Read Makhuwa-Shirima aRooma 3 Bible Online

aRooma 3 - Makhuwa-Shirima bible

aRooma 3

¹Yooreera heeni okhala muYuda, hoye hoye muteko heeni omvaraaya wiineliwa?

²Vancipale, mwa mikhalelo sootheene. Woopacera niwoko masu a Muluku yaaroromeliwa wa aYuda.

³Ankha akina a yaawo yaahiroromeleya? Ohiroromeleyawaya onuumalihe ororomeleya wa Muluku?

⁴Hata vakhaani! Muluku akhaleke a ekhaikhai, ni atthu ootheene anamootha. Ntoko elempwalaaya: “Weera yaakhuleliwe maswaanyu ntoko ekhaikhai nyuwo muulumaka, ni mmwiwine nyuwo mwaathorihiwaka.”

⁵Vano, soohitteelasahu sooniheraka moota wa nnenesene ekhaikhai ya Muluku, nneere hai? Weeraka Muluku ti oohireera woonihela isarasawe? Kinuuluma moota wa omutthu.

⁶Vekhaikhai hoye! Waari hiiho, moota heeni Muluku eeraawe athorihe elapo ya vathi?

⁷Woothawaka wooniheraka ekhaikhai ya Muluku, ni hiiho waandyeereraka ovuwawawe, heeni nlelo kinthorihiwaaka ntoko namattheka?

⁸Heeni muhineeraanyu yeeyo anamwaapa akina annootheraaya ninghimaahu: “Nipakeke yoonanara weera ekhumemo yooreera?” Othorihiwa wa atthweene yaawo ti woophwanela.

⁹Eheeni nneeraahu nimalihe? Hiyo nohaapwaha yaawo? Hoye! Noothaliha nnene weera aYuda ni aGrego anlamuliwa ni soottheka.

¹⁰Ntoko elempwalaaya: “Khaawo mutthu a ekhaikhai, naari mmoha;

¹¹khaawo mukina oniiwexexa, khaawo ommwaasa Muluku.

¹²Ootheene aahapuwa ni aathatuwa a siiyo. Khaawo ompaka yooreera, hata mmoha.

¹³Mimilosaya siri mahiye oohuleya; ni malumaaya annalokottha. Yoohapala ya inowa eri mmwaanomwaya.

¹⁴Iyanosaya soosareya sa olapha ni owaawa.

¹⁵Inaawosaya sineetta woowaakuveya weera sivuuvihe ephome;

¹⁶milepe ni ohaawa simphwanyiwa mphironimwaya,

¹⁷ni khaasuwenle ephiro ya murettele.

¹⁸Atthweene yaawo khaammoovaru Muluku.”

¹⁹Noosuwela weera sootheene nlamulo ninghimaaya, ninaaleela yaale alamuliwe ni nne, weera iyano sootheene simaale, ni elapo ya vathi yootheene ekhale yoothorihiwa ni Muluku.

²⁰Tivawo khaawo anaakheleliwe ni Muluku niwoko na wiiwelela nlamulo, weenre okhalaka mwaha wa nlamulo hiyo noosuwela nnenesene soottheka.

²¹Vanonto wohoonihereya waakhuleliwa ni Muluku, onrweela wa Yoowo, ohikhanle mwaha wa nlamulo. Nlamulo ni maprofeeti ankhalela onamoona mwaha wa waakhuleliwa iwo.

²²Vano, waakhuleliwa ni Muluku iwo onrweela niwoko na nroromelo mwa Yeesu Kristu wa ootheene animuroromela. Khaniwowo nthalu,

²³niwoko ootheene aattheka ni ari ottaiwene wa ovuwa wa Muluku,

²⁴yaakhuleliweenetho ni Muluku mahaleene, eyo tiiyo mwa mahalaawe niwoko na ovuluxiwa ori mwa Kristu Yeesu.

²⁵Muluku oomwiiyaathi Yoowo ntoko yoowiiveleela weera awere wiiraaniha ni ephomaawe niwoko na nroromelo. Owo aapaka yeeyo weera oonihere ororomeleyawawe, niwoko moovilelanimwawe aahiya soohittaruxiwa soottheka saapakiwe khalayi.

²⁶Aapaka iye weera oonihere ororomeleyawawe wa vaanaano, weera akhale namaroromeleya ni namwaakhulela wa yaale animuroromela Yeesu.

²⁷Vano, nri woowi nthowa na wiivuwiha? Khanaalikeliwe. Niwoko heeni nihaalikeliwaaya? Niwoko na wiiwelela nlamulo? Hoye. Niwoko na nroromelo paahi.

²⁸Hiyo nlelo ninnanyeserera weera mutthu onaakhuleliwa ni Muluku niwoko na nroromelo, ohiya wiiwelela nlamulo.

²⁹Muluku ti Muluku a aYuda paahi? Owo khahiyonotho Muluku a amalapo? Aani, a amalapotho,

³⁰woonaka weera Muluku ori mmoha paahi, anaawaakhulele oowiineliwa nitho oohiineliwa niwoko na nroromelo nenenenno.

³¹Hiyo noomaliha nlamulo niwoko na nroromelo nenenenno? Hata vakhaani! Ohiyanawaya, ninnalipiha nlamulo.