Read Makhuwa-Shirima Miteko 10 Bible Online

Miteko 10 - Makhuwa-Shirima bible

Miteko 10

¹Aakhala oSesareya mulopwana mmoha iitthaniwa Korneliyu, kenturiyoni* a mpatta wa anakhotto oosuweliwa ntoko a wItaliya.

²Owo ni amusaawe ootheene yaari a murima wa omuluku ni yannamoova Muluku. Owo annavaha soovaha sincipale wa muloko wa atthu, ni annavekela wa Muluku.

³Nihuku nimoha, wooxekuwani, owo aahoona moonelo mmoha. Aamoona nnenesene ndyelo a Muluku aamwaattamenle amweerelaka: “Korneliyu!”

⁴Oowoopihiweene owo aangweha, anamukoha: “Eheeni, Apwiya?” Ndyelo aamwaakhula: “Mavekelowaanyu ni sooveleelasanyu soowela ntoko yooveleela yoowuupuxera ohoolo wa Muluku.

⁵Vano mwaarumihe alopwana akina a oYope weera emurowele Simeyoni mmoha, oosuweliwatho ntoko Pedru,

⁶mwa yoowo ophiyenre vaate wa naxapala Simeyoni onkhala vakhiviru wa ephareiya.”

⁷Apwahaka ndyelo aamuulumenle, Korneliyu aawiitthana eeli a arumeiyaawe ni nakhotto mmoha a murima wa omuluku, mmoha a yaale yaamurumeela,

⁸ni aathaliheraka sootheene saakhumelenle, aahaarumiha oYope.

⁹Oxaawaya, nsuwa vamuru, awo yeettaka ni ekhuveelaka esidade, Pedru aawela osulu wa empa weera avekele.

¹⁰Avoliweene etala, aatthuna oca. Erehereriwaka yooca, aatthukeliwa ni okomoka.

¹¹Aahoona wiirimu woohuleya, ni etthu yoolikana ntoko ekuwo etokotoko yaakhuruwela vathi etthukiweene maleembe maxexe,

¹²ereeneno inama sootheene sa nyetto mixexe, soowiipurula sa vathi nitho apalame a wiirimu.

¹³Vano nsu nimoha naamweerela: “Muvenye, Pedru, mwiive ni mukhuure.”

¹⁴Pedrutho aahaakhula: “Hata vakhaani Apwiya! Nkinatoko okhuura etthu yoohitteela, naari yoonanara!”

¹⁵Nsu naamweerela emaara yanaaveeli: “Muhiitthane yoohitteela yeeyo Muluku otteelihalaawe.”

¹⁶Eyo yaaheereiya imaara tthaaru, ni wootutuxereya ekuwo ele yaahokoloxeriwa wiirimu.

¹⁷Pedru atikhinaka etaphulelo ya moonelo ole, alopwana yaarumihiwe ni Korneliyu yaaphwanya empa ya Simeyoni, ni yaaheemela vamulako.

¹⁸Yiitthanaka, yaakoha aari weiwo muletto Simeyoni, oosuweliwa ntoko Pedru.

¹⁹Pedru nlelo atthokelelaka sa moonelo, Munepa waamweerela: “Simeyoni, asilopwana araru anoowaasani nyuwo.

²⁰Tivawo, muvenye ni mukhuruwe. Muhihovele orowa ni yaawo, niwoko Miyo kaarumihale.”

²¹Pedru aakhuruwa ni aaweerela asilopwana: “Ti miyo yoowo mummwaasaanyu. Murweenle heeni?”

²²Asilopwana yaamwaakhula: “Nirweenle mpatta wa kenturiyoni* Korneliyu. Owo mulopwana oororomeleya ni oomoova Muluku, oottittimihiwa ni muloko wootheene wa aYuda. Ndyelo ootteela aamweerela weera onoowiitthanani owannyawe weera owo iiwe maswaanyu.”

²³Pedru aawiitthana weera evolowe, ni aahaavaha nipuro noophiyera. Oxaawaya Pedru aarowa ni yaawo, ni axunna akina a oYope yaamuhoolela.

²⁴Oxaawaya yaaphiya oSesareya. Korneliyu eera aawehereraka, ni aahaalattula amusaawe ni asinthamwenaawe oosiveleyaxa.

²⁵Pedru avolowaka mpaani, Korneliyu aamukumanano ni aamukokhorela vamanaawoniwawe amulapaka.

²⁶Pedrutho, aamweemexa, eeraka: “Mweemele, miyotho kiri mutthu paahi.”

²⁷Amutthekulakano yoowo, Pedru aavolowa ni aahaaphwanya mwemmwe ethukumanneene atthu ancipale,

²⁸ni aaweerela: “Nyuwo moosuwela nnenesene weera nlamulonahu ninkhoottiha weera muYuda athukumane ni mmalapo, naari omuxekura, mene Muluku ookoonihera weera miyo khawaatthuneya omwiitthana naari mutthu mmoha oohitteela, hoye hoye oonanara.

²⁹Tivawo, kaasaasiwaaka, kirwiiye woohikhootta. Vano, heeni nyuwo muruminghaanyu weera kirweeliwe nno?”

³⁰Korneliyu aamwaakhula: “Wa mahuku maxexe avirale, miyo kaari owaani kivekelaka ehuhuweene yeela ya oxekuwa. Woowaakuveya aakhala ohoolowaka mulopwana mmoha awanreene ikuwo soowaara,

³¹ni aakeerela: ‘Korneliyu, Muluku ohiiwa nivekelonanyu ni ohuupuwelela soovahasanyu.

³²Murumihe weera aroweliwe oYope Simeyoni iitthaniwa Pedru. Owo ophiyenre vaate wa naxapala Simeyoni, onkhala vakhiviru wa ephareiya.’

³³Hiiho kaarumiha oroweliwa woowaakuveya, ni ti wooreera weera nyuwo mohoorwa. Ootheene hiyo nri vamaithoni wa Muluku weera niiwe sootheene Apwiya yoorumalaayani onileela.”

³⁴Vano Pedru aapacera wuuluma: “Vano kinoowera woona weera Muluku khanono nthalu,

³⁵mene Owo oniwaakhulela yaale a miloko sootheene ammoova ni ampaka yeeyo eri ya ekhaikhai.

³⁶Nyuwo moosuwela mutthenga orumihiwe ni Muluku wa muloko wa aYixrayeli, onuuluma sa masu ooreeraxa a murettele mwa Yeesu Kristu, Apwiya a ootheene.

³⁷Moosuwelatho weera masu aalaleiwa oYudeiya wootheene epaceraka oGalileiya vahoolo wa opatiso Yohaane aalaleiyaawe.

³⁸Moosuwela moota Muluku aamuttikitthenlaawe Yeesu ni Munepa Wootteela, ni ni ikuru, ni moota Owo eettaawe ilapo sootheene apakaka itthu sooreera ni aalamihaka ootheene yaale yaalamuliwe ni Diyabu*, niwoko Muluku aari ni Yoowo.

³⁹Hiyo nri anamoona a sootheene Owo aapakaawe mweelaponi mwa aYuda ni oYerusaleemu. Ti Yoowo yaamwiivalaaya, emuthomeyaka vamuttandani.

⁴⁰Wa soothesene, Muluku aamvenyereriha vanihukuni nanaaraaru, ni aamuweriha weera ooneye,

⁴¹ohikhanle wa muloko wa atthu wootheene, mene wa anamoona Muluku aathanlalaawe khalayi, aani aahooniwa ni hiyo, naaciiye ni naawunre vamoha ni Yoowo Owo aavenyerenraawe mookhwaani.

⁴²Owo aanirumihale olaleera muloko wa atthu ni okhalela onamoona weera Owo ti Yoowo Muluku aamukhalihalaawe Mphuki a akumi ni akhwiiye.

⁴³Maprofeeti ootheene animukhalela onamoona Yoowo weera ootheene animuroromela Yoowo, animwaakhela elevelelo ya soottheka mwa Nsinanawe.”

⁴⁴Pedru nlelo uulumaka masu ala, Munepa Wootteela waahaakhuruwela ootheene yaawo yiiwale mutthenga.

⁴⁵aYuda aKristu yaarwiiye ni Pedru yaatikhina weera yamahala ya Munepa Wootteela yiittheliwe mpaka wa amalapo,

⁴⁶niwoko yaawiiwa yuulumaka muulumo ni emuttottopelaka Muluku. Vahoolowaya Pedru aaweerela:

⁴⁷“Awo ahaakhela Munepa Wootteela ntoko hiyo! Vano, khaawo ongwera owooceeliha weera epatisiwe ni maahi.”

⁴⁸Aalamulela weera epatisiwe mwa Nsina na Yeesu Kristu. Vahoolowaya yaamvekela Pedru weera akhale ni yaawo mahuku makina.