Read Makhuwa-Shirima Miteko 12 Bible Online

Miteko 12 - Makhuwa-Shirima bible

Miteko 12

¹Ehuhuweene yeele, mwene Herodi aahaatthuka akina yaari a ekerexa, atthunaka waahasula.

²Aalamulela omwiiva ni ekatana Yakobe, munneiye Yohaane.

³Oonaka weera eyo yaahaasiveliha aYuda, aapwaherera amutthukakatho Pedru mweehuhuni mwa efesta ya ipaawu soohikhalano eferementu.

⁴Amutthukaka, aangwalela okaliposo, amwinnyereraka yoowo weera awehawehiwe ni mipatta mixexe, khula mpatta anakhotto axexe. Herodi aatthuna weera amuthorihe mwaatthuni emalaka ehuhu ya mPaska*.

⁵Pedru aahiikaathiwa okaliposo, mene ekerexa yannamvekelela vancipale wa Muluku.

⁶Ohiyuweene yoowo, nihinaaye nihuku Herodi eeraawe amuthorihe yoowo mwaatthuni, Pedru eera akonaka eriyari ya anakhotto eeli, atthukiweene ni onyooro miili, ni anamalipelela yaalipelela mulako wa mukaliposo.

⁷Wootutuxereya aahoorwa ndyelo a Apwiya, ni waara waahaara mukwartuni ele. Owo aamutava Pedru mpararini ni aamvenxa, eeraka: “Mwaakuveke, muvenye!” Vano onyooro waapaseiya mmatatanimwawe.

⁸Ndyelo aamweerela: “Ngware ni muwaretho ikwakwaatta.” Pedru aapaka hiiho. Ndyelo aamweerelatho: “Muwareke mukaandyo ni mukitthare.”

⁹Ni akhumaka, Pedru aamutthara ahisuwelaka weera yaari ekhaikhai yeeyo yaapakeya ni ndyelo, niwoko uupuwela weera waari moonelo.

¹⁰Yaavira wa anamalipelela oopacera ni anaaveeli, ni yaaphiya vamulakoni mutokotoko wa eyuuma waakeliha musidadeni. Owo waahuleya mwaneenaaya, ni yaavira. Ekhumakaru, yaaheetta mmuseweni mmoha, ni woowaakuveya ndyelo aamuhiya.

¹¹Vanonto Pedru aasuwela nnenesene ni aahiixeerela: “Vano koosuwela kihihovelaka weera Apwiya yaamurumiha ndyelowaaya ni ookivuluxa mmatatani mwa Herodi, ni mwa sootheene seiyo muloko wa aYuda waawehereraaya.”

¹²Asuwelaka yeeyo, aarowa vaate wa Mariya, amayawe Yohaane iitthaniwatho Marku, yaathukumannaayamo atthu ancipale evekelaka.

¹³Pedru aamana nsele na muttheko ni murumeiyi muthiyana, nsinanawe Roode, aahoorwa wiiwelela.

¹⁴Iiwaka nsu na Pedru, aahakalala ni aahaatthimakela atthu yaari mpaani attiwalaka ohula nsele ni aaweerela: “Pedru ori vamulako!”

¹⁵Wa soothesene, yaamweerela: “Weyo onkhwa anepa!” Alipiheraka weera aari yoowo, awo yaamweerela: “Apaale ori ndyelowaawe.”

¹⁶Pedrutho aapwaherera omana nsele, ni ehulakaru nsele ni emoonakaru, yaatikhina.

¹⁷Pedru, aavahaka eneneero ni ntata weera emaale, aahaathalihera moota Apwiya yaamukhumihalaaya mukaliposo ni aaweerela: “Mwamuleele yeeyo Yakobe ni axunna.” Vano aakhuma ni aarowa nipuro nikina.

¹⁸Oxeexelo, waakhala onyakulihana otokotoko variyari wa anakhotto wa yeeyo yeereiye ni Pedru.

¹⁹Alamulaka omwaasaasa nnenesenene Pedru, mene ehimphwanyaka, Herodi aahaakohakohaxa anamalipelela ni aahaalamula weera yiiviwe. Vahoolowaya, Herodi aarowa akhumaka oYudeiya mpaka oSesareya, ni aamaka weiwo ehuhu ekina.

²⁰Owo aahaanyoonyeriwa atthu a oTiro ni a oSidoni. Wa soothesene, awo yaathukumana ni yaaheerera wuuluma ni yoowo. Eweraka toko ekhavihero ya Blastu, murumeiyi oororomeleya a mwene, yaamvekela Herodi murettele niwoko elapwaaya yaacihiwa ni elapo ya mwene.

²¹Nihuku naalanghaniwe Herodi awanreene ikuwo sa emwene, aakilaathi vahiceniwawe ni aahuuluma ni muloko wa atthu.

²²Awo yaapacera okhuwela, yeeraka: “Ti nsu na muluku, nihikhanle na mutthu.”

²³Woonaka weera Herodi khaamvuwiha Muluku, woowaakuveya ndyelo a Apwiya aamuvulaliha, ni owo aahookhwa akhuuriweene ni nyuungu.

²⁴Ehuhu emoha yeeyo, masu a Muluku yaapwaherera wunnuwa ni omwaramwaxeya.

²⁵Emalihaka mutekwaaya, Barnaba ni Sawuli yaahokolowa ekhumaka oYerusaleemu, emukuxaleene Yohaane iitthaniwatho Marku.