Read Makhuwa-Shirima Yohaane 7 Bible Online

Yohaane 7 - Makhuwa-Shirima bible

Yohaane 7

¹Vahoolowaya, Yeesu anneetteetta oGalileiya akhalaka mwayiini ottaiwene wa oYudeiya niwoko iwe aYuda yaasaasa omwiiva.

²Vano, yaattamelaka efesta ya aYuda, yeele ya mmikotthani,

³axunneiye Yeesu yaamweerela: “Ontthuneya weera Nyuwo muvenye va ni murowe oYudeiya weera oohuseraanyu yoone miteko mumpakaanyu.

⁴Khaawo ontthuna osuweliwa mwaatthuni oneetta muxiirini. Mweenre Nyuwo mpakaka itthu seiya, mwiixoonihere mweelaponi.”

⁵Vano, hata axunneiye khayaamuroromenle Yoowo.

⁶Yeesu aaweerela: “Wa Miyo kheenaaye ophiya ehuhu yootthuneya, mene wa nyuwo yakhalaru ehuhu ti yootthuneya.

⁷Amalapo khaangwera woothanyani, mene anookithanya Miyo, niwoko kinookhalela onamoona weera yeeyo ampakaaya ti yoonanara.

⁸Murowe ofestani. Miyo va nlelo nkinrowa ofestani eyo, niwoko wa Miyo kheenaaye ophiya ehuhu yootthuneya.”

⁹Amalihaka ohima yeeyo, aakhala oGalileiya.

¹⁰Wa soothesene, yaarowaaya axunneiye ofestani, Owo aarowatho ahiixooniheraka, mene muxiirini.

¹¹Ofestani, aYuda yannangweherera ni yannakoha: “Ori woowi Mulopwana Owo?”

¹²Waakhala waapa vancipale mwaha wa Yoowo variyari wa atthu ancipale. Akina yeera: “Ti Mulopwana ooreera.” Akina yaakhula: “Hoye, Owo onlokottha muloko wa atthu.”

¹³Khaawotho yuuluma mwaatthuni sa Yoowo niwoko na owoova aYuda.

¹⁴Vano, yaaphiyalaaya efesta eriyaraaya, Yeesu aarowa Mpaani mwa Muluku ni aapacera oxuttiha.

¹⁵aYuda yaatikhina ni yaakohana: “Owenre hai Mulopwana Ola okhalano nihusiho mooteene yoola ahinatoko oxuttera?”

¹⁶Yeesu aawaakhula: “Nihusihonaka khanihiyono nawaka muneenaaka. Ningwa wa Yaale akirumihale.

¹⁷Akhala mukina onlakela opaka otthuna wa Muluku, owo anoonelele nihusihonaka nawa wa Muluku, hoye hoye kinuuluma ni mirukusaka muneenaaka.

¹⁸Yoole onuuluma sawawe, onnaasa ovuwawawe muneenaawe. Yooletho onaasa ovuwa wa Yaawo yaamurumihale, Owo ti a ekhaikhai. Kheewowo etthu yoowootha mwa Yoowo.

¹⁹Moisesi khoovangheni nlamulo? Wa sootheene, khaawo a nyuwo oniiwelela. Heeni nyuwo munaasaanyu okiiva?”

²⁰Atthu ancipale yaamwaakhula: “Nyuwo murino munepa woonanara! Taani onaasaasa owiivani?”

²¹Yeesu aaweerela: “Kaapaka yootikhiniha emoha ni nyuwo ootheene mwaatikhina.

²²Wa soothesene, eenre Moisesi ahoovahakani wiineliwa, nyuwo muniinela eSaabadu, orookhalaru weera vekhaikhai wu khawaarwiiye wa Moisesi, mene wa atithinyu a khalayi.

²³Moone, wakhala woowaakhuleleya weera mwaana mmoha iineliwe eSaabadu weera nlamulo na Moisesi nihinanarihiwe, heeni nyuwo munkinyoonyeriwaanyu Miyo niwoko na olamiha erutthu yootheene ya mulopwana eSaabadu?

²⁴Muhithorihe mukhalelo woowooneya paahi, mene muthorihe moota wa ekhaikhai.”

²⁵Vano akina yaamanke oYerusaleemu yaapacera okoha: “Khahiyono Ola Mulopwana awo ammwaasaaya omwiiva?

²⁶Ori va Owo uulumaka mwaatthuni ni khaammweerela etthu. Weeraka asitokweene yaaphiya woovaanelani weera Owo vekhaikhai ti Kristu?”

²⁷Hiyo noosuwela onkhumelelaawe Mulopwana Ola. Kristu aawaaka, khaawo aneera asuwele onkhumelelaawe.”

²⁸Yeesu eera axuttihaka Mpaani mwa Muluku, aakhuwela: “Aani nyuwo mookisuwela ni moosuwela kinkhumelelaaka. Miyo nkikhanle va niwoko na mwaneenaakaru, mene Yaawo akirumihale ti a ekhaikhai. Nyuwo khamwaasuwenle,

²⁹mene Miyo kohaasuwela, niwoko kingwa wa mpattaaya ni Awo akirumihale.”

³⁰Vano yaaheerera omvara, mene khaawo yaamvanre niwoko ehuhuwaawe khayaaphiyale.

³¹Wa soothesene, ancipale a muloko wa atthu ancipale yaamuroromela Yoowo. Awo yaaheera: “Krisu aawaaka, anaapake ineneero sootikhiniheya soompwaha Mulopwana Ola ompakaawe?”

³²aFarisi* yaawiiwa atthu ancipale yuulumaka itthu seiye mwaha wa Yoowo. Vano ahooleli a asaserdoti* ni aFarisi* yaahaaruma anakhotto a Empa ya Muluku weera emutthuke.

³³Yeesu aaweerela: “Kiri ni nyuwo ehuhu vakhaani paahi ni vano nkirowe wa Yaawo akirumihale.

³⁴Nyuwo mmwikaasaase, mene khamurwa mukiphwanya. Weiwo kineeraaka kikhale, nyuwo khamungwera owa.”

³⁵aYuda yaaheerelana: “Ontthuna orowa woowi Mulopwana Ola, hiyo nihingweraahu omuphwanya? Apaale weiwo onkhalaayawo muloko wa atthwaahu omwaramwareiye variyari wa aGrego weera axuttihewo?

³⁶Eheeni aatthunaawe ohima eeraka: ‘Nyuwo mmwikaase, mene khamurwa mukiphwanya’ ni: ‘Weiwo kineeraaka kikhale, nyuwo khamungwera owa’?”

³⁷Wa nihuku nookisera noottittimiheyaxa na efesta, Yeesu aavenya, anakhuwela: “Akhala mukina ori ni ntthona, awe wa Miyo ni awure!

³⁸Ntoko Yoolempwa* yeenraaya: ‘Yoole onkiroromela Miyo, mmurimanimwawe nsikhume nyooloko sa maahi a okumi.”

³⁹Owo aahima mwaha wa Munepa yeeraaya yaakhele yaawo animuroromela Yeesu. Mpaka ehuhuweene yeele Munepa nlelo weera ohinaaye ovahiwa, niwoko Yeesu khaanaaye ovuwihiwa.

⁴⁰Yiiwalaaya maswaawe, akina a muloko wa atthu yaaheera: “Vekhaikhai Mulopwana Ola ti Mprofeeti.”

⁴¹Akina yaaheera: “Owo ti Kristu.” Akinatho yaakoha: “Ongwereya hai Kristu orweela oGalileiya?

⁴²Yoolempwa* enghima nnenesene weera Kristu anaawe wa ekhapira ya Davide, wa esidade ya oBetelehemu weiwo Davide aakhalaawewo!”

⁴³Hiiho muloko wa atthu waakawanyeiya niwoko na Yeesu.

⁴⁴Akina yaatthuna omtthuka, mene khaawo yaamvanre.

⁴⁵Vano anakhotto a Empa ya Muluku yaahaahokoleela ahooleli a asaserdoti* ni aFarisi*, mwa yaawo yaahaakoha: “Heeni nyuwo muhimurowenlaanyu?”

⁴⁶Anakhotto yaahima: “Khaawo otonke wuuluma moota ntoko Mulopwana Ole onuulumaawe!”

⁴⁷aFarisi* yaahaakoha: “Weeraka nyuwotho moolokotthiwa?

⁴⁸Apaale mukina a asitokweene, hoye hoye aFarisi* aamuroromela Yoowo?

⁴⁹Hoye! Mulokotho owo ohisuwenle nlamulo ori woolaphiwa!”

⁵⁰Nikodemu, mmoha a yaawo, yoowo eera ahinaaye omwaattamela Yeesu, aahaakoha:

⁵¹“Nlamulonahu nnimuthoriha mukina ohinaaye omwiiwa, naari osuwela yeeyo oneeraawe?”

⁵²Awo yaamwaakhula: “Nyuwotho muri a oGalileiya? Musomele ni mmoonelele weera oGalileiya khawa akhumelela mprofeeti.”

⁵³Vano mutthu ti mutthu aarowa owannyawe.