Read Makhuwa-Shirima Miteko 11 Bible Online

Miteko 11 - Makhuwa-Shirima bible

Miteko 11

¹Arummwa ni axunna a oYudeiya wootheene yaahiiwa yuulummwaka weera amalapotho yaahaakhela masu a Muluku.

²Hiiho, Pedru arowaka oYerusaleemu, yaawo yaari oowiineliwa yaamoothera yeeraka:

³“Nyuwo mwaavolowa mpaani mwa atthu oohiineliwa, ni mwaahooca vamoha ni yaawo.”

⁴Pedru aapacera waathalihera nnenesene yeeyo yaakhumelenle, eeraka:

⁵“Kaari musidadeni ya oYope kivekelaka, ni kikomokaka mmunepani, kaahoona moonelo. Kaahoona etthu yoolikana ni ekuwo etokotoko yaakuruxiwa wiirimu, etthukiweene mmaleembeni maxexe, yaarwa mpaka vaavaale miyo kaaraakawo.

⁶Kaathurumela mpuwa ni kaahoona weera yaakhalamo axinama a nyetto mixexe, axinama a ntuphini, oowiipurula, ni apalame a wiirimu.

⁷Vano kaahiiwa nsu nimoha naakeerenle: ‘Muvenye Pedru, mwiive ni mukhuure.’

⁸Miyo kaahaakhula: ‘Hata vakhaani, Apwiya! Kheenatoko ovolowa mmwaanomwaka etthu yoohitteela, naari yoonanara.’

⁹Nsu naahuuluma wiirimu emaara yanaaveeli neeraka: “Muhiitthane yoohitteela yeeyo Muluku otteelihalaawe.’

¹⁰Eyo yaaheereiya imaara tthaaru ni vahoolowaya sootheene saahokoloxeriwa wiirimu.

¹¹Ehuhuweene yeele emoharu, yaaphiya vaate miyo kaaphiyenraaka asilopwana araru kaarumiheliwaaka miyo oSesareya.

¹²Munepa waakeerela weera kihihovele orowa ni yaawo. Asilopwana athannammosa ala yaakihoolatho, ni naavolowa mpaani mwa mulopwana ole.

¹³Owo aanithalihera moota ndyelo iixoonihenraawe vaatewawe ni aamweerenlaawe: ‘Murumihe oroweliwa oYope Simeyoni iitthaniwa Pedru.

¹⁴Owo anooruuheleni mutthenga oneera woovuluxeni nyuwo ni ootheene a vaatewanyu.’

¹⁵Miyo kipacerakaru wuuluma, Munepa Wootteela waahaakhuruwela yaawo ntoko waanikhuruwenlaaya hiyo ompacereroni.

¹⁶Vano kaahuupuwelela yeeyo Apwiya yaahimalaaya yeeraka: “Yohaane aapatisa ni maahi, mene nyuwo mmwipatisiwe ni Munepa Wootteela.”

¹⁷Muluku aavanghe yamahaleene yeeyo Owo onivanghaawe hiyo naaroromenlaahu Apwiya Yeesu Kristu, miyo taani oowera omukhoottela Muluku?”

¹⁸Yiiwaka yeeyo, yaahiya omukohakoha, ni yaamvuwiha Muluku yeeraka: “Vano Muluku ohaavaha orukunxa murima wa okumi mpaka amalapo asineenaaya!”

¹⁹Yaawo yaamwaramwareiye niwoko na osoondiwa waapacenre ni okhwa wa Stefano, yaaphiya oFenisiya, oKipro ni wAntiyokiya, yaalaleeraka mutthenga aYuda paahi.

²⁰Wa soothesene, akina a yaawo, yaari atthu a oKipro ni a oKireene, yaarowa wAntiyokiya ni yaapacera wuuluma ni aGregotho, yaathaliheraka masu ooreeraxa mwaha wa Apwiya Yeesu.

²¹Ntata na Apwiya naari ni yaawo, ni ancipale yaaroromela ni yaarukunxela mirimasaya wa Apwiya.

²²Ihaali sa etthweene yeeyo saahiiwanyeiya ni ekerexa ya oYerusaleemu, ni atthu a ekerexa ele yaamurumiha Barnaba wAntiyokiya.

²³Owo aphiyaka weiwo ni oonaka mahala a Muluku, aahakalala ni aahaalipihera weera ekhaleke oororomeleya wa Apwiya ni murima wootheene.

²⁴Owo aari mulopwana a murima wooreera, oosareya Munepa Wootteela ni nroromelo, ni atthu ancipale yaarukunxela mirimasaya wa Apwiya.

²⁵Vano Barnaba aarowa oTarso omwaasaasa Sawuli,

²⁶ni amphwanyaka, aamukuxa amuronghaka wAntiyokiya. Hiiho Barnaba ni Sawuli yannathukumana ni ekerexa ya wAntiyokiya, woomalaka eyaakha emoha ni yaahaaxuttiha atthu ancipale. Ti wAntiyokiya oohusera yaapacenraayawo wiitthaniwa aKristu.

²⁷Mahukweene yaale, maprofeeti makina yaarowa ekhumaka oYerusaleemu mpaka wAntiyokiya.

²⁸Mmoha a yaawo iitthaniwa Agabo, aaheemela ni aahima mwa Munepa weera eniikhale etala etokoko mweelaponi yootheene ya oRooma, ni eyo yaakhumelenle ehuhu ya olamula wa Klawudiyu.

²⁹Oohusera yaalakela waakhavihera axunna yaakhala oYudeiya, mutthu ti mutthu yeeyo owo aaweraawe.

³⁰Yaapaka hiiho yaarumihelaka soovahasaya asitokweene a ekerexa mmatatani mwa Barnaba ni Sawuli.