Read Makhuwa-Shirima Miteko 17 Bible Online

Miteko 17 - Makhuwa-Shirima bible

Miteko 17

¹Eviraka wAnfipoli ni wApoloniya, yaaphiya oTesalonika weiwo yaaraayawo eSinagoga* ya aYuda.

²Ntoko yaakhovelelaaya, Pawulo aarowa muSinagogani*, ni wa iSaabadu tthaaru aahuuluma ni yaawo sa Yoolempwa*,

³aathaliheraka ni awooniheraka weera waatthuneya Kristu ohaawa ni ovenyerera mookhwaani, eeraka: “Yeesweene Yoowo kinoolaleeraakani, ti Kristu.”

⁴Akina a aYuda yaaviriyeliwa ni yaamutthara Pawulo ni Sila. Ancipale a aGrego yaamoova Muluku nitho athiyana atokweene ancipale yaamuttharatho.

⁵aYudatho yaakhala ni nrima. Awo yaahaathukumanyiha akina ootakhala murima variyari wa oohivara muteko, ni ethukumanaka atthu ancipale, yaapacera onyakulihana otokotoko musidadeni. Yaaphiya vaate wa Yasoni emwaasaka Pawulo ni Sila weera yaapurulele eriyari ya atthu ancipale.

⁶Wa soothesene, ehaaphwanyaka, yaampurula Yasoni ni axunna akina ohoolo wa asitokweene a esidade ekhuwelaka: “Asilopwana awo antannya munyakunyaku elapo yootheene vano aaphiya wenno,

⁷ni Yasoni oowaakhelela owannyawe. Ootheene awo annavirikanyiha ikano sa Seesari, yeeraka weera ookhala mwene mukina oniitthaniwa Yeesu.”

⁸Yiiwaka yeeyo, atthu ancipale ni asitokweene a esidade yaakhala ni owali.

⁹Vano yaalivihiwaaya musurukhu ni Yasoni ni axunna akina, yaahaataphula.

¹⁰Moohiyuni, axunna yaamurumiha Pawulo ni Sila oBereya. Ephiyaka iwe, yaarowa muSinagogani* mwa aYuda.

¹¹Atthu a oBereya yaari maneethixa waapwaha atthu a oTesalonika. Yaahaakhela mutthenga ni otthuna otokotoko, esomelaka mahuku ootheene Yoolempwa* weera yoone sootheene saari hiiho.

¹²Vano, ancipale variyari wa aYuda, athiyana aGrego atokweene ni alopwana, yaaroromela.

¹³Esuwelaka aYuda a oTesalonika weera Pawulo eera alaleiyaka masu a Muluku oBereya, yaarowa iwe, enaasesera ni enaanyakuliha atthu ancipale.

¹⁴Woowaakuveya axunna yaamurumiha Pawulo wa elapo ya ephareiya, mene Sila ni Timootheyo yaahala oBereya.

¹⁵Atthu yaarongwe ni Pawulo, yaamuhoola mpaka wAtheena, epwahaka ni malamulo a Pawulo weera Sila ni Timootheyo ekumane ni yoowo, wawereya okhale woowaakuveya.

¹⁶Aawehereraka awo wAtheena, Pawulo aanyoonyiwa vancipale mmunepanimwawe woowoona weera esidade yaasareya miluku sikina.

¹⁷Tivawo mahuku ootheene annuuluma muSinagogani* ni aYuda, ni ni aGrego yaamoova Muluku, nitho aahuuluma mmuttettheni mutokweene wa esidade ni yaale yaaphwanyaneya weiwe.

¹⁸Asuweli akina a Epikuro ni a mahusiho a Estoyika yannatthekula ni Pawulo. Akina yaakoha yeeraka: “Eheeni ontthunaawe ohima, namatipura ola?” Akina yaaheera: “Nnoona ntoko owo onlaleiya miluku sa anamarwa,” niwoko Pawulo aalaleiya masu ooreeraxa mwaha wa Yeesu ni wa ovenyerera.

¹⁹Yaamukuxa ni yaamurongha omuthukumanoni wAreyopago*, yaamukonghaaya: “Nihusiho heeni nnyowani nyuwo munlaleiyaanyu?

²⁰Nyuwo munoonihera miruku sikina soohisuwanyeya, ni nintthuna osuwela sintaphulelaaya iyo.”

²¹Vano, atthu a wAtheena ni anamarwa yaakhala weiwo, yaavira ehuhuwaaya yiiwaka ni ethalihaka mahuku ootheene miruku sinyowani soopwahaxa.

²²Vano Pawulo aaheemela vamuthukumanoni wAreyopagu* ni aaweerela: “Atthu a wAtheena! Kinoona weera nyuwo munnasivela vancipale ottittimiha miluku,

²³niwoko keettaka musidadenimwanyu kooweha nnenesene icaambulosanyu sa ediini, ni koophwanyatho nipuro na ecaambulo ekina ni yoolempwa ela: WA MULUKU OOHISUWANYEYA. Moone miyo kinoolaleerani Yoowo nyuwo munimulapaanyu muhimusuwelaka.

²⁴Muluku opanke elapo ya vathi ni sootheene siri mwemmo, ti Apwiya a wiirimu ni a elapo ya vathi, ni Owo khammaka impa soopakiwa ni atthu.

²⁵Owo khanrumeeliwa ni matata a atthu ntoko ahaawelaka etthu, niwoko Owo muneenaawe omvaha okumi, omumula ni sootheene wa ootheene.

²⁶Muluku aampanke mutthu mmoha paahi, ni wa yoowo sookhumelela miloko sootheene sa atthu sinkhala mweelaponi yootheene. Aari Yoowo akhalihale ihuhu ni mapuro miloko saatthuneyaaya omaka.

²⁷Aapaka yeeyo weera emwaasaase naamwi waatthuneya omwaapaapela, hata ahirakamenle wa khula mutthu a hiyo.

²⁸Vano, mwa Yoowo hiyo nri ni okumi, nineetta ni ninkhala, ntoko yeenraaya akina a anamaswaanyu ooreera: “Hiyotho nri a ekhapiraawe.”

²⁹Nireene hiyo a ekhapira ya Muluku, nihuupuwele weera Muluku onlikana ni icaambulo sa iyuuma soorikaxa, naari sa maluku, soopakiwa ni eruso, naari soowuupuwela sa mutthu.

³⁰Ehuhu evinre Muluku khaalikelenle ohisuwela iwo, mene vano onlamulela weera mmapuroni moothemwene, ootheene erukunxe mirimasaya.

³¹Aakhaliha nihuku nimoha Owo aneeraawe athorihe elapo ni ekhaikhai mwa Mulopwana omuthanlalaawe. Ni ohoonihera yeeyo wa omutthu wootheene, woomuvenyereriha Mulopwana Owo.”

³²Yiiwaka sa ovenyerera wa anamakhwa akina yaamveiha, ni akinatho yaaheera: “Mwaha wa yeeyo, nnimwiiwe ehuhu ekina.”

³³Mwa yeeyo Pawulo aahiivenxa variyariwaya.

³⁴Alopwana akina yaathukumana ni yoowo ni yaaroromela. Variyariwaya aari Diyonisiyo, a wAreyopagu*, nitho muthiyana mmoha iitthaniwa Damari, ni akina vamoha ni yaawo.