Read Makhuwa-Shirima aRooma 1 Bible Online

aRooma 1 - Makhuwa-Shirima bible

aRooma 1

¹Wa Pawulo, murumeiyi a Kristu Yeesu, iitthaniwe weera akhale murummwa, aathanliwe weera alaleiye masu ooreeraxa.

²Masu ooreeraxa ala yaaroromelihiwe khalayeene ni maprofeeti a Muluku mwa Yoolempwa* Yootteela,

³ni ala yaari mwaha wa Mwanawe, aari ntoko erutthwaawe a ekhapira ya Davide.

⁴Owo aakhalihiwa Mwaana a Muluku ni ikuru sa Munepa wa ntteeliho niwoko na ovenyererawawe mookhwaani: Yeesu Kristu, Apwiyaahu.

⁵Niwoko na Yoowo ni na Nsinanawe nohaakhela mahala ni muteko okhala arummwa, weera niweettihe atthu a miloko sootheene weera eroromele ni yiiwelele.

⁶Ni nyuwotho muri a oowiitthaniwa weera mukhale a Yeesu Kristu.

⁷Wa ootheene oRooma ari oosiveleya a Muluku ni aniitthaniwa weera ekhale ootteela: Wa nyuwo, mahala ni murettele onrweela wa Muluku Atithihu ni Apwiya Yeesu Kristu.

⁸Woopacerani, kinnamuttottopela Mulukwaaka mwa Yeesu Kristu niwoko na nyuwo ootheene, seenre mweelaponi moothemwene suulummwaka sa nroromelonanyu.

⁹Muluku, mwa Yoowo kinimurumeelaaka ni murima wootheene kilaleiyaka masu ooreeraxa a Mwanawe, ti namoonaaka moota miyo kingwuupuwelelaakani mahuku ootheene

¹⁰mmavekelonimwaka ehuhu yootheene. Kimveka weera, waari otthuna wa Muluku, ommaleloniwaya kihuleliwe ephiro weera kooxekureni.

¹¹Onkunkhelaxa owoonani weera koovaheeni yoovaha emoha ya mMunepani weera koolipihereni,

¹²eyo tiiyo weera miyo ni nyuwo nilipihereyeke niwoko na nroromelonahu.

¹³Kintthuna weera nyuwo, axunnaka, musuwele nnenesene weera imaara sincipale kuupuwelaaka wooxekurani. Kaatthuna ohepha yoowiima emoha variyariwanyu ntoko kihemphaaka variyari wa amalapo akina, mene kohooceelihiwa wooxekurani mpaka olelo.

¹⁴Miyo kohaakoongorela anamiruku ni oohikhalano miruku, asuweli ni oohisuwela.

¹⁵Tivawo koolikana woolaleerani masu ooreeraxa nyuwotho muri oRooma.

¹⁶Nkinuulihiwa muru niwoko na masu ooreeraxa, niwoko ti ikuru sa Muluku singwera waavuluxa ootheene anroromela, woopacera aYuda ni wanaaveeli aGrego.

¹⁷Vano, mwa masu ooreeraxa onimooniheriwa waakhuleleya wa Muluku. Okhuma ompacereroni mpaka ommaleloni, waakhuleleya wu ti niwoko na nroromelo, ntoko elempwaaya: “Yoole onaakhuleliwa ni Muluku niwoko na nroromelo, anaakhale ni okumi.”

¹⁸Isara sa Muluku sinoonihereya wiirimu ni ohitteela wootheene ni yoonanara yootheene ya atthu enooceeliha ekhaikhai.

¹⁹Vano, yeeyo engwereya osuwanyeya wa Muluku enooniheriwa variyariwaya, niwoko Muluku oowoonihera.

²⁰Okhuma ephattuwelo ya elapo ya vathi, mikhalelo soohooneya sa Muluku, ntoko ikurusawe, soohimala, ni omulukwaawe, saahooniwa nnenesene. Iyo siiwexexiwa mwa itthu soopattuxiwa, moota wooweera atthweene yaawo ari oohileveleleya.

²¹Vano, emusuwelaka Muluku, khayaamvuwihale ntoko Muluku, hata khayaamutthapenle, mene soowuupuwelasaya saathatuwa sa siiyo, ni mirimasaya sa ololo saathatuwa epiphi.

²²Yaari mwiixeerelaru asuweli, yaathatuwa alolo.

²³Awo yaahaakakhanyiha ovuwa wa Muluku oohimala ni icaambulo soopakiwa soolikana ntoko mutthu onkhwa, hiiho ntoko ipalame, inama ni axiitthu aniipurula.

²⁴Tivawo Muluku aavaherenraawe ohitteela, weera moohaawani woonanara wa murimaaya epakelane itthu soowuuliha muru mukina ni mukhwaawe.

²⁵Yaahaakakhanyiha ekhaikhai ya Muluku ni wootha, ni yaalapa ni yaarumeela itthu soopattuxiwa, omuhiya Mpattuxa ori ooreelihiwa mahuku ootheene, Ame*.

²⁶Tivawo Muluku aavaherenraawe soohaawela soowuuliha muru. Mpaka axaaraya yaahaakakhanyiha okona ni alopwana, ekonaka ni asithiyana akhwaaya, ehiyaka ikhalelosaya ntoko athiyana.

²⁷Mooteene yoowo alopwanatho yaahiya okona ni athiyana, ni yaahaawelaxa okona ni akhwaaya. Yaapacera opaka miteko soowuuliha muru, alopwana ni alopwana, ni yaahaakhela asineenaaya yoottaruxa yoophwanela niwoko na mitekosaya.

²⁸Woonaka weera awo yaaramusa osuwela wa Muluku, Owo muneenaawe ohaahiya ni soowuupuwelasaya soonanara, weera epake yeeyo yahaatthuneya opaka.

²⁹Yaasareya mikhalelo sootheene sa soohookowa, otakhala, milili ni onarara. Aasareya nrima, wiiva, ohiiwanana, olokottha, ni murima woonanara. Ari anamwaapanana,

³⁰anamootherana, amwiittana a Muluku, oowiikuxerera, oowiixoona, oowiihima; anoopakelela mikhalelo soopaka soonanara, khaangwiiwelela asitithaya,

³¹alolo, oohiroromeleya, a murima woowuuma, oohimoriwa ikharari.

³²Hata esuwelaka nlamulo na Muluku, weera atthu ampaka itthu iyo amphwanela okhwa, khoohiyono ampwaherera opaka yeeyo paahi, menetho angwaakhulela yaale akina ampaka seiyo.