Read Makhuwa-Shirima aRooma 5 Bible Online

aRooma 5 - Makhuwa-Shirima bible

aRooma 5

¹Vano, naakhuleliweene ni Muluku niwoko na nroromelo, nookhalano murettele ni Yoowo mwa Apwiyaahu Yeesu Kristu.

²Mwa Yoowo noophwanya ovolowa wa mahala ala niwoko na nroromelo, mahaleene yaale mwa yaawo hiyo nri oolipeene. Hiyo ninnahakalala moowehererani wa ovuwa wa Muluku.

³Khoohiyono mwa yeeyo paahi, mene ninnahakalalatho moohaawani, niwoko noosuwela weera ohaawa onruwera ovilela;

⁴ovilela onruwera ekhalelo yooreera; ni ekhalelo ela enruwera oweherera.

⁵Ni oweherera wu khaninrowa wooceela, niwoko Muluku ooniyeehera osivelawawe mmurimanimwahu ni Munepa Wootteela Owo onivanghaawe.

⁶Mwa yeeyo, ehuhu yootthuneya, hiyo naaraahu nlelo oohiwereene, Kristu aahaakhwela oohitteela.

⁷Ti woorikarika okhala mukina anaamukhwele mutthu oororomeleya. Apaale onoolipiha murima omukhwela mukina ooreera.

⁸Vaheera Muluku onoonihera onisivelawawe moota ola: Kristu aanikhwenle, hiyo naaraahu nlelo anamattheka.

⁹Woonaka weera vaanaano hiyo naakhuleliwe ni ephomaawe, wootepaxa nnikhale oovuluxiwa wa isara sa Muluku niwoko na Yeesu!

¹⁰Naaraahu nlelo amwiittana a Muluku, niiraanyihiwe ni Yoowo niwoko na okhwa wa Mwanawe, wootepaxa vano, nireene oowiiraanyihiweene, nnivuluxiwe ni okumaawe!

¹¹Kheehiyono paahi yeeyo, menetho ninnamuhakalalela Muluku niwoko na Apwiyaahu Yeesu Kristu, mwa Yoowo hiyo nohaakhela vaanaano wiiraana.

¹²Tivawo, mooteene yoowo yoottheka yaavolongwaaya mweelaponi niwoko na mulopwana mmoha, ni vahoolowaya okhwa niwoko na yoottheka ele, hiihotho okhwa waaweenle atthu ootheene, niwoko ootheene aattheka.

¹³Vano, nihinaaye ovahiwa nlamulo, yoottheka yeera ekhanleene mweelaponi. Yootthekatho kheenaalikeliwa nihinaaye okhala nlamulo.

¹⁴Wa soothesene, okhwa wannalamula okhuma ehuhu ya Adamu mpaka ya Moisesi, hiihotho wa yaale yahaakhanleno yoottheka yoolikana ntoko Adamu, mwa yoowo aari eneneero ya yoole eera awe.

¹⁵Mukhalelo wa mahala khoonlikanxereya ni mukhalelo wa yoottheka. Waari weera vekhaikhai atthu ancipale akhwiiye niwoko na yoottheka ya mutthu mmoha paahi, ekhaikhaitho weera mahala a Muluku ti oopwahaxa. Mahaleene yaawo anrweela wa Muluku wa ancipale niwoko na mutthu mmoha paahi, Yeesu Kristu, ti matokweenexa.

¹⁶Mahala a Muluku khaanlikana ni yookhumelela ya yoottheka ya mutthu mmoha paahi. Othorihiwa otthanre yoottheka emoha oruuhaka ottaruxa, mene mahala atthanre soottheka sincipale aaruuha waakhuleliwa ni Muluku.

¹⁷Vano, waari weera okhwa waalamula niwoko na yoottheka ya mutthu mmoha paahi, wootepaxa eniilamule mookumini wa yaale anaakhela wa Muluku waatta wa mahala ala ni yamahala ya waakhuleliwa niwoko na mutthu mmoha paahi, Yeesu Kristu.

¹⁸Tivawo, hiiho ntoko yoottheka emoha paahi eruuhalaaya ottaruxa wa atthu ootheene, hiihotho yoopaka emoha paahi yoovuluxa yaaruuha waakhuleliwa, onruuha okumi wa atthu ootheene.

¹⁹Hiiho ntoko atthu ancipale apakiwaaya anamattheka niwoko na ettiyamaaru ya mutthu mmoha paahi, hiihotho niwoko na wiiwelela wa mutthu mmoharu paahi ancipale eniyaakhuleliwe ni Muluku.

²⁰Nlamulo nivaheriwe weera yoottheka yaandyeerereye. Weiwotho yaattiyaayawo yoottheka, ahaattatho mahala,

²¹mooteene yoowo weera, hiiho ntoko yoottheka elamunlaaya mookhwaani, hiihotho mahala elamule niwoko na waakhuleliwa ni Muluku, eruuhaka okumi woohimala mwa Yeesu Kristu Apwiyaahu.