Read Makhuwa-Shirima Miteko 20 Bible Online

Miteko 20 - Makhuwa-Shirima bible

Miteko 20

¹Omalaka onyakulihana, Pawulo aarumiha owiithana oohusera, ni vahoolo wa olipiha mirimasaya, aahaalaxera ni aarowa mpaka oMasedoniya.

²Aaheetteetta elapo ele alipihaka mirima sa axunna ni masu mancipale, ni ommaleloni aaphiya oGresiya,

³aakhanlaawewo nyeeri miraru. Owo eeraka avolowe munikulani weera arowe oSiriya, aYuda yaamvaanelela yoowo, tivawo aalakenlaawe ohokoleela oMasedoniya,

⁴ahooliwaka ni Sopatro, mwaana a Piro a oBereya; Aristarko ni Sekunda ooweeli a oTesalonika; Gaiyu a oDerbe; Timootheyo nitho Tikhiko ni Trofimo a elapo ya wAsiya.

⁵Asilopwana awo yaahoolela ni yaaniweherera oTrowade.

⁶Naapwaha munikulani oFilipi vahoolo wa efesta ya ipaawu soohikhalano eferementu, ni eviraka mahuku mathanu, naathukumana ni yaawo oTrowade, naaraahuwo mahuku mathannameeli.

⁷Nihuku noopacera na esimana, naathukumana weera ece, ni Pawulo aahuuluma ni atthu. Atthunaka opwaha oxaawaya, owo aapwaherera wuuluma mpaka ohiyu eriyari.

⁸Waakhala onyaari mwincipale mukwartuni musulu naathukumannaahu.

⁹Mmiravo mmoha, iitthaniwa Eutiko, aakilaathiye vaxanelani, aakona vancipale ehuhu ya masu mancipale a Pawulo. Awiniweene ni ikhove, aamorela vathi okhuma mpatta wanaararu wa vasulu. Yaamvenxalaaya, aari ookhweene.

¹⁰Pawulo aakhuruwa, anamuuramela mmiravo ni anamukhubaara eeraka: “Muhituthuwe, niwoko ori ni okumi.”

¹¹Vano aawelatho, anakawanya epaawu ni anakhuura. Vahoolowaya aapwaherera wuuluma mpaka oxa, ni aapwaha.

¹²Yaamukuxa mmiravo mukumi ni yaalipiheriwa murima vancipale.

¹³Wa hiyo, naavolowa munikulani ni naalapuwa nirowaka wAso, weiwo neeraahu namwaakhelele Pawulo munikulani. Owo aalamula hiiho, atthunaka weetta vathi.

¹⁴Aniphwanyakaru, hiyo naamwaakhelela munikulani ni naapwaherera mpaka oMitilene.

¹⁵Naalapuwa, ni oxaawaya naaphiya vakhiviru wa oKhiyo, oxaawaya naalapuwa nirowaka oSamos, ni oxaawayatho naaphiya oMileto.

¹⁶Vano Pawulo aalakela osemba wEfeso weera ahilekele elapo ya wAsiya, niwoko aakuveelaxa ophiya oYerusaleemu wawereya nihinaaye ophiyera nihuku na Pentekoste*.

¹⁷Areene oMileto, Pawulo aarumiha owiitthana asitokweene a ekerexa ya wEfeso.

¹⁸Ephiyakaru, owo aaweerela: “Moosuwela moota kaakhalaaka ehuhu yootheene miyo kaaraaka vamoha ni nyuwo, okhuma nihuku noopacera miyo kaaphiyalaaka elapo ya wAsiya.

¹⁹Kaahaarumeela Apwiya ngwiiyevihani ni maithori, naamwi keereriwaka vancipale ni soovaanela sa aYuda.

²⁰Moosuwela weera nkaahovela woolaleerani yootheene yeeyo yaari ya mpuhaanyu, kaahooxuttihanitho sootheene mwaatthuni ni empa empa.

²¹Kaahaakhalela onamoona aYuda nitho aGrego weera ontthuneya awo erukunxele murimaaya wa Muluku ni eroromele mwa Apwiyaahu Yeesu.

²²Vano, keettihiwa ni Munepa, miyo kinrowa oYerusaleemu, kihisuwelaka etthu eneera yakikhumelele weiwo,

²³ohikhanle paahi weera musidadeni sootheene, Munepa Wootteela onnakooperera weera otthukiwa ni soohooxa sinookiweherera.

²⁴Wa soothesene, nkimpwatthela, naari nkinoonelamo okumaaka etthu yoottittimeheyaxa wa miyo mwaneenaaka. Yoohaawelaaka emoharu eri omaliha otthimakawaka ni okwanihera muteko kaakhenlaaka wa Apwiya Yeesu, eyo tiiyo okhalela onamoona sa masu ooreeraxa a mahala a Muluku.

²⁵Vano koosuwela weera khaawo a nyuwo miyo koolaleeraakani omwene wa Muluku onrowa woona ekhovaaka emaara ekina.

²⁶Tivawo miyo kinooleelaakani olelo vaava weera nkinkhala ni milattu mukina a nyuwo ariheya,

²⁷niwoko kohoolaleerani otthuna wootheene wa Muluku.

²⁸Mwiipasoope nyuwo asineenaanyu ni muhuwo mwa yoowo Munepa Wootteela owiikaathenraayani ntoko asitokweene ankosoopa*, weera mukukhulele ekerexa ya Muluku Owo othumalaawe ni ephomaawe muneenaawe.

²⁹Koosuwela weera vahoolo wa opwahawaka, nyiici soolumaxa nsivolowe variyariwanyu ni khasirwa suurela muhuwo.

³⁰Variyariwanyu eniikhumelele alopwana eneera ekhune ekhaikhai weera yaalokotthe oohusera ni yaatthare yaawo.

³¹Tivawo, ngwehawehe. Muupuwelele weera wa iyaakha tthaaru nkinahiyerere omooperera ni maithori ohiyu ni othana khula mutthu a nyuwo.

³²Vano miyo kinoovahererani wa Muluku ni wa masu a mahalaawe. Masu ala anoowera woopuhihani ni woovahani yoohiyeriwa* vamoha ni ootheene yaawo ari ootteelihiwa.

³³Nkaahaawela iyuuma soorikaxa, naari ikuwo sa mutthu mmoha.

³⁴Nyuwo asineenaanyu moosuwela weera matataaka ala yaawina soohaawelasaka ni soohaawela sa asikhwaaka.

³⁵Moovaranimwaka muteko woovihaxa, kaawooniherani weera ontthuneya waakhavihera oohilipa ni muteko woovihaxa, nuupuwelelaka masu a Apwiya Yeesu mwaneenaaya yeenre: ‘Fataari ovaha, ohikhanle waakhela.’”

³⁶Amalihaka ohima yeeyo, aakokhora vamoha ni ootheene ni aavekela.

³⁷Ootheene yaahiinla vancipale, ni emukhubaaraka, yaamubeeca.

³⁸Yaathananihale vancipale yaari masu eenraawe weera khamurwa moonatho ekhovaaka. Vano yaamuhoola mpaka munikulani.