Read Makhuwa-Shirima Miteko 18 Bible Online

Miteko 18 - Makhuwa-Shirima bible

Miteko 18

¹Vahoolowaya, Pawulo aavenya wAtheena arowaka oKorinto.

²Weiwo aamukumanano muYuda mmoha iitthaniwa Akila, aayariwe oPonto, aaphiyale vaanaanoru akhumaka wItaliya ni amwaarawe Prisila, niwoko Klawudiyu aalamula weera aYuda ootheene evenye oRooma. Pawulo aarowa

³othukumanano yaawo, ni woonaka weera yaarino muteko mmoharu yoowo wa Akila, aakhala ni yaawo avaraka muteko niwoko yaari anamapaka a iheema.

⁴eSaabadu ti eSaabadu owo annaavaanyiha muSinagogani* ni annaaviriyela aYuda ni aGrego.

⁵Aaphiyalaawe Sila ni Timootheyo oMasedoniya, Pawulo aahiixinnyerera ni nthiti weera alaleiye, aakhalelaka onamoona aYuda weera Yeesu aari Kristu.

⁶Emuvirikanyihaka ni emuruwanaka woohihiyerera, aatatha soowarasawe ni aaweerela: “Ephomaanyu emorele mmurumwanyu! Kohoonyawani. Okhuma vaanaano va mpaka ohoolo, kinkela wa amalapo.”

⁷Vano Pawulo aavenya muSinagogani* ni aarowa vaate wa Tisiyu Yustu, aamoova Muluku ni aamanke mukerekhere wa eSinagoga*.

⁸Krispo, mutokweene a eSinagoga*, aahaaroromela Apwiya vamoha ni ootheene yaawo a vaatewawe. Ancipale a aKorinto yaamwiiwa yaaroromela ni yaapatisiwa.

⁹Ohiyu mmoha Apwiya yaahuuluma ni Pawulo mmooneloni, yeeraka: “Muhoove, mupwaherere wuuluma ni muhiitthuuwe,

¹⁰niwoko kiri ni nyuwo ni khaawo aneera oopakeeni yoonanara, naari oovulaliheni, niwoko kookhalano atthu ancipale musidadeni ela.”

¹¹Hiiho Pawulo aakhala weiwe ehuhu ya eyaakha emoha ni eriyari ya eyaakha, axuttihaka masu a Muluku.

¹²Areene Galiyo guvernadori a wAkhaya, aYuda ootheene ni murima mmoha yaamvaanelela Pawulo ni yaamukuxa emuronghaka nipuro noowuuluma milattu, emootheraka moota ola:

¹³“Mulopwana ola omviriyela muloko wa atthu omulapa Muluku moota woovirikana ni nlamulonahu.”

¹⁴Pawulo eeraka uulume, Galiyo aaweerela aYuda: “Nyuwo aYuda mwaamoothera sa etthu yootakhala, naari yoonanaraxa, kaamuwiiwani,

¹⁵vaheera yeenre ekhalaka etthu ya masu ni masina a nlamulonanyu asineenaanyu, muulume mulattu nyuwo asineenaanyu. Nkinkhala mphuki a itthusene seiya.”

¹⁶Aalamulela weera yoomoliwe vanipuroni noowuuluma milattu nne.

¹⁷Vano ootheene yaamvara Sostene, mutokweene a eSinagoga*, ni yaammana ohoolo wa nipuro nne. Vaheera Galiyo khaapwatthenle etthu.

¹⁸Pawulo aakhala oKorinto ehuhu ekina, ni vahoolowaya, aahaalaxera axunna ni aalapuwa munikulani arowaka oSiriya ahooliwaka ni Prisila ni Akila. Ahinaaye ovolowa munikulani, aamettha toko mayihaawe oKenkhreya niwoko na nlipelo aapankaawe.

¹⁹Yaaphiya wEfeso weiwo Pawulo aamuhiyalaawe Prisila ni Akila. Wa soothesene, owo avolowaka muSinagogani*, aapacera wuuluma ni aYuda.

²⁰Awo yaamvekela weera nlelo akhale, mene khaatthunne.

²¹Vano, apwahaka, aahaaroromeliha eeraka: “Muluku atthuna, nkihokoleele.” Vahoolo wa yeeyo, aavolowa munikulani ni aavenya wEfeso.

²²Aphiyaka oSesareya, aarowa okerexa weera uulumihe ni vahoolowaya aarowa wAntiyokiya.

²³Eviraka ehuhu ekina wAntiyokiya, Pawulo aavenya iwe ni aaheetteetta elapo yootheene ya oGalasiya ni ya oFrisiya, aalipiheraka oohusera ootheene.

²⁴Yeereiyaka hiiho, muYuda mmoha iitthaniwa Apolo aayariwe wAlesandriya aaphiya wEfeso. Owo aari namalaleiya a nnene ni oowera mwa Yoolempwa*.

²⁵Aaxuttihiwa mwa ephiro ya Apwiya, ni aahuuluma ni aaxuttiha ni nthiti ntokotoko moota wa nnenesene sa Yeesu, naamwi asuwelaka paahi opatiso wa Yohaane.

²⁶Aapacera wuuluma muSinagogani* ni murima woolipa. Prisila ni Akila emwiiwakaru, yaamulattula weera arowe owannyaya, ni yaamuthalihera ephiro ya Muluku moota wooreerela.

²⁷Atthunaka orowa wAkhaya, axunna yaamulipihera ni yaahaalepela oohusera weera emwaakhelele. Aphiyakaru, aahaakhavihera vancipale yaawo yaaroromenle niwoko na mahala a Muluku,

²⁸niwoko aahaavirikanyiha nnenesene aYuda mwaatthuni, ooniheraxaka ni Yoolempwa* weera Yeesu ti Kristu.