Read Makhuwa-Shirima Miteko 26 Bible Online

Miteko 26 - Makhuwa-Shirima bible

Miteko 26

¹Vano Agripa aamweerela Pawulo:“Nyuwo munootthuniheriwa wuuluma ni wiixaakihawanyu.” Vahoolowaya Pawulo aapaka eneneero ni ntata, anapacera wixaakihawawe eeraka:

²“Mwene Agripa, koohakalala weera ti ohoolowanyu kingweraaka wiixaakiha olelo soowootheriwasaka sootheene sa aYuda.

³Koohakalalatho weera nyuwo moosuwela nnenesene ikhovelelo sa aYuda ni milattusaya. Tivawo kinoovekelani weera mukiiwe ni ovilela.

⁴aYuda ootheene ansuwela moota kikhanlaaka okhuma enamwanaaka, elapo kiyariwaaka nitho oYerusaleemu.

⁵Awo aakisuwela okhuma khalayi ni yatthuna, anoowera okhalela onamoona weera, ntoko muFarisi*, kaatthara makhalelo a mpatta wa ediinaahu orino malamulo oolipaxa.

⁶Vano kinthorihiwa niwoko na nroromelonaka mwa yeeyo Muluku aaroromelihalaawe makholowaahu.

⁷Ela ti yoororomelihiwa singwehereraaya ipuumbasahu muloko ni piili weera ekwaniheriwe, simulapaka ni nthiti Muluku ohiyu ni othana. Ti niwoko na nroromelo nna, amwene, kinootheriwaaka ni aYuda.

⁸Heeni nyuwo muhingweraanyu ororomela weera Muluku onaavenyereriha akhwiiye?

⁹Miyotho kaaviriyeliwa weera waatthuneya opaka sootheene singwereya weera kiphwate Nsina na Yeesu a oNasarete.

¹⁰Ti yeeyo kaapankaaka nnenesene oYerusaleemu. Kaahaavonyera mukaliposo ootteela ancipale ni ikuru sa ahooleli a asaserdoti*, ni yaathoriheliwaaya okhwa, miyotho kaahaakhulela yeeyo.

¹¹Imaara sincipale kannarowa muSinagogani* weera kaattaruxe, ni keerera waanyesereriha oveiha. Waakhalelawaka isara yaawo, kannarowa isidade sa ilapo sikina weera kaattharatthare.

¹²Mukwaha mmoha keera kirowaka oDamasku ni ikuru ni otthuniheriwa wa ahooleli a asaserdoti*.

¹³Wookwanaka nsuwa vamuru, amwene, kireene mphironi, kaahoona mukhwipimwaka ni mukhwipi wa asikhwaaka waara omoha wa wiirimu, waanre woopwaha nsuwa.

¹⁴Ootheene yaamorela vathi ni kaahiiwa nsu naakeerela vaHeberi: ‘Sawuli, Sawuli, heeni nyuwo munkisoondaanyu? Mungwana vasiiyoniwene ni eniyoorweeleni yoovoreiya paahi.’

¹⁵Vano kaakoha: ‘Taani Nyuwo, Apwiya?’ Apwiya yaakaakhula: ‘Ti Miyo, Yeesu, mwa Yoowo munimuttharattharaanyu.

¹⁶Vano muvenye ni mweemele. Miyo kohiixoonihera wa nyuwo weera kookhaliheni murumeiyi ni namoona a seiyo nyuwo moonnaanyu sa Miyo ni seiyo kineeraaka kiwoonihereni.

¹⁷Miyo nkoovuluxeni wa mulokwaanyu muneenaanyu ni wa amalapo, wa yaawo Miyo kinimoorumihani

¹⁸weera mwahule maithwaaya ni mwaatatuxe wa epiphi, waara. Aani, kinimoorumihani wa yaawo weera mwaavuluxe wa ikuru sa Satana ni weera emutthare Muluku, ni hiiho yaakhele elevelelo ya sootthekasaya ni nipuro vamoha ni yaawo atteelihiwe niwoko na nroromelo mwa Miyo.’

¹⁹Hiiho, mwene Agripa, nkaakhanle oohiiwelela moonelo wa wiirimu.

²⁰Woopacera kaahaalaleera yaawo yaari oDamasku; vahoolowaya yaawo yaari oYerusaleemu ni oYudeiya woothewene, nitho wa amalapo, kiweerelaka weera erukunxe murima ni ehokoleele wa Muluku epakaka miteko sinoonihera orukunxawaya murima wa ekhaikhai.

²¹Tivawo aYuda yaakitthunkaaya Mpaani mwa Muluku ni yaaheerera okiiva.

²²Koheetta ni ekhavihero ya Muluku mpaka nihuku na olelo, ni mwaha wa yeeyo kiri va, ni kinnaakhalela onamoona asitokweene nitho asikhaani. Miyo nkinghima etthu ekina, ehikhanle yeeyo maprofeeti ni Moisesi yaahimmaaya weera yaarwa okhumelela:

²³weera Kristu aarwa ohaawa ni areene oopacera ovenyerera mookhwaani, aarwa olaleiya waara wa mulokwaawe muneenaawe ni wa amalapo.”

²⁴Ehuhuweene yeele, Festo aahooceeliha wiixaakiha wa Pawulo, eeraka ni nsu ntokotoko: “Nyuwo Pawulo, munkhwa anepa. Oxutterawanyu wincipale wohooruuhelani anepa!”

²⁵Pawulo aamwaakhula: “Atokweene Festo, miyo nkinkhwa anepa, ni yeeyo kinghimaaka ti ya ekhaikhai ni ya miruku sooreera.

²⁶Amwene ala ansuwela nnenesene itthusene seiya, ni kinoowera waaleela nnenesene. Vekhaikhai, miyo kinuupuwela weera aasuwela soothesene seiya kinghimaaka, niwoko khasikhumelenle wiiphiini.

²⁷Amwene Agripa, munaaroromela maprofeeti? Koosuwela weera aani.”

²⁸Vano Agripa aamweerela Pawulo:“Nyuwo munuupuwela weera mwa ehuhu ekhaani munoowera okiviriyela othatuwa muKristu?”

²⁹Pawulo aamwaakhula: “Hata mwa ehuhu ekhaani, naari yincipale, kinimuvekela Muluku weera khamuhiyono nyuwo paahi, menetho ootheene ankiiwa olelo ethatuwe ntoko miyo, ohiya onyooro ola.”

³⁰Aaheemela mwene, ni guvernadori ni Berenisi vamoha ni yoowo, nitho yaawo yaakilaathiye ni yaawo.

³¹Evenyaka munthukumanoni mwa othoriha, yaaheerelana yaaworu: “Mulopwana ola kheewo opankaawe yoophwanela okhwa, naari okaliposo.”

³²Agripa aamweerela Festo: “Owo ahaamutthunne Seesari, saano ataphuliweene.”