Read Makhuwa-Shirima Miteko 9 Bible Online

Miteko 9 - Makhuwa-Shirima bible

Miteko 9

¹Yeereiyaka yeeyo, Sawuli aatepaxa owoopopihera okhwa oohuseraaya Apwiya. Aarowa wa mutokweenexa a asaserdoti*

²amvekelaka ikaratta wa iSinagoga sa oDamasku, sineera weera aaphwanya weiwo alopwana, hoye hoye athiyana ari a Ephiro, awere waakuxa ootthukiweene, aaronghaka oYerusaleemu.

³Eettaka hiihaale, akhuveelaka oDamasku, vaanaanoru waahaara waara mukhwipimwawe okhumelelaka wiirimu.

⁴Owo aamorela vathi ni aahiiwa nsu naamweerela: “Sawuli, Sawuli, heeni nyuwo munkisoondaanyu?”

⁵Sawuli aakoha: “Nyuwo taani Apwiya?” Awo yaamwaakhula: “Miyo Yeesu, mwa Yoowo nyuwo munimusoondaanyu.

⁶Muvenye ni mwavolowe musidade, vano mukina anooleeleni yeeyo entthuneya weera mupakeke nyuwo.”

⁷Alopwana yeentte vamoha ni Sawuli yaaheemela ootikhineene, niwoko yaahiiwa nsu, mene khayaamoonne mutthu.

⁸Sawuli aavenya vathi, ni ahulaka maitho, khaawenre woona etthu. Hiiho yaamukuxa emvarelaka matata mpaka oDamasku.

⁹Wookwana mahuku mararu owo aari oohoona, ni khaaciiye, naari khaawunre.

¹⁰oDamasku aakhala oohusera mmoha iitthaniwa Ananiya. Apwiya yaamwiitthana mmooneloni, yeeraka: “Ananiya.” Owo aawaakhula: “Kiri va, Apwiya.”

¹¹Apwiya yaamweerela: “Murowe owannyawe Yudasi, mmuseweni oniitthaniwa Woowookowa, ni mwakohakohe weiwo sa mulopwana mmoha a oTarso oniitthaniwa Sawuli. Owo onoovekela,

¹²ni mmooneloni aamoona mulopwana mmoha iitthaniwa Ananiya aphiyaka ni amwiiyaatheraka matata weera oonetho.”

¹³Ananiya aawaakhula: “Apwiya kohiiwa itthu sincipale sa mulopwana owo ni sa soonanara sootheene owo onaapakelaawe ootteelaanyu ari oYerusaleemu.

¹⁴Owo aaphiya va ni ikuru sa ahooleli a asaserdoti* weera aatthuke ootheene aniitthana Nsinananyu.”

¹⁵Apwiyatho yaamweerela Ananiya: “Muroweke, mulopwana owo ti exaavaaka yoothanliwa weera ekuxe Nsinanaka wa amalapo, mamwenaaya ni wa muloko wa aYixrayeli.

¹⁶Miyo nkimoonihere sootheene owo aneeraawe ahaawe niwoko na Nsinanaka.”

¹⁷Vano Ananiya aarowa, anavolowa mpaani, anamwiikaathera matata, anamweerela: “Munna Sawuli, Apwiya Yeesu yiixoonihenre wa nyuwo mphironi mwaarwaanyuwo, aakirumiha weera nyuwo moonetho ni musareye Munepa Wootteela.”

¹⁸Woowaakuveya itthu sinlikana ntoko makamba saamora mmaithoni mwa Sawuli ni owo aahoonatho. Aavenya, aapatisiwa,

¹⁹ni acaakaru, aalipa mmakhuvani. Sawuli aalekela mahuku makina ni oohusera a oDamasku.

²⁰Khuluwi aapacera olaleiya muSinagogani* weera Yeesu ti Mwaana a Muluku.

²¹Ootheene yaale yaamwiiwa, yaatikhina ni yaakoha: “Khahiyono owo mulopwana ole aasaasa waaphwata oYerusaleemu yaale aniitthana Nsina nna? Ni khaarweenletho va weera aaronghe ootthukiweene wa ahooleli a asaserdoti*?”

²²Wa soothesene, Sawuli annatepa wiilipihera, ni annaavaanya aYuda yaakhala oDamasku, awooniheraka weera Yeesu ti Kristu.

²³Eviraka mahuku mancipale, aYuda yaavaanela omwiiva Sawuli,

²⁴mene owo aasuwelihiwa yoovaanelaaya. Ohiyu ni othana awo yaawehaweha milako sa esidade weera emwiive.

²⁵Oohuseratho yaamukuxa ohiyu omoha ni yaamukuruxela mmuttaankani emvirihaka vanlakani na exiri.

²⁶Aphiyaka oYerusaleemu, aaheerera wiithukumanyiha ni oohusera, mene ootheene yaamoova, ehiroromelaka weera aari oohusera a ekhaikhai.

²⁷Vano Barnaba aamukuxa amuronghaka wa arummwa. Owo aahaathalihera moota owo aawoonnaawe Apwiya mphironi, mwa yaawo yaamuleela, ni moota owo aalaleiyaawe ni murima woolipa oDamasku mwa Nsina na Yeesu.

²⁸Hiiho Sawuli aakhala ni yaawo, ni eetta oohooceelihiwa uulumaka ni murima woolipa mwa Nsina na Apwiya.

²⁹Uulumano aGrego ni annavaanyihana ni yaawo, mene awo yaaheerera omwiiva.

³⁰Asuwelaka yeeyo, axunna yaamukuxa mpaka oSesareya ni yaamurumiha oTarso.

³¹Ekerexa yaakhalano ehuhu ekina ya murettele oYudeiya, oGalileiya ni oSamariya wootheene. Eyo yaamwiipuhiha ni, elipihiweene ni Munepa Wootteela, yaandyeerereya atthu oororomela, yeettaka mowoovani Apwiya.

³²Eetteettaka ilapo sootheene, Pedru aarowa waaxekura ootteela yaakhala oLida.

³³Iwe aamuphwanya mulopwana mmoha ooheetta, iitthaniwa Aneya, aakhala vabeettini wa iyaakha ithannatthaaru.

³⁴Pedru aamweerela: “Aneya, Yeesu Kristu onimoolamihani. Muvenye ni mureherere ebeettaanyu.” Owo aavenya woowaakuveya.

³⁵Ootheene yaakhala oLida ni elapo ya oSarona yaamoona, ni yaahaarukunxela mirimasaya Apwiya.

³⁶Vano, aakhala oYope oohusera muthiyana mmoha iithaniwa Tabita (eyo tiiyo yootaphuleliwa Dorka), mwa yoowo aakhala ni nthiti opaka miteko sooreera ni ovaha soovaha.

³⁷Wa mahuku ale owo aavoreiwa ni aahookhwa, ni erapihakaru erutthwaawe, yaahiikaathiwa mukwartuni mwa empa ya musulu.

³⁸Esidade ya oLida yaari vakhiviru wa oYope, ni oohusera yiiwalaaya yeeriwaka weera Pedru aari oLida, yaamurumihela asilopwana eeli weera emweerele: “Muhipise orwa wa hiyo.”

³⁹Pedru aahaahoolela ni aphiyakaru, aaronghiwa mukwartuni mwa empa ya musulu. Asinaamukhweli ootheene yaamurukureera, yiinlaka ni emooniheraka soowara ni ikuwo sikina Dorka aapankaawe nlelo areene vamoha ni yaawo.

⁴⁰Pedru aalamula weera ootheene ekhume mukwartuni mmwe. Vano aakokhora ni aavekela. Vahoolowaya, arukunuwelaka wa muthiyana ookhwa, aamweerela: “Tabita, muvenye!” Owo aahula maitho, ni amoonaka Pedru, aakilaathi.

⁴¹Amvarelaka ntata, aamukhavihera weemela. Vano, awiitthanaka ootteela ni asinaamukhweli, aawoonihera muthiyana areene ni okumi.

⁴²Eyo yaasuweliwa oYope wootheene ni ancipale yaaroromela mwa Apwiya.

⁴³Pedru aakhala oYope ehuhu ekina, mpaani mwa naxapala iitthaniwa Simeyoni.