Read Makhuwa-Shirima Miteko 3 Bible Online

Miteko 3 - Makhuwa-Shirima bible

Miteko 3

¹Nihuku nimoha Pedru ni Yohaane yaarowa Empa ya Muluku ehuhu ya nivekelo, eyo tiiyo ehuhu ya oxekuwa.

²Vano, aakhala mutthu mmoha aarakanle eyareliwaawe, aaronghiwa vaavaale khula nihuku ni iikaathiwaka vamulako wa Empa ya Muluku wiitthaniwa Wooreeraxa, weera aavekele sooveka yaawo yaavolowamo.

³Oonaka weera Pedru ni Yohaane yeera evolowe, aahaavekela sooveka.

⁴Pedru ni Yohaane yaangwehexexa nnenesene, ni vano Pedru aamweerela: “Muniwehe hiyo.”

⁵Mulopwana ole aahaawehexexa nnenesene, awehereraka wa yaawo waakhela etthu.

⁶Pedru aamweerela: “Nkinono musurukhu, mene yeeyo kiraakano, kinimoovahani. Mwa Nsina na Yeesu Kristu oNasarete, mweette.”

⁷Amvarelaka ni ntata na moono mulopwana, aamukhavihera weemela, ni woowaakuveya inaawo ni itthottopwasawe saalipa.

⁸Vano aaheemela, anatupha, anapacera weetta. Vahoolowaya aavolowa ni yaawo Mpaani mwa Muluku, eettaka, atuphaka ni amuttottopelaka Muluku.

⁹Omoonaka muloko wootheene owo eettaka ni amuttottopelaka Muluku,

¹⁰waasuwela weera ti yoole mulopwana aakhovelela ovekela sooveka, akilaatheene vamulako wa Empa ya Muluku wiitthaniwa Wooreeraxa. Ootheene yaatikhinaxa vancipale wa yeeyo yaamukhumelenle.

¹¹Amvaraka namavekela Pedru ni Yohaane, muloko wootheene waatikhina ni waahaatthimakela yaawo mpaka nipuro niitthaniwa mulako wa Salomoni.

¹²Oonaka yeeyo, Pedru aaweerela: “aYixrayeli, heeni ela enootikhinihaayani? Heeni nyuwo munniwehexexaanyu hiyo ntoko hiyo niwenre omweettiha mulopwana ola ni ikurusahu asineenaahu, naari ni murimaahu wa omuluku?

¹³Muluku a Abrahaamu, Isaaki ni Yakobe, Muluku a makholowaahu, aamvuwiha murumeiyaawe Yeesu. Ti nyuwo mwaamvaherenre weera akhwe ni ti nyuwo mwaamukhoontte vamaithoni wa Pilatu, naamwi owo alakelaka omutaphula Yeesu.

¹⁴Nyuwo mwaamukhootta Ootteela ni Oororomeleya, ni mwaamvekela weera mutaphuleliwe namwiiva.

¹⁵Nyuwo mwaamwiiva Mwaneene a okumi, mene Muluku aamvenyereriha mookhwaani. Hiyo nri anamoona a yeeyo.

¹⁶Ti niwoko na nroromelo mwa Nsina na Yeesu, Owo omulamihalaawe mulopwana ola nyuwo mummoonaanyu ni munsuwenlaanyu. Nroromelo ninrwa wa Yoowo noomvaha ola mpuha wookwanela, ntoko ootheene mungweraanyu woona.

¹⁷Axunnaka, koosuwela weera nyuwo vamoha ni asitokweenaanyu mwaapanke yeeyo niwoko na ohisuwelawanyu.

¹⁸Waaritho hiiho Muluku okwanihenraawe yeeyo aahimalaawe khalayi ni iyano sa maprofeeti ootheene, yeeraka weera Kristwaawe eera ahaawe.

¹⁹Vano, murukunxe mirimasanyu ni muhokoleele wa Muluku weera sootthekasanyu sikhale soomalihiwa,

²⁰weera ephiye ehuhu ya wiitthuuwa, nitho weera Owo amurumihe Yoowo mukhaliheriwaanyu Kristu, eyo tiiyo Yeesu.

²¹Ontthuneya weera Owo akhale wiirimu, mpaka ophiya ehuhu Muluku aneeraawe areherere itthu sootheene, ntoko aahimalaawe khalayi ni iyano sa maprofeeti ootteela.

²²Vano Moisesi aaheera: ‘Apwiya Mulukwaanyu animookhaliherani variyariwanyu mprofeeti ntoko miyo. Mmwiiwe sootheene seiyo Owo aneeraawe ooleeleni.

²³Yoowo aneera ahimwiiwe Mprofeeti Owo, anaavenxiwe variyari wa mulokwaawe.’

²⁴Mwa yeeyo maprofeeti ootheene okhuma Samuweli mpaka ohoolo, khula mutthu a yaawo, yaahima sa mahuku ala.

²⁵Ni nyuwo muri anamwane a maprofeeti ni a wiiraana Muluku aapankaawe ni makholowaanyu. Owo aamweerela Abrahaamu: ‘Niwoko na ekhapiraanyu miloko sootheene sa elapo ya vathi nsireelihiwe.’

²⁶Muluku amvenyererihaleene murumeiyaawe, ohoorumihelani toko nyuwo weera ooreeliheni oorukunxakani nyuwo ootheene wa sootakhalasanyu.”