁴⁶Khaawo owoonne Atiithi, ahikhanle Yoole ongwa wa Muluku. Yoole paahi aawoona Atiithi.

⁴⁷Kinoororomelihani weera yoole onroromela, ookhalano okumi woohimala.

⁴⁸Miyo ti Yooca ya okumi.

⁴⁹Makholowaanyu yaahooca emana* munikareni ni ahookhwa.

⁵⁰Wa sootheene, va eri Yooca enkhuruwa wiirimu weera ahikhwe yoowo aneera ace.

⁵¹Miyo ti Yooca ya okumi yaakhurungwe wiirimu. Mukina aneera ace Yooca ela, anaakhale ni okumi mahuku ootheene. Yooca ela ti erutthwaaka kineeraaka kivahe weera elapo ya vathi ekhale ni okumi.”

⁵²Vano aYuda yaapacera waakhulanaxa yaaworu: “Ongwereya hai Mulopwana Ola onivaha erutthwaawe weera nikhuure?”

⁵³Yeesu aaweerela: “Miyo kinooleelani ekhaikhai: Nyuwo mwaahikhuura erutthu ya Mwaana a mutthu, naari mwaahiwura ephomaawe, khamunkhalano okumi mwa nyuwo asineenaanyu.

⁵⁴Ootheene ankhuura erutthwaaka ni angwura ephomaaka, akhalano okumi woohimala ni nkaavenyererihe nihuku noomaliha.

⁵⁵Vano, erutthwaaka ti yooca ya ekhaikhai ni ephomaaka ti yoowura ya ekhaikhai.

⁵⁶Ootheene ankhuura erutthwaaka ni angwura ephomaaka, ankhala mwa Miyo ni Miyotho mwa yaawo.

⁵⁷Mooteene yoowo Atiithi ankhalaaya ni okumi akirumihalaaya ni Miyo kinkhala niwoko na Atiithi, hiihotho yoole onca erutthwaaka anaakhale niwoko na Miyo.

⁵⁸Ela ti Yooca yaakhuruwale wiirimu. Makholowaanyu yaahooca emana* ni yaahookhwa, yooletho onca Yooca ela, anaakhale ni okumi mahuku ootheene.”

⁵⁹Aahima yeeyo axuttihaka muSinagogani* oKafaranawu.

⁶⁰Yiiwalaaya yeeyo, ancipale a oohuseraawe yaaheera: “Masu ala ti oorika. Taani ongwera wiiwa yaawo?”

⁶¹Asuwelaka nnene weera oohuseraawe yeera ettaandawulaka mwaha wa yeeyo, Yeesu aaweerela: “Maswaaka animookwattulani?

⁶²Eniyeereiye eheeni nyuwo mwamoona Mwaana a mutthu awelaka arowaka weiwo aaraawe khalayi?

⁶³Munepa omvaha okumi; erutthu khemphwanela etthu. Masu kooleenlaakani ti munepa ni okumi.

⁶⁴Wa soothesene, aakhala akina a nyuwo ahinroromela.” Vano, Yeesu aasuwela okhuma ompacereroni taani a yaawo yaahaaroromela nitho taani eera amvarihe.

⁶⁵Owo aapwaherera eeraka: “Tivawo Miyo kooleenlaakani weera khaawo ongwera owa wa Miyo, ohikhanle weera eyo ovahiwe ni Atiithi.”

⁶⁶Okhuma ehuhuweene yeele mpaka ohoolo, ancipale a oohuseraawe yaahokolowa ni yaahiya omutthara.

⁶⁷Yeesu aahaakoha oohuseraawe muloko neeli: “Nyuwotho khamuntthuna orowa?”

⁶⁸Simeyoni Pedru aamwaakhula: “Apwiya, wa taani nneeraahu nirowe? Nyuwo murino masu a okumi woohimala.

⁶⁹Hiyo ninroromela ni noosuwela weera Nyuwo muri Ootteela a Muluku.”

⁷⁰Vano Yeesu aawaakhula: “Nkihiyono Miyo koothanlaleni nyuwo muloko neeli? Mmohatho a nyuwo ti a Diyabu*.”

⁷¹Owo aamuhima Yudasi, mwaana a Simeyoni Iskariyote, mwa yoowo aari mweeraru areene mmoha a oohusera muloko neeli, vahoolowaya eera amvarihe Yeesu.