Read Makhuwa-Shirima Yohaane 8 Bible Online

Yohaane 8 - Makhuwa-Shirima bible

Yohaane 8

¹Wa soothesene, Yeesu aarowa omwaako wa Sooliveira.

²Oxaawaya, Owo aavolowatho Empa ya Muluku, mwa weiwo muloko wa atthu wootheene waathukumannaaya omurukureenreene. Vano Owo aakilaathi weera axuttihe.

³Anamawera a nlamulo* ni aFarisi* yaamuruuhela muthiyana mmoha yaamvanraaya araruwaka. Yaamulamulela weemela ohoolo wa atthu ootheene,

⁴enamweerela Yeesu: “Muhusiha, muthiyana ola oovariwa araruwaka.

⁵Munlamuloni, Moisesi onnilamulela waavonya maluku asithiyana ntoko yoola. Vanonto, Apwiya — munghima eheeni?”

⁶Awo yaakoha hiiho ntoko ntapha weera ephwanye nthowa na omoothera. Yeesutho aahuurama ni aapacera olepa vatthayani ni ekatha.

⁷Woonaka weera awo yannatepa omukohakoha, Yeesu aaheemela, anaweerela: “Akhala mmoha a nyuwo ohikhanleno yoottheka, akhale oopacera omvonya nluku.”

⁸Aahuuramatho ni aapwaherera alepaka vatthayani.

⁹Yaawo yaamwiiwale yaapacera orowa, mmoha-mmoha, okhuma asitokweene. Yeesu aahanle paahi ni muthiyana eemenleene vahoolowawe.

¹⁰Yeesu aaheemela, anamukoha: “Muthiyana, ale ari woowi? Khaawo oothorihaleni?”

¹¹Owo aaheera: “Khaawo, Apwiya.” Yeesu aahima: “Miyotho nkinoothorihani. Vano, murowe ni muhiye okumaanyu wa wootthekeya.”

¹²Uulumakatho ni muloko wa atthu, Yeesu aaheera: “Miyo ti Waara wa elapo ya vathi. Yoowo onkitthara Miyo, kharwa eetta mpiphini, mene onookhalano waara wa okumi.”

¹³aFarisi* yaamweerela: “Nyuwo muniikhalela onamoona muneenaanyuru. Onamoonaanyu khoohiyono woowaakhuleleya.”

¹⁴Yeesu aawaakhula: “Kiri mweeraru Miyo kiikhalelaka onamoona muneenaakaru, onamoonaaka ori wa ekhaikhai niwoko koosuwela kinkhumaaka ni kinkelaaka. Vaheera nyuwo khamusuwenle kinkhumaaka, hata kinkelaaka.

¹⁵Nyuwo munthoriha ni mukhalelo wa omutthu. Miyo khaawo kinimuthorihaaka.

¹⁶Hata Miyo kathoriha, olakelawaka ori wa ekhaikhai niwoko nkikhanle meekhaaka. Miyo kiri ni Atiithi akiruminghe.

¹⁷Munlamulonimwanyu olempwe weera onamoona wa asilopwana eeli ti woowaakhuleleya.

¹⁸Miyo kiniikhalela onamoona mwaha wawaka; onamoona mukina ori Atiithi akiruminghe.”

¹⁹Vano yaamukoha: “Atithinyu ari woowi?”Yeesu aawaakhula: “Nyuwo khamukisuwenle Miyo, hata Atithakatho. Nyuwo mwaakisuwenle, mwaamwaasuwelatho Atithaka.”

²⁰Owo aahima masu awo axuttihaka Mpaani mwa Muluku, vakhiviru wa nipuro weiwo atthu yaahelaaya soovahasaya. Wa soothesene, khaawo yaamutthunke niwoko ehuhuwaawe yeera ehinaaye ophiya.

²¹Yeesu aaweerelatho: “Miyo kinoottimula ni nyuwo mmwikaasaase ni mmwikhwe mootthekanimwanyu. Weiwo kinrowaakawo, khamungwera orowa.”

²²Niwoko na yeeyo aYuda yaakohana: “Weeraka Owo aneere wiixiiva? Niwoko eenre: ‘Kinrowaakawo, khamungwera orowa’?”

²³Vano Owo aapwaherera wuuluma: “Nyuwo muri a vathi; Miyo kiri a wiirimu. Nyuwo muri a elapo ya vathi; Miyo nkihiyono a elapo ya vathi.

²⁴Miyo kohooleelani weera mmwikhwe mootthekanimwanyu. Nyuwo mwaahiroromela weera Miyo kiri, vekhaikhai mmwikhwe mootthekanimwanyu.”

²⁵Awo yaamukoha: “Nyuwo taani?” Yeesu aawaakhula: “Miyo ti Yoowo kooleelaakani ehuhu yootheene!

²⁶Kookhalano masu mancipale weera kihime wa nthorihelonanyu, mene Yaawo akiruminghe amphwanela ororomeliwa, ni Miyo kinghima wa elapo ya vathi paahi yeeyo kiiwalaaka wa Yaawo.”

²⁷Awo khayiiwexenxe weera aaleela mwaha wa Atiithi.

²⁸Vano Yeesu aaweerela: “Nyuwo mwaamuttukhulaka Mwaana a mutthu, mmwisuwele weera Miyo kiri, ni kheewo kimpakaaka ya muneenaakaru. Vekhaikhai, kinuuluma yeeyo paahi Atiithi akixuttinghaaya.

²⁹Yaale akiruminghe ari ni Miyo. Awo khaakihiyale meekhaaka niwoko mahuku ootheene kimpaka yeeyo enaasiveliha.”

³⁰Ahimaka itthu iye, atthu ancipale yaamuroromela Yoowo.

³¹Yeesu aaweerela aYuda yaamuroromenle: “Nyuwo mwapwaherera ni nthiti mwa nsunaka, vekhaikhai munookhala oohuseraaka.

³²Vano mmwisuwele ekhaikhai ni ekhaikhai eniyootapuxeni.”

³³Awo yaamwaakhula: “Hiyo nri ekhapira ya Abrahaamu ni khanitonke okhala ipottha sa mukina. Heeni Nyuwo muneeraanyu weera nnikhale maneethi?”

³⁴Yeesu aawaakhula: “Miyo kinooleelani ekhaikhai: khula mutthu onkhala atthekaka ti epottha ya yoottheka.

³⁵Epottha kheenkhala mahuku ootheene ni emusaaya, mwaanatho ori a emusaawe mahuku ootheene.

³⁶Tivawo, Mwaana oovuluxani, nyuwo vekhaikhai mmwikhale maneethi.

³⁷Miyo koosuwela weera muri ekhapira ya Abrahaamu. Wa soothesene, munaasaasa okiiva niwoko khamuntthuna waakhela nsunaka.

³⁸Miyo kinooleelani yeeyo koonnaaka kaakhalaaka ni Atthiiti ni nyuwo mumpaka yeeyo mwiiwalaanyu wa atithinyu.”

³⁹Awo yaamwaakhula: “Abrahaamu ti atithihu.” Yeesu aaweerela: “Nyuwo mwaari anamwane a Abrahaamu, mwaamupaka miteko Abrahaamu aapakaawe.

⁴⁰Munaasaasatho okiiva, hata kireene Yoowo ooleenleni ekhaikhai kiiwalaaka wa Muluku. Abrahaamu khaapaka hiiho.

⁴¹Nyuwo mumpaka miteko sa atithinyu.” Vano awo yaamweerela: “Hiyo khaniyariwe mooraruwani. Atithihu amoharu ti Muluku.”

⁴²Yeesu aaweerela: “Muluku aari atithinyu, nyuwo mwaamukisivela niwoko Miyo kaawiiye wa Muluku, ni vaanaano kiri va. Miyo nkiwiiye wa muneenaakaru, mene wa Awo akiruminghe.

⁴³Heeni muhiniiwexexaanyu nuulumonaka? Niwoko khamungwera wiiwa yeeyo kinghimaaka.

⁴⁴Nyuwo ti anamwane a Diyabu* ni muntthuna opaka ohaawelawawe. Owo aari namwiiva okhuma ompacereroni, ahittharaka ekhaikhai niwoko kheewowo ekhaikhai mwa yoowo. Owo oothaka, onuuluma nuulumonawe muneenaawe niwoko ti namootha ni ori atiithi a wootha.

⁴⁵Wa soothesene, nyuwo khamunkiroromela niwoko kinooleelani ekhaikhai.

⁴⁶Mukina a nyuwo onoowera okoothera wa yoottheka emoha? Miyo kuulumaka ekhaikhai, heeni muhinkiroromelaanyu?

⁴⁷Yoole ori a Muluku oniiwa yeeyo Muluku onghimaawe. Nyuwo khamummwiiwa niwoko khamuhiyono a Muluku.”

⁴⁸aYuda yaamwaakhula: “Hiyo naahuuluma nnene neeraka weera Nyuwo ti muSamariya ni murino munepa woonarara.”

⁴⁹Yeesu aaweerela: “Nkinono munepa woonanara. Ohiyanawaya, kinaattittimiha Atithaka ni nyuwo khamunkittittimiha.

⁵⁰Miyo nkinaasa ovuwawaka. Ti Atiithi anaasa ovuwawaka ni Awo anthoriha.

⁵¹Miyo kinoororomelihani weera akhala mukina oniiwelela maswaaka, kharwa akhwa mahuku ootheene.”

⁵²Vahoolo wa yeeyo, aYuda yaamweerela: “Noosuwela vaanaano va weera murino munepa woonanara! Abrahaamu ahookhwa nitho maprofeeti. Vano Nyuwo muneera weera mukina iiwelela maswaanyu, kharwa akhwa mahuku ootheene!

⁵³Nyuwo mohaapwaha atithihu Abrahaamu? Awo ahookhwa nitho maprofeeti. Nyuwo munuupuwela weera taani?”

⁵⁴Yeesu aawaakhula: “Kiivuwiha Miyo muneenaaka, ovuwawaka ori wa siiyo. Atithaka, mwa Yaawo nyuwo mungweerelaanyu ari Mulukwaanyu, ti Yaale ankivuwiha.

⁵⁵Nyuwo khamwaasuwenle, mene Miyo kohaasuwela. Miyo keenre weera nkaasuwenle, saano kikhanleene namootha ntoko nyuwo, vekhaikhaitho Miyo kohaasuwela ni kiniiwelela maswaaya.

⁵⁶Abrahaamu, atithinyu, yaahakalala niwoko yeera yoone nihukunaka. Awo yaahoona ni yaahakalalaxa.”

⁵⁷aYuda yaamweerela: “Nyuwo nlelo khamunono iyaakha miloko mithanu ni moomoona Abrahaamu?”

⁵⁸Yeesu aawaakhula: “Miyo kinooleelani: Abrahaamu ahinaaye oyariwa, Miyo kaakhala!”

⁵⁹Vano yaasaasa maluku weera emvonye, mene Yeesu aahiipitha ni aakhuma Mpaani mwa Muluku.