Read Makhuwa-Shirima aRooma 15 Bible Online

aRooma 15 - Makhuwa-Shirima bible

aRooma 15

¹Hiyo nri oolipa, ontthuneya ovilela soohilipa sa oohilipa, ni nihaasaasaka yeeyo ennisiveliha.

²Khula mutthu a hiyo ontthuneya weera amusiveliheke mukhwaawe wa mpuhaawe weera ampuhihe.

³Vano Kristu khiisivelinghe mwaneenaawe, mene ntoko elempwalaaya: “Sooruwana sa yaale anooruwanani, sookimorela Miyo.”

⁴Sootheene silempwe khalayi, silempwe weera sinixuttihe, mooteene yoowo weera niwoko na ovilela ni olipihiwa onrweela wa Yoolempwa*, nikhaleke ni oweherera.

⁵Muluku omvaha ovilela ni yoolipihera, oovaheeni munepa wa wiiwanana nyuwo munttharaka Kristu Yeesu,

⁶weera nyuwo mumvuwihe Muluku Atiithi a Apwiyaahu Yeesu Kristu ni murima mmoharu ni eyano emoharu paahi.

⁷Tivawo, mwaakhulelaneke mukina ni mukhwaawe mooteene yoowo ntoko Kristu owaakhulenlaaweni, weera Muluku avuwihiwe.

⁸Vano miyo kinooleelani weera Kristu oothatuwa murumeiyi a aYuda niwoko na ekhaikhai ya Muluku, weera alipihere seiye yaaroromelihiwaaya asitokweene a khalayi.

⁹Hiiho amalapo emvuwihe Muluku niwoko na ikhararisawe, ntoko elempwalaaya: “Tivawo, miyo nkoottottopeleni variyari wa amalapo, ni nkiipe icipo wa Nsinananyu.”

¹⁰Nitho yeenre: “Nyuwo amalapo, muhakalaleke vamoha ni mulokwaawe.”

¹¹Yoopwaherera: “Mwaattottopeleke Apwiya, nyuwo amalapo ootheene, ngwiipeleke soottottopela Yaawo, miloko sootheene.”

¹²Vano Yesaya eenretho: “Onuumele wa mukwankhwaarini wa Yixai Yoowo oniweemele weera waalamule amalapo, ni awo eniimuroromele Yoowo.”

¹³Muluku a nroromelo oosariheni ni ohakalala ni murettele wootheene nyuwo munroromelaka Yoowo, weera mwaatte munroromeloni niwoko na ikuru sa Munepa Wootteela.

¹⁴Axunnaka, miyo kooviriyeliwa weera nyuwo moosareya ni murima wooreera ni mooxuttihiwa nnenesene, ngweraka olakana mukina ni mukhwaawe.

¹⁵Mwaha wa nyaha sikina miyo kohoolepelani ni masu oowookoleleya, weera kiwuupuxereni veeli yaawo niwoko na mahala Muluku okivanghaawe

¹⁶okhala murummwa a Kristu Yeesu wa amalapo, eyo tiiyo kookhalano muteko wa musaserdoti* olaleiya masu ooreeraxa a Muluku weera amalapo ethatuwe yooveleela yoowaakhuleleya wa Muluku, atteelihiwe ni Munepa Wootteela.

¹⁷Tivawo, kiniivuwiha mwa Kristu Yeesu, mwa mutekwaaka wa Muluku.

¹⁸Nkinuuluma masu makina, ohikhanle othalihera yeeyo Kristu owenraawe aweettihaka amalapo omwiiwelela Muluku niwoko na maswaaka ni mutekwaaka.

¹⁹Eyo eweriwe ni ikuru sa ineneero ni sootikhiniha, nitho niwoko na ikuru sa Munepa Wootteela. Hiiho, okhuma oYerusaleemu ni mukhwipimwaya mpaka wIliriku, koolaleiya nnenesene masu ooreeraxa a Kristu.

²⁰Mahuku ootheene kaatthuna olaleiya masu ooreeraxa weiwo Kristu nlelo ahaasuweliwaawe, moota wooweera kihiteke vasulu wa mathipelo a mukina.

²¹Ntokotho elempwalaaya: “Yaale yahiiwale suulummwaka sa Yoowo, eniimoone, ni yaale yahaamwiiwale, enimwiiwexexe.”

²²Ti niwoko na yeeyo imaara sincipale miyo kooceelihiwaaka woophiyerani nyuwo.

²³Vanonto, neenre kihikhalaka nipuro mweelaponi iya weera kivare muteko, ni weenre okunkhelaka wooxekurani nyuwo,

²⁴kimvaanela wooxekurani miyo kaarwaaka wEspanya. Kinroromela wooxekurani kaaviraka ni woovahani ehuhu yookikhavihera ni mukwahaaka wa wu, kimalihaleene wooxekuraniwaka.

²⁵Wa soothesene, vano kinoorowa oYerusaleemu weera kaakhaviherewo ootteela,

²⁶niwoko oMasedoniya ni wAkhaya yaalakela waavaha ekhavihero oohaawa variyari wa ootteela a oYerusaleemu.

²⁷Awo yaatthunaxa opaka yeeyo, ni mwa yeeyo ari anamakoongora a ootteela yaawo. Vano, amalapo yaakhenle mareeliho a Munepa mwa yaawo yaari a aYuda, ontthuneyatho weera yaakhavihere aYuda ni sooreelasaya.

²⁸Hiiho, kaamalihaka muteko owo ni kaawinnyereraka yoowiima ela, nkirowe wEspanya, ni nkooxekureni kaaviraka.

²⁹Koosuwela weera karowa wooxekurani, nkirowe mwa waatta wa mareeliho a Kristu.

³⁰Kinoodyoonttelelani nyuwo, axunnaka, mwa Apwiyaahu Yeesu Kristu ni mwa osivela wa Munepa, weera mukhale vamoha ni miyo mukhottonimwaka, mumvekelaka Muluku niwoko na miyo.

³¹Mukivekeleleke miyo weera kivuluxiwe wa oohiroromela a oYudeiya, ni weera mutekwaaka wa oYerusaleemu okhale woowaakhuleleya wa ootteela,

³²moota wooweera Muluku atthuna, miyo kooxekureni ni ohakalala ni vamoha ni nyuwo ninookhalano ehuhu yoowiitthuuwa.

³³Muluku a murettele akhale ni nyuwo ootheene. Ame*.