Read Makhuwa-Shirima aRooma 14 Bible Online

aRooma 14 - Makhuwa-Shirima bible

aRooma 14

¹Mmwaakhele yoole ori oohilipa munroromeloni, muhimvaanyaka soowuupuwelasawe.

²Mukina onroromela weera onoowera oca soothesene, vano mukina ori oohilipa munroromeloni onca paahi yooca yoolimmwa.

³Yoole onca soothesene ahimuramuseke yoole ohinca, ni yoole ohinca soothesene ahimuthoriheke yoole onca, niwoko Muluku ommwaakhelela.

⁴Nyuwo taani oomuthoriha murumeiyi a mukina? Ti Apwiyaawe anlakela owo awera weemela naari wuuwa. Ni aneemele, niwoko Apwiya angwera omweemexa.

⁵Ookhala yoowo onttittimiha nihuku nimoha nootteelaxa noopwaha makina, ni ookhala mukina onttittimiha mahuku ootheene weera ti oolikana. Ontthuneya weera khula mutthu akhaleke ooviriyeliwa ni soowuupuwelasawe.

⁶Yoowo onttittimiha nihuku nimoha ntoko noottittimiheyaxa, ompaka yeeyo wa Apwiya. Yoowo onkhuura enama, onkhuura wa Apwiya, niwoko onnaavaha asantte Apwiya; ni yoowo onghiya, onghiya wa Apwiya, ni onnaavaha asantte Yaawo.

⁷Vano, khaawo a hiyo onkhala wa yoowo mwaneenaawe paahi, ni khaawo a hiyo onkhwa wa yoowo mwaneenaawe paahi.

⁸Naakhalaka, nnaakhalela Apwiya, ni naakhwaaka, nnaakhwela Apwiya. Hiiho, naakhalaka, naari naakhwaaka, nri a Apwiya.

⁹Ti niwoko nna Kristu aakhwenlaawe ni aavenyerenraawe: weera akhale Apwiya a akumi ni akhwiiye.

¹⁰Vanonto, heeni munimuthorihaanyu munninyu? Naari heeni munimuramusaanyu munninyu? Ootheene hiyo nneemele ohoolo wa ehice ya nthorihelo ya Muluku,

¹¹niwoko yoolempwa: “Apwiya yeenre: ‘Vekhaikhai, kinoororomelihani weera atthu ootheene eniikokhore ohoolowaka, ni malumi ootheene eniilape weera Miyo ti Muluku.’”

¹²Hiiho, khula mutthu a hiyo anaamuthalihere mikhalelosawe Muluku.

¹³Tivawo, nihiyeke othorihana mukina ni mukhwaawe. Mulakele toko weera muhiikaathi nluku nookwattula, naari etthu enooceeliha mphironi ya munninyu.

¹⁴Ntoko mukina ori mwa Apwiya, kooviriyeliwaxa weera kheewo yooca eri yoohitteela mwaneenaayaru, ohikhanle wa mukina onuupuwela weera ti yoohitteela. Vano wa yoowo ti yoohitteela.

¹⁵Wakhala weera munninyu oniithananihera niwoko na yeeyo muncaanyu, nyuwo khamuneetta moosivelani. Muhimphwate munninyu niwoko na yoocaanyu, yoowo Kristu omukhwenlaawe.

¹⁶Muhitthunihere weera akina yooveiheni niwoko na yeeyo nyuwo munoonelaanyu okhala yooreera.

¹⁷Omwene wa Muluku khoohiyono yooca, naari yoowura, mene waakhuleliwa, murettele ni ohakalala mMunepani Wootteela,

¹⁸niwoko yoole onimurumeela Kristu moota hiiho, ti oomusiveliha Muluku ni oottittimihiwa ni atthu.

¹⁹Tivawo, naasaase itthusene seiyo sinruwera murettele ni sinkhavihera opuhihana.

²⁰Muhiphwate muteko wa Muluku niwoko na yooca. Yooca yootheene ti yootteela, mene ti yoonanara oca yakhalaru etthu enaakwattuliha akina.

²¹Fataari ohikhuura enama, naari ohiwura eviinyu, hata opaka yakhalaru etthu enimukwattuliha munninyu.

²²Yeeyo munroromelaanyu mwaha wa itthusene seiya, eyo ekhaleke variyari wa nyuwo ni Muluku paahi. Ooreelihiwa yoowo ohiniithoriha mwaneenaawe ni yeeyo owo onaakhulelaawe.

²³Yooletho onghovela, onoothoriheliwa aca, niwoko khanca ni nroromelo, ni sootheene sihinrweela wa nroromelo ti soottheka.