Read Makhuwa-Shirima Miteko 6 Bible Online

Miteko 6 - Makhuwa-Shirima bible

Miteko 6

¹Mahukweene yaale, waandyeerereyaka waatta wa oohusera, aYuda yuulumale vaGrego variyariwaya yaahaattaandawula yaale yuulumale vaHeberi, niwoko asinaamukhwelaaya yannattiwaliwa mwa sookhaviherana sa khula nihuku.

²Tivawo muloko neeli yaathukumanyinghaaya oohusera ootheene eweerelaka: “Kheehiyono etthu yooreera weera hiyo nihiye masu a Muluku weera nirumeele vameesani.

³Axunna, mwaathanle variyariwanyu asilopwana athanneeli a onamoona wooreera, oosareya ni Munepa ni a miruku. Hiyo ninrowa waakhalihera muteko ola,

⁴ni hiyo nniivaherera ni nthiti mmavekeloni ni mmutekoni wa masu.”

⁵Vano maswaaya yaahaasiveliha atthu ootheene, ni yaamuthanla Stefano, mulopwana oosareya nroromelo ni Munepa Wootteela, ni Filipe, Prokoro, Nikanori, Timoni, Parmena ni Nikolawu, oohusera mmoha a ediini ya aYuda arweelaka wAntiyokiya.

⁶Yaawoonihera asilopwana ale arummwa, mwa yaawo yaahaavekelela ni yaawiikaathera matata.

⁷Hiiho masu a Muluku yaamwareela. Wannasareya woowaakuveya waatta wa oohusera oYerusaleemu, nitho asaserdoti* ancipale yaahiiwelela nroromelo.

⁸Stefano, mulopwana oosareya mahala ni ikuru sa Muluku, annapaka sootikhiniha sitokotoko ni ineneero variyari wa muloko.

⁹Wa soothesene, yaavenya akina a eSinagoga* yiitthaniwa ya Oneethi, eyo tiiyo aYuda a oKireene ni wAlesandriya, vamoha ni aYuda a oSilisiya ni wAsiya. Asilopwaneene yaawo yaapacera ovaanyihana ni Stefano,

¹⁰mene khayaawenre otapanyiha miruku ni Munepa mwa Yoowo owo uulumaawe.

¹¹Vano yaahaasesera akina muxiirini weera ehime: “Noomwiiwa Stefano uulumaka masu oomuveiha Moisesi ni Muluku.”

¹²Ni yeeyo yaasesera muloko, asitokweene ni anamawera a nlamulo*. Emuvaraka Stefano, yaamukuxa emuronghaka oSineedriyuni*.

¹³Weiwo yaahiixoonihera anamoona oolokottha yeeraka: “Mulopwana ola khammaala wuulumela Nipuro Nootteela* nna ni nlamulo.

¹⁴Noomwiiwa eeraka weera Yeesu Owo oNasarete anaaphwate nipuro nna ni anaaceendye ikhovelelo Moisesi aanivanghaawe.”

¹⁵Engwehaka ole, ootheene yaakilaathiye muSineedriyuni* yaahoona weera ekhovaawe yaalikana ni ekhove ya ndyelo.