Read Makhuwa-Shirima Yohaane 9 Bible Online

Yohaane 9 - Makhuwa-Shirima bible

Yohaane 9

¹Aviraka, aamoona mutthu oohoona okhuma oyariwawawe.

²Oohuseraawe yaamukoha: “Muhusiha, taani otthenke: mulopwana ola, hoye hoye asinaangolowaawe, eenre ayariwaka oohoona?”

³Yeesu aaweerela: “Khahiyono mulopwana ola, hata asinaangolowaawe atthenke. Eyo yeereiye weera muteko wa Muluku woonihereiye mookuminimwawe.

⁴Oreene nlelo othana, onthuneya weera hiyo nipake muteko wa Yaale akiruminghe. Ohiyu onookhuveela aneeraawe ahikhale anaavare muteko.

⁵Miyo kireene mweelaponi, ti Waara wa elapo ya vathi.”

⁶Uulumaka yeeyo, aasenyela vatthayani, anatakansera etthaya ni isenye, anattikitthela mmaithoni mwa mulopwana.

⁷Vano aamweerela: “Murowe ni mwiirapihe vantthiyani wa Silowami.” (Eyo entaphulela: oorummwa). Mulopwana aarowa, aniirapiha, anahokolowa oonaka.

⁸Amwaattamanaawe ni yaawo yaamoona okhuma khalayi avekaka yaakohana: “Khahiyono mulopwana ola yoole aakhovelela okilaathi avekaka?”

⁹Akina yaaheera weera ti yoole. Akinatho yaaheera: “Hoye, onlikana ni yoole paahi.” Mene owo muneenaawe aaheera: “Ti yoomi.”

¹⁰Awo yaamukohakoha: “Vano, ahuleiye hai maithwaanyu?”

¹¹Owo aawaakhula: “Mulopwana oniitthaniwa Yeesu aatakansa etthaya ni isenye, anakittikitthela mmaithonimwaka, anakeerela weera kirowe ni kiirapihe vantthiyani na oSilowami. Koorowa, kohiirapiha ni kinimoona!”

¹²Awo yaamukoha: “Ori woowi Mulopwana Owo?” Owo aaheera: “Nkisuwenle.”

¹³Vano yaamuronghela aFarisi* mulopwana aari oohoona.

¹⁴Nihuku Yeesu aatakansalaawe etthaya ni isenye ni aahunlaawe maitho a mulopwana ole naari eSaabadu.

¹⁵aFarisi* yaamukohatho moota heeni owo aawenraawe woona. Mulopwana aawaakhula: “Owo aakittikitthela mmaithonimwaka etthaya yootakanseriwa isenye. Vano kiniirapiha ni kinoona.”

¹⁶Akina a aFarisi* yaaheera: “Mulopwana Owo khahiyono a Muluku niwoko khanttittimiha eSaabadu.” Akinatho yaakoha: “Ongwereya hai namattheka opaka ineneero sootikhiniheya iya?” Vano, waakhala ohiiwanana variyariwaya.

¹⁷Yaamukohatho oohoona: “Onghima eheeni weyo mwaha wa Yoowo? Ti maithwaawo Owo ohunlaawe.” Mulopwana aawaakhula: “Owo ti Mprofeeti!”

¹⁸aYuda khayaakhulenle weera owo aari oohoona analamihiwa. Tivawo yaawiitthannaaya asinaangolowaawe

¹⁹ni yaahaakoha: “Yoola mwaninyu mwa yoowo muneeraanyu aayariwe oohoona? Onoona hai vano?”

²⁰Asinaagolowaawe yaawaakhula: “Noosuwela weera owo ti mwanihu ni aayariwa oohoona.

²¹Khanisuwenletho weera onoona hai, hata taani omuhunle maithwaawe. Munkohe ola. Ohunnuwa. Onoowera wuuluma muneenaawe.”

²²Asinaangolowaawe yeenre yeeyo ewoovaka aYuda, niwoko ale yaalakela weera mukina alapa weera Yeesu ti Kristu, anoomoliwe muSinagogani*.

²³Tivawo asinaangolowaawe yeenraaya: “Ohunnuwa. Munkohe ola.”

²⁴Emaara yanaaveeli yaamwiitthana mulopwana aari oohoona, enamweerela: “Omvuwihe Muluku! Noosuwela weera Mulopwana Owo ti namattheka.”

²⁵Owo aawaakhula: “Nkisuwenle weera Owo namattheka, naari hoye. Etthu emoha koosuwela: Miyo kaari oohoona ni vano kinimoona!”

²⁶Vano yaamukoha: “Eheeni oopakenlaawe weyo? Oohunle hai maithwaawo?”

²⁷Owo awaakhula: “Miyo kohooleelani, mene nyuwo khamwiiwale. Heeni muntthunaanyu wiiwatho? Apaale nyuwotho muntthuna okhala oohuseraawe?”

²⁸Vano yaamuruwana ni yaamweerela: “Oohuseraawe ti weyo! Hiyo nri oohusera a Moisesi!

²⁹Noosuwela weera Muluku aahuuluma ni Moisesi, mene mwaha wa Yoowo — khanisuwenle hata onkhumelelaawe.”

³⁰Mulopwana aawaakhula: “Moone, eyo ti etthu yootikhiniheya! Nyuwo khamusuwenle onkhumelelaawe, wa soothesene Owo ookihula maithwaaka.

³¹Noosuwela weera Muluku khammwiiwelela namattheka, mene ommwiiwelela yoowo onimuttittimiha Muluku ni ompaka otthunawawe.

³²Khaawo otonke wiiwa weera mutthu oohoona eyareliwaawe aahuliwa maithwaawe.

³³Mulopwana Owo ahaakhanle a Muluku khaawera opaka etthu.”

³⁴Awo yaamwaakhula: “Weyo waayariwe oosareya yoottheka! Ontthuna onihusiha?” Vano yaamoomola.

³⁵Yeesu aahiiwa weera aahoomoliwa ni amphwanyaka, aamukoha: “Nyuwo munoomuroromela Mwaana a mutthu?”

³⁶Mulopwana aamukoha: “Apwiya, Yoowo taani weera miyo kinroromele?”

³⁷Yeesu aamweerela: “Nyuwo moomoona. Ti Yoole onuuluma ni nyuwo.”

³⁸Vano mulopwana aamweerela: “Apwiya kinoomuroromela.” Ni aamulapa.

³⁹Yeesu aamweerela: “Miyo kirweenle mweelaponimu othoriha: weera ahinoona yoone ni anoona ekhale oohoona.”

⁴⁰aFarisi* akina yaari vamoha ni Yoowo yaamwiiwa ahimaka yeeyo ni yaamukoha: “Apaale hiyotho nri oohoona?”

⁴¹Yeesu aaweerela: “Nyuwo mwaari oohoona, khamwaakhala ni nthowa na yoottheka. Vanonto mweenre mweeraka: ‘Ninnoona,’ nthowananyu ninoopwaherera.