Read Makhuwa-Shirima Miteko 4 Bible Online

Miteko 4 - Makhuwa-Shirima bible

Miteko 4

¹Asaserdoti*, muhooleli a anakhotto a Empa ya Muluku ni aSaduki* yaamwaattamelaaya Pedru ni Yohaane, awo yeera yuulumaka ni muloko wa atthu.

²Awo yaanyoonyiwa vancipale niwoko arummwa yaaxuttiha muloko wa atthu ni yaalaleiya weera mwa Yeesu wookhala ovenyererihiwa wa akhwiiye.

³Yaamvara Pedru ni Yohaane ni, weenre wiilaka, yaahaawalela okaliposo mpaka oxaawaya.

⁴Ancipale a yaawo yiiwale mutthenga yaaroromela. Vano asilopwana oororomela ootheene yaari macira miloko mithanu.

⁵Oxaawaya ahooleli a aYuda, asitokweene ni anamawera a nlamulo* yaathukumana oYerusaleemu.

⁶Yaari iwe Hana, mutokweenexa a asaserdoti*, nitho Kayafasi, Yohaane, Alesandere ni ootheene akina yaari a emusi ya mutokweenexa a asaserdoti*.

⁷Aalamulelakaru eeli awo weemela, awo yaapacera waakohakoha eeli ale yeeraka: “Ni ikuru heeni, hoye hoye mwa nsina nawani nyuwo mumpakaanyu yeeyo?”

⁸Vano Pedru, asareiyeene Munepa Wootteela, aaweerela: “Ahooleli a aYuda ni asitokweene a muloko!

⁹Woonaka weera olelo hiyo nohiitthaniwa weera naakhule mwaha wa muteko wooreera woonihereiye wa oorakala, nikohakohiwaka mwaha wa moota owo olamihingwaawe,

¹⁰musuwele nnenesene yeeyo, asipwiiya ni muloko wootheene wa oYixrayeli: Mulopwana owo ori vawo oolamihiwa ohoolo wa asipwiiya niwoko na Nsina na Yeesu Kristu a oNasarete, mwa Yoowo nyuwo mwaamuthomeiyaanyu, mene Muluku omvenyereringhaawe mookhwaani.

¹¹Yeesu Owo ti ‘nluku nyuwo anamateka mwaakhoonttaanyu, ni naathatungwe nluku nootthuneyaxa.’

¹²Khoowowo ovuluxiwa mwa mukina. Khaniwowo nsina nikina nivahiwe wa atthu mwa nenno ontthuneya weera ninivuluxe.”

¹³Yoonaka olipa murima wa Pedru ni Yohaane, ni esuwelaka weera khayaahiyono atthu oolepiweene, mene oohixuttihiwa, yaatikhina, ni yaasuwela weera awo yaakhala vamoha ni Yeesu.

¹⁴Ni emoonaka iwe ni yaawo mulopwana oolamihiwa, khayaawenre ohima etthu yoowoothera.

¹⁵Hiiho yaahaalamulela okhumela vaate wa eSineedriyu*, ni awo yaapacera wiiwanana yaaworu,

¹⁶yeeraka: “Nneereke hai ni asilopwana awo? Ootheene ankhala oYerusaleemu ansuwela weera awo aapaka yootikhiniha yoowooneya, ni hiyo khaningwera okhootta.

¹⁷Wa soothesene, weera ohiweereiye wiiwanyeyaxa variyari wa muloko, ontthuneya weera niwooperere asilopwana awo weera ehaaleele akina mwa Nsina nna.”

¹⁸Vano, ewiitthanaka veeli, yaahaalamulela weera ehileele, naari ehixuttihe mwa Nsina na Yeesu.

¹⁹Pedrutho ni Yohaane yaawaakhula: “Muupuwele nnenesene asineenaanyu, asipwiiya, weera waari wooreera vamaithoni wa Muluku wiiwelela yeeyo nyuwo muntthunaanyu, ohikhanle omwiiwelela Muluku.

²⁰Khaningwera ohiya wuuluma sa seiyo noonnaahu ni niiwalaahu.”

²¹Vahoolo wa soowoopopiha sikina, awo yaahaahiya erowaka. Khayaaphwannye moota woowaattaruxa, niwoko atthu ootheene yaamutthapela Muluku wa yeeyo yaakhumelenle.

²²Vano, mulopwana aalamihiwe moota wootikhiniheya, aarino iyaakha soopwaha miloko mixexe.

²³Ataphuliwakaru, Pedru ni Yohaane yaahokoleela wa asikhwaaya ni yaahaathalihera sootheene ahooleli a asaserdoti* ni asitokweene yaaleenlaaya.

²⁴Yiiwaka yeeyo, ootheene yaamvekela Muluku yeeraka: “Muluku onlamula soothesene, Nyuwo moopaka wiirimu, elapo ya vathi, ephareiya ni sootheene siri mwemmo!

²⁵Nyuwo mwaahuuluma mwa Munepa Wootteela ni eyano ya murumeiyaanyu, atithihu Davide, mweeraka: ‘Heeni anyoonyiwaaya amalapo ni simvaanelaaya sa siiyo miloko sa atthu?

²⁶Mamwene a elapo ya vathi animweemela, ni asitokweene anoothukumana weera yiittane ni Apwiya ni Kristwaaya.’

²⁷Mwa yeeyo, Herodi ni Ponto Pilatu yaathukumana vamoha ni amalapo ni muloko wa aYixrayeli musidadeni yeela, weera emvaanelele Yeesu, mwa Yoowo munttikitthenlaanyu.

²⁸Awo yaapaka yeeyo Nyuwo mwaalakenlaanyu mwa ikurusanyu ni otthunawanyu khalayi weera ekhumelele.

²⁹Vano, Apwiya, muupuwele soowoopopihasaya, ni mwaawerihe arumeiyaanyu weera elaleiye maswaanyu ni murima woolipa.

³⁰Mookole ntatananyu weera mulamihe ni mupake ineneero ni sootikhiniha muNsinani na Murumeiyaanyu Ootteela, Yeesu.”

³¹Amalihaka ovekela, naathukumela nipuru nne yaathukumannaaya. Ootheene yaasareya ni Munepa Wootteela ni yaalaleiya masu a Muluku ni murima woolipa.

³²Ootheene a atthu ancipale yaaroromenle, yaakhala oowiiwananeene, ni yaarino muupuwelo mmoha ni murima mmoha. Khaawo aarino sooreelasawe mwaneenaawe yoowo paahi, mene yaakawana sootheene yaarinaaya.

³³Arummwa yannapwaherera ni ikuru sitokotoko okhalela onamoona mwaha wa ovenyerera wa Apwiya Yeesu, ni mahala matokweene yaari ni yaawo ootheene.

³⁴Khayaawowo atthu oohaawa variyariwaya, niwoko yaawo yaarino imatta, hoye hoye impa yaathumiha, yaaruuha musurukhu wa yoothumiha

³⁵ni yaahiikaathi vanaawoni sa arummwa, enakawana ntoko yeeyo mutthu aahaawelaawe.

³⁶Yoseefe, muLeevi aayariwe oKipro, yoowo arummwa, yaamvanghaaya nsinanawe Barnaba (eyo tiiyo mwaana a nipempeso),

³⁷aathumiha ematta emoha aarinaawe, anaruuha musurukhu ni aahiikaathi vanaawoni sa arummwa.