Read Makhuwa-Shirima Miteko 7 Bible Online

Miteko 7 - Makhuwa-Shirima bible

Miteko 7

¹Mutokweenexa a asaserdoti* aamukoha: “Soowoothera iya ti sa ekhaikhai?”

²Mwa yeeyo owo aahaakhula: “Axunna ni asitiithi, mukiiwe: Muluku oovuwaxa aahiixoonihera wa atithihu Abrahaamu awo ereene nlelo oMesopotamiya, ehinaaye omaka oHara, ni aaweerela:

³‘Muhiye elapwaanyu ni emusaanyu, ni murowe wa elapo Miyo kineeraaka kiwoonihereni.’

⁴Hiiho awo yaavenya elapo ya oKaldeiya ni yaamaka oHara. Vahoolo wa okhwa wa atithaya, Muluku aahaaruuha wa elapo ela mwa yeeyo nyuwo mummakaanyu vaanaano vaava.

⁵Khaavanghe yoohiyeriwa* hata vakhaani mweelaponi ela. Mulukutho aaroromeliha weera Abrahaamu, ni vahoolowawe ekhapiraawetho, eniiphwanye elapo ela, naamwi ehuhuweene yeele ahaakhanleno anamwane.

⁶Vano Muluku aamuleela moota ola: “Ekhapiraanyu eniikhale anamarwa mweelaponi mwa amalapo, ni eniikhalihiwe ipottha ni eniihooxiwe wa iyaakha miloko mixexe.

⁷Kinoottaruxa muloko mwa yoowo ikhapira iyo sineeraaya sirumeele ntoko ipottha, ni vahoolowaya awo eniivenye weiwo ni eniikilape mweelaponimu.

⁸Aamvaha Abrahaamu wiiraana wa wiineliwa. Hiiho aamuyara Isaaki, ni Abrahaamu aamwiinela eviraka mahuku mathannamararu a oyariwawawe. Vahoolowaya Isaaki aamuyara Yakobe ni Yakobe aahaayara asitokweene muloko neeli.

⁹Asitokweene awo emukhalelaka nrima Yoseefe, yaamuthumiha ntoko epottha ya wExipitu. Mulukutho aari ni yoowo,

¹⁰ni aamoopola wa soohooxasawe sootheene, amvahaka Yoseefe mahala ni miruku vamaithoni wa Farawu*, mwene a wExipitu. Hiiho owo aamukhaliha ntoko guvernadori a wExipitu ni a empaawe etokotoko yootheene ya mwene.

¹¹Vahoolowaya yaakhumelela etala wExipitu wootheene ni oKanaani, eruuhaka ohaawa otokotoko, ni makholowaahu khayaaphwanya yooca.

¹²Iiwaka weera yaakhala etrigu wExipitu, Yakobe aahaarumiha makholowaahu wa mukwahaawe woopacera.

¹³Wa mukwaha wanaaveeli, Yoseefe aahaasuweliha weera owo aari munnaya, ni Farawu* aasuwelihiwatho emusaawe Yoseefe.

¹⁴Vahoolowaya, Yoseefe, aahaarumiha omuruuhela atithawe Yakobe ni amusaawe ootheene, woophiya atthu 75.

¹⁵Vano Yakobe aarowa wExipitu, weiwo okhwenlaawewo nitho vahoolowaya makholowaahu.

¹⁶Makhuvaaya yaahokoloxeriwa oSikhemi ni yaavithiwa mmahiyeni Abrahaamu aathumalaawe weiwo ni mutteengo mukina wa anamwane a Emoori oSikhemi.

¹⁷Ekhuveelaka ehuhu Muluku eeraawe akwanihere yoororomelihaawe wa Abrahaamu, aahaandyeerera vancipale, waatta wa mulokwaahu wExipitu.

¹⁸Vano, mwene mukina ahaasuwenle mwaha wa Yoseefe aapacera olamula wExipitu.

¹⁹Owo aavaanelela moota woolokottha mulokwaahu ni aahooxa makholowaahu, anyesererihaka waahiya anamwanaaya ooyariwa vaanaano weera ehikhale ni okumi.

²⁰Ehuhuweene yeele aayariwa Moisesi, mwa yoowo aari ooreeraxa vamaithoni wa Muluku. Wa nyeeri miraru owo aahuwiwa vaate wa atithawe.

²¹Ahiiwakaru, mwaana muthiyana a Farawu* aamukuxa ni aamuhuwa ntoko mwanawe mwaneenaawe.

²²Moisesi aaxuttihiwa ni miruku sootheene sa atthu a wExipitu, ni aari oowera mmasuni ni mmitekonimwawe.

²³Akwanihaka iyaakha miloko mixexe, Moisesi aalakela orowa waaxekura axunneiye aYixrayeli.

²⁴Amoonaka mmoha a yaawo ahasuliwaka ni ngwExipitu mukina, aamwaakiha oohasuliwa ni aamwiinlela ikuhu, amwiivaka ngwExipitu.

²⁵Moisesi aahuupuwela weera axunneiye yeera yiiwexexe weera Muluku eera amvarelaka muteko weera aavuluxe, mene awo khayiiwexenxe.

²⁶Oxaawaya, Moisesi aarowa wa aYixrayeli eeli yaawana, ni aaheerera owiiraaniha, eeraka: ‘Asilopwana, nyuwo muri axunna. Heeni mumvulalihanaanyu?’

²⁷Vano mulopwana aamuhasula mukhwaawe, aamukakha Moisesi ni aamweerela: ‘Taani ookhalihale muhooleli ni mphukaahu?

²⁸Ontthuna okiive ntoko omwiivalaawo ngwExipitu osilo?’

²⁹Iiwaka yeeyo, Moisesi aatthawela oMidiya, weiwo aamakaawe, akhalaka ntoko namarwa, ni aakhalanawo anamwane asilopwana eeli.

³⁰Siviraka iyaakha miloko mixexe, areene owo munikareni vakhiviru wa mwaako Sinayi, aahiixoonihera wa Moisesi ndyelo mmoha mmalumini a niphuwa nivarelaka.

³¹Oonaka yeeyo, aatikhinaxa. Vano, aattamelaka weera awehexexe, aahiiwa nsu na Apwiya neeraka:

³²‘Miyo ti Muluku a makholowaanyu, Muluku a Abrahaamu, Isaaki ni Yakobe.’ Moisesi, athukumelaka ni woova, kheerera oweha.

³³Apwiya yaamweerela: ‘Murule ikwakwaattasanyu, niwoko nipuro nna muraanyu ti nootteela.

³⁴Kaahoona ohaawa wa mulokwaaka wExipitu. Kaahiiwa wiikhupanyerawaya ni kaakhuruwela weera kivuluxe. Ngwe vaanaano va, ni kinimoorumihani ohokoleela wExipitu.’

³⁵Ola ti Moiseseene yoowo aYixrayeli yaamukhoonttaaya ni masu ala: ‘Taani ookhalihale muhooleli ni mphuki?’ Owo aarumihiwa ni Muluku muneenaawe weera akhale muhooleli ni mvuluxaaya niwoko na ndyelo iixoonihenre wa yoowo muniphuwani.

³⁶Owo aahaakhumiha weiwo, apakaka sootikhiniha ni ineneero wExipitu, mphareiyani yooxeera ni munikareni wa iyaakha miloko mixexe.

³⁷Owo ti Moiseseene yoowo aaweerenle aYixrayeli: ‘Muluku anaamukhalihe variyari wa axunninyu mprofeeti ntoko miyo.’

³⁸Owo aakhala mmuthukumanoni munikareni vamoha ni ndyelo aamuulumenlaawe vamwaakoni oSinayi ni vamoha ni makholowaahu. Vano aakhenle masu makumi weera anileele hiyo.

³⁹Makholowaahutho yaakhootta omwiiwelela. Ohiyanawaya, yaamukhootta, ni mmirimanimwaya yaahokoleela wExipitu.

⁴⁰Awo yaamweerela Aharoni: ‘Munipakele miluku sineera sinihoole. Wa Moisesi owo aanikhumihale wExipitu, khanisuwenle emukhumelenle.’

⁴¹Ehuhuweene yeele yaapaka muluku mukina ni ekhalelo ya emombe ekhaaneene. Yaaruuhela soovaha ni yaahakalalela yeeyo matataaya yaapankaaya.

⁴²Mulukutho aasusa wa yaawo ni aahaaveleela olapela ithenyeeri sa wiirimu ntoko elempwalaaya mulivuruni ya maprofeeti: ‘aYixrayeli, apaale mwaaruuhela soovaha ni sooveleela wa Miyo wa iyaakha miloko mixexe munikareni?

⁴³Hoye! Ohiyanawaya, mwaamutekela eheema Molokhi ni ethenyeeri ya muluku Refani, miluku mwaapankaanyu weera mulape. Tivawo, Miyo nkoothaamihereni mpaka mpatta mukina wa oBabiloniya.’

⁴⁴Munikareni makholowaahu yaarino etabernaakulu* ya onamoona, yaapakiwe ntoko ekhalelo Moisesi oonnaawe mwaha wa nlamulo Muluku aamvanghaawe.

⁴⁵Yaavolowaaya elapo ya miloko Muluku oomonlaawe ohoolo wa aYixrayeli, makholowaahu yaakuxa etabernaakulu* emuttharaka muhooleli Yoxuwa. Etabernaakulu* ele yaakhala weiwo mpaka ehuhu ya Davide,

⁴⁶mwa yoowo aaphwanya mahala vamaithoni wa Muluku, ni aamvekela Muluku weera amutthunihere oteka woomaka wa Muluku a Yakobe.

⁴⁷Vaheera aari Salomoni aamupakenle empa.

⁴⁸Wa soothesene, Musulusulu khammaka impa soopakiwa ni atthu. Ntoko ohimalaawe mprofeeti:

⁴⁹‘Wiirimu ti ehicaaka, ni elapo nipuro na inaawosaka. Moota heeni wa empa nyuwo muneeraanyu mukipakele, aneera Apwiya, hoye hoye woowi nneeraaya nikhale nipuronaka noowiitthuuwa?

⁵⁰Khanihiyono ntatanaka nipanke itthusene seiya sootheene?’

⁵¹Muloko woohiiwelela, woohiineliwa mmirimanimwanyu ni mmaarunimwanyu! Nyuwo munoolikana ni makholowaanyu — mahuku ootheene munnakhootta Munepa Wootteela!

⁵²Mprofeeti heeni makholowaanyu ahimusoondalaaya? Yaawiiva yaale yaahima sa orwa wa Oororomeleya, mwa Yoowo nyuwo vano mootatuxiwa anamavarihaawe ni anamwiivaawe.

⁵³Nyuwo mwaakhenle nlamulo wa andyelo, mene khamuniiwelela.”

⁵⁴Yiiwaka yeeyo, yaanyoonyiwa ni yaamukhuurihela maino Stefano.

⁵⁵Stefanotho, oosareya Munepa Wootteela, aaweha osulu ni aahoona ovuwa wa Muluku, ni Yeesu eemenleene moono mulopwana wa Muluku,

⁵⁶ni aaheera: “Moone, kinoona wiirimu woohuleya ni Mwaana a mutthu eemenleene moono mulopwana wa Muluku.”

⁵⁷Vano awo yaattiyela maaru ni, ekhuwelaka ni nsu ntokotoko, ootheene yaamutuphela yoowo.

⁵⁸Yaamupurulela okerekhere wa esidade, enapacera omvonya maluku. Anamoona yaahiya mikaandyosaya vamanaawoni a mmiravo iitthaniwa Sawuli.

⁵⁹Emvonyaka maluku Stefano, owo aavekela eeraka: “Apwiya Yeesu, mwaakhele munepaaka.”

⁶⁰Vano aakokhora ni aakhuwela: “Ohaalikeleiye mulattu wa yaawo mwaha wa yoottheka ela.” Ni ahimaka yeeyo, aahookhwa.