Read Makhuwa-Shirima Miteko 28 Bible Online

Miteko 28 - Makhuwa-Shirima bible

Miteko 28

¹Niphiyakaru vatthayani, naahoona weera ecirumba ele yiitthaniwa oMalta.

²Atthu yamanke ecirumbeene yeele yaanaakhelela hiyo ni murima wooreeraxa. Yaakukha mooro ni yaanaakhelela nnene hiyo ootheene, niwoko yeera erupaka epula ni oriiraka.

³Pawulo aathukumanya nivisi nimoha na ikhuuni ni iikaathiki vayikho, enowa emoha, etthawaka oviha, yaamuluma ntatanawe.

⁴Yoonaka atthu yamanke vacirumbani enowa elumaka ntata na Pawulo, yaaheerelana: “Vekhaikhai, mulopwana ola ti namwiiva, niwoko oopowakaru mphareiyani, nthorihelo khannimutthunihera okhala ni okumi.”

⁵Pawulotho, atathelaka enowa vayikho, khaahaangwe naari vakhaani.

⁶Wa soothesene, awo yaaweherera weera ntatanawe ninoopacera wiipa, naari onoomora woowaakuveya ookhweene. Ewehererakatho vancipale, ni yoonaka weera kheewo etthu yoonanara yaamukhumelela, yaahuupuwelatho weera owo aari muluku mmoha.

⁷Vakhiviru wa vale waari vaate wa mutokweene a ecirumba, nsinanawe Publiyo. Owo aaniitthana weera nikhale owannyawe, ni wa mahuku mararu aanaakhelela ni murima wooreera ni aanivaha nipuro.

⁸Atithawe yaamvoreiwa yuummaathiki, ehaawaka ni oviha wa erutthu ni eretta ya mmirimani. Pawulo aavolowa weera awoone, ni amalihaka ovekela, aawiikaathera matata ni aahaalamiha.

⁹Ekhumelelaka yeeyo, aretta akina a ecirumba yaahoorwa ni yaalamihiwa.

¹⁰Awo yaanittittimiha vancipale, ni neeraka nipwahe, yaanivaha seiyo naahaawelaahu.

¹¹Siviraka nyeeri miraru, naawela nikula naakhala ehuhu yootheene ya mulaala vacirumbani ele. Naari nikula na wAlesandriya, naarino eneneero ya Diyoskuri.

¹²Neemelaka oSirakusa, naakhalawo mahuku mararu.

¹³Vaavaale naapwaha ni naaphiya oRegiyo. Oxaawaya, yoopaka epheyo okhuma ohitto, naapwaherera niphiyaka oPotiyoli nihuku nanaaveeli.

¹⁴Weiwo naahaaphwanya axunna akina yaaniitthanne weera nikhale vamoha ni yaawo esimaana emoha. Ni hiiho naaphiya oRooma.

¹⁵Axunna a weiwe yaahiiwa yeeriwaka weera neera niphiyaka, ni yaahoowa ekhumaka mpaka omerekadu wa Apiyo ni mpaka Impa Tthaaru sa Aletto weera enikumanane. Awoonaka yaawo Pawulo, aamutthapela Muluku ni aakhala ni murima woolipa.

¹⁶Niphiyakaru oRooma, Pawulo aatthuniheriwa omaka empaawe meekhaawe, alipeleliwaka ni nakhotto mmoha.

¹⁷Eviraka mahuku mararu, owo aawiitthana ahooleli a aYuda. Awo yaathukumanaaya, Pawulo aaweerela: “Axunnaka, kaari mweeraru kihipanke etthu yoonanara ni mulokwaahu, naari ni ikhovelelo sa makholowaahu, kaatthukiwa oYerusaleemu ni kaavahereriwa wa aRooma.

¹⁸Awo yaakikohakoha ni yaatthuna okitaphula, niwoko nkaarino nthowa na etthu yoonanara yaaphwanela okhwa.

¹⁹Wa soothesene, aYuda, ehitthunaka okitaphula, kaanyesereriwa otthuna ophiya ohoolo wa Seesari, kaari mweeraru kihikhalanne yoowootheriwa ekina ni mulokwaaka.

²⁰Niwoko na yeeyo kaavekela weera kiwooneeni ni kuulume ni nyuwo. Miyo kootthukiwa ni onyooro ola niwoko na nroromelo na aYixrayeli.

²¹Awo yaamwaakhula: “Khanaakhenle naari ekaratta emoha ya oYudeiya, ni khaawo munna mmoha aarwiiye akhumakawo aahimale, hoye hoye aathalihale etthu yoonanara ya nyuwo.

²²Wa soothesene, nintthuna wiiwa wa nyuwo yeeyo munuupuwelaanyu, niwoko noosuwela weera mmapuroni moothemwene aakhala atthu anuulumela nihusiho nna.”

²³Hiiho yaahiiwanana omukumanano Pawulo nihuku naalaihaniwe, ni nihuku nne yaaphiya aYuda ancipale nipuro nenne owo aaraawe. Okhuma ohinaxe mpaka ohiyu owo aahaathalihera ni aahaakhalela onamoona wa omwene wa Muluku, atthunaka waaviriyela mwaha wa Yeesu avarelaka muteko nlamulo na Moisesi ni maprofeeti.

²⁴Akina yaaviriyeliwa ni yeeyo owo aahimmaawe, mene akinatho khayaaroromenle.

²⁵Waakhumelela ohiiwanana ni yaalaxera niwoko na masu ookisera ala Pawulo aahimalaawe: “Munepa Wootteela waawuulumela ekhaikhai makholowaanyu wuulumaka ni eyano ya mprofeeti Yesaya:

²⁶‘Murowe wa muloko ola ni mweere: ‘Hata mwiiwaka, khamurwa mwiiwexexa; hata moonaka, khamurwa musuwela etthu.

²⁷Vekhaikhai, murima wa muloko ola woothatuwa woowuuma. Waattiyela maaruwaaya ni waaputiha maithwaaya weera ohoone, naari ohiiwe, hata ohiiwexexe, hata ohirukunxe murima weera Miyo kaalamihe.’

²⁸Tivawo kintthunaaka weera musuwele nnenesene weera ovuluxa wu wa Muluku woorumiheliwa wa amalapo; awo eniyiiwe!”

³⁰Wa iyaakha piili sookwanelasene Pawulo aakhala vaate owo aalivelaawe khula mweeri, ni aawaakhela ootheene yaarowa omoona.

³¹Annalaleiya omwene wa Muluku ni annaxuttiha sa Apwiya Yeesu Kristu ni murima woolipa, ahooceelihiwaka naari ni etthu emoha.