Read Makhuwa-Shirima Miteko 14 Bible Online

Miteko 14 - Makhuwa-Shirima bible

Miteko 14

¹wIkoniyo yaaheereiyatho etthu emoharu. Pawulo ni Barnaba yaarowa oSinagogani*. Weiwo yaahuuluma moota wooweera atthu ancipale a aYuda ni a amalapo yaaroromela.

²aYudatho yaakhoontte ororomela yaahaasesera amalapo, yaatatuxaka amwiittana a oororomela.

³Pawulo ni Barnaba yaakhalawo ehuhu yincipale, yuulumaka ni murima woolipa sa Apwiya, mwa Yaawo yaahaakhavihera epakaka ineneero ni sootikhiniha.

⁴Muloko wa esidade waakawanyeya: akina yaawaakhulela aYuda ni akinatho arummwa.

⁵Vano, amalapo ni aYuda akina vamoha ni asitokweenaaya, yaavaanela weera yaahasule ni yaavonye maluku arummwa.

⁶Vaheera awo yaahiiwa sa seiyo, ni yaatthawela isidade sa elapo ya oLikawoniya siniitthaniwa oListra ni oDerbe ni wa ilapo soowaattamana,

⁷weiwo yaapwahereraaya olaleiya masu ooreeraxa.

⁸oListra aakhala mulopwana mmoha oorakala inaawosawe okhuma oyariwawawe. Vano, aakhala weiwo ekilaathelo ni khanatoko weetta.

⁹Owo aamwiiwa Pawulo uulumaka, ni Pawulo, angwehaka nnenesene ni oonaka weera owo aakhalano nroromelo weera alamihiwe,

¹⁰aamweerela, akhuwelaka: “Muvenye, mweemele!” Mwa yeeyo, mulopwana aatupha, aneemela, anapacera weetta.

¹¹Yoonaka yeeyo Pawulo aapankaawe, atthu ancipale yaapacera okhuwela ni nuulumo na oLikawoniya yeeraka: “Miluku soonikhuruwela ni ekhalelo ya omutthu!”

¹²Vano yaamwiitthana Barnaba Zeyu*, ni Pawulo Herme*, niwoko aari yoowo aaruuha masu.

¹³Musaserdoti* a Zeyu*, mwa yoowo empaawe yaari vaate wa esidade, aaruuha imombe ni ikhara sa ithutu wa mulako wa esidade niwoko owo ni atthu ancipale yaatthuna waavaha sooveleela.

¹⁴Yiiwaka yeeyo, Pawulo ni Barnaba yaahaahula ikuwosaya ni yaatthimakela eriyari ya atthu ancipale ekhuwelaka:

¹⁵“Alopwana, heeni nyuwo mumpakaanyu yeeyo? Hiyotho nri atthu ntoko nyuwo. Ninooruuhelani masu ooreeraxa niweerelakani mususe mwa itthusene seiyo sa siiyo, ni muhokoleele wa Muluku mukumi opanke erimu, elapo ni ephareiya ni sootheene siri mwemmo.

¹⁶Khalayi Owo aahiya miloko sa atthu sootheene weettela iphirosaya asineenaaya.

¹⁷Wa soothesene, Owo khaakhanle woohikhala onamoona: ohoonihera oreerawawe oovahakani epula, soohepha wa ehuhu yootthuneya, oovahakanitho yooca yoowaatta ni mirima soosareya ohakalala.”

¹⁸Yaari mweeraru ehimaleene masu ala, arummwa waahaarika owooceeliha atthu ancipale weera ehaavahe sooveleela yaawo.

¹⁹Vano aYuda akina yaaphiya wAntiyokiya ni wIkoniyo, yaaviriyenlaaya atthu ancipale. Yaamvonya maluku Pawulo ni yaampurulela vaate wa esidade, yuupuwelaka weera aahookhwa.

²⁰Oohuseratho yaamurukurenraaya mukhwipimwawe, owo aavenya ni aahokoleela musidadeni. Oxaawaya, owo ni Barnaba yaapwaha erowaka oDerbe.

²¹Awo yaalaleiya masu ooreeraxa esidadeene yeele, ni yaahaakhaliha oohusera ancipale. Vano yaahokoleela oListra, wAntiyokiya ni wIkoniyo,

²²elipiheraka mirima sa oohusera ni ewoopereraka weera epwaherere munroromeloni, yeeraka: “Ontthuneya weera nivire mmahooxoni mancipale weera nivolowe moomweneni wa Muluku.”

²³Pawulo ni Barnaba yaahaathanla asitokweenaaya khula ekerexa. Emalihaka otthuka ni ovekela, yaahaavaherera mookosoopani wa Apwiya, mwa Yaawo awo yaaroromelaaya.

²⁴Eviraka oPisidiya, yaaphiya oPanfiliya

²⁵ni emalihaka olaleiya masu oPerge, yaarowa wAtaliya.

²⁶wAtaliya yaalapuwa munikulani ehokoleelaka wAntiyokiya, weiwo yaavahereriwaaya mwa mahala a Muluku wa orummwa yaakwanihenraaya vano.

²⁷Ephiyaka weiwo, yaathukumana vamoha ni ekerexa, ni yaahaathalihera sootheene Muluku aapakaawe mmatatanimwaya, ni moota aahulenlaawe amalapo mulako wa nroromelo.

²⁸Vano, yaakhala weiwo ehuhu yincipale ni oohusera.