Read Makhuwa-Shirima aRooma 2 Bible Online

aRooma 2 - Makhuwa-Shirima bible

aRooma 2

¹Tivawo, nyuwo munaathoriha akina muri oohileveleleya, niwoko muniittaruxa mwaneenaanyu mwa yeeyo munthorihaanyu, woonaka weera nyuwo munthoriha, mumpakatho itthusene seiyo.

²Noosuwela weera nthorihelo na Muluku wa yaawo ampaka itthusene seiyo nri na ekhaikhai.

³Hiiho, nyuwo muri mutthu, mwathoriha mpakakatho itthusene seiyo, munuupuwela weera mmoopowe nthorihelo na Muluku?

⁴Weeraka nyuwo munramusa mihakhu sa murimaawe wooreera Muluku, opixa murima, ni oweherera ni ovilela wa Muluku, muhisuwelaka weera murima wooreera wa Muluku onooronghani woorukunxani murima?

⁵Wa soothesene, niwoko na murimaanyu woowuuma woohirukunxeya, nyuwo muniixaandyeerera isara mwaneenaanyu wa nihuku na isara sa Muluku, nneeraaya nooniheriwe nthorihelonawe na ekhaikhai.

⁶Muluku anaamutthuvele mutthu ti mutthu ntoko mweettelowaawe.

⁷Owo anaavahe okumi woohimala wa yaawo ampwaherera opaka nnene ni anaasaasa ovuwa, nttittimiho, ni okumi woohimala.

⁸Nsikhaletho isara ni ottaruxiwa wa yaawo ari oowiipwattha asineenaaya paahi, yaawo ankhootta ekhaikhai ni antthara soonanara.

⁹Onuukhale ohaawa ni othanana murima wa atthu ootheene ampaka yoonanara, woopacera wa aYuda, ni wanaaveeli wa aGrego;

¹⁰ovuwatho, nttittimiho, ni murettele wa ootheene ampaka yooreera: woopacera wa aYuda ni wanaaveeli, wa aGrego.

¹¹Vano, mwa Muluku khaniwowo nthalu.

¹²Khula mutthu onttheka ahikhalanaka nlamulo, anaariheyetho oohikhalano nlamulo, ni khula mutthu onttheka asuwelaka nlamulo, anaathorihiwe ni nlamulo.

¹³Khaahiyono yaawo aniiwa nlamulo ari oowaakhuleleya vamaithoni wa Muluku, mene yaawo aniiwelela nlamulo. Awo eniyaakhuleliwe ni Muluku.

¹⁴Mwa yeeyo, wa amalapo ahinono nlamulo epakaka yeeyo nlamulo ninlamulelaaya, awo anthatuwa nlamulo wa asineenaaya, hata ehikhalanaka nlamulo,

¹⁵niwoko anoonihera weera yeeyo nlamulo ninnyesereraaya, yoolempwa mmirimanimwaya. Wa yeeyo soosuwelasaya ni soowuupuwelasaya sinkhalela onamoona, hata siwootheraka, naari siwaakihaka.

¹⁶Eyo eniikhumelele vanihukuni Muluku aneeraawe athorihe ixiiri sa atthu mwa Yeesu Kristu, ntoko anthalihaaya masu ooreeraxa miyo kinlaleiyaaka.

¹⁷Moone, nyuwo muniixeerela muYuda, nyuwo munroromela munlamuloni ni muniixoona weera moomusuwela Muluku.

¹⁸Nyuwo muneera weera munsuwela otthuna wa Muluku, ni munaakhulela yeeyo eri yooreera niwoko moolamuliwa ni nlamulo;

¹⁹nyuwo mooviriyeliwa weera muri muhooleli wa oohoona, waara wa yaawo ari mpiphini,

²⁰muhusiha wa oohisuwela ni wa anamwane, niwoko mookhalano munlamuloni mphimo wa osuwela ni wa ekhaikhai —

²¹vano nyuwo munaahusiha akina, khamuniihusiha muneenaanyu? Nyuwo munlaleiya weera muhiiye, munimwiiya?

²²Nyuwo muneera weera muhiraruwe, munooraruwa? Nyuwo munramusa miluku sikina, munimwiiya itthu siri mpaanimwaya?

²³Nyuwo muniixoona munlamuloni, khamunimuttittimiha Muluku muhiiwelelaka nlamulo?

²⁴Ntoko elempwalaaya: “Nsina na Muluku nri nooveiheya variyari wa amalapo niwoko na nyuwo.”

²⁵Wiineliwa onkhala wootthuneya nyuwo mwiiwelelaka nlamulo, mene nyuwo mwaahiiwelela nlamulo, wiineliwawanyu woothatuwa ohiineliwa.

²⁶Vano, awo ari oohiineliwa yiiwelelaka soonyesereriha sa nlamulo, kheerwa yaalikeliwa ntoko oowiineliwa?

²⁷Yoowo ori oohiineliwa mweerutthunimwawe, mene oniiwelela nlamulo, anoothoriheni nyuwo muhiniiwelela nlamulo, hata mureeneno nlamulo noolempwa nitho wiineliwa mweerutthunimwanyu.

²⁸Mutthu khahiyono muYuda yoowo areene omokoniwawe paahi, ni wiineliwa khoohiyono etthu ya mmokonimwawe ni mweerutthuni paahi.

²⁹Hoye! muYuda ti yoowo ori mpuwamwawe, ni wiineliwa ti wiineliwa wa murima, ompakiwa ni Munepa, ohiya nlamulo noolempwa. Mutthweene yoowo khanaakhela nttittimiho wa atthu, mene wa Muluku.