Read Makhuwa-Shirima aRooma 6 Bible Online

aRooma 6 - Makhuwa-Shirima bible

aRooma 6

¹Nneereke hai? Hiyo nnipwaherere ottheka weera mahala yaandyeerereye?

²Hata vakhaani! Hiyo ninkhwela yoottheka, nnipwaherere hai okhala mwa yeeyo?

³Apaale khamusuwenle weera hiyo ootheene nipatisiwe mwa Kristu Yeesu, nipatisiwe mwa okhwawawe?

⁴Tivawo, nivithiwe ni Yoowo mookhwaani niwoko na opatiso, weera hiyo nikhale ni okumi onyowani, hiiho ntoko Kristu ovenyererihiwaawe mookhwaani niwoko na ovuwa wa Atiithi.

⁵Waari weera hiyo nithukumanyihiwe mooteene yoowo ni Yeesu mookhwaanimwawe, vekhaikhai nnithukumanyihiwetho ni Yoowo moovenyereranimwawe.

⁶Vano, noosuwela weera mutthwaahu a khalayi oothomeiwa ni Yoowo, weera erutthu ya yoottheka ephwatiwe, ni weera nihikhaletho ipottha sa yoottheka,

⁷niwoko yoowo okhwiiye, oovuluwa mwa yoottheka.

⁸Moone, hiyo naakhwaaka ni Kristu, nnoororomela weera nnikhaletho ni Yoowo.

⁹Vano, noosuwela weera avenyererihiweene mookhwaani, Kristu khangwera okhwatho. Okhwa khoongwera omulamulatho.

¹⁰Ni okhwawawe, Kristu okhwenle yoottheka khuluwi, ni okumi onyowani onkhalaawe, onimukhalela Muluku.

¹¹Mooteene yoowo, mwiixuupuwelele weera mukhwiiyeene wa yoottheka, mene munoomukhalela Muluku mwa Kristu Yeesu.

¹²Tivawo, muhihiye yoottheka elamulaka irutthusanyu sinkhwa, mwiiwelelaka soohaawelasaya.

¹³Muhiveleele mipatta sa irutthusanyu wa yoottheka ntoko mipatta sa soonanara. Ohiyanawaya, mwiivaherere wa Muluku, ntoko atthu aruuhiwe wa okhwa mpaka okumi. Mveleele mipatta sa irutthusanyu wa Yoowo, ntoko mipatta sa ekhaikhai.

¹⁴Yoottheka kheerwa yoolamulani, niwoko khamukhanle vathi wa nlamulo, mene wa mahala.

¹⁵Vano, nnittheke niwoko khanikhanle vathi wa nlamulo, mene wa mahala? Hata vakhaani!

¹⁶Khamusuwenle weera nyuwo mwiivahereraka wa mukina weera mmwiiwelele ntoko ipottha, nyuwo munkhala ipottha sa yoowo mumwiiwelelaanyu — hata sikhale ipottha sa yoottheka, enooronghani wa okhwa, hata sikhale ipottha sa wiiwelela, onooronghani wa waakhuleliwa ni Muluku?

¹⁷Asanttetho wa Muluku niwoko, mwaarookhalaru ipottha sa yoottheka, nyuwo mohaakhulela ni murima wootheene moota wa nihusiho muvahiwaanyu.

¹⁸Nyuwo moovuluxiwa mwa yoottheka, ni mookhala ipottha sa ekhaikhai.

¹⁹Kinuuluma yeeyo ni mikhalelo sa omutthu, niwoko khamuniiwexexa itthu sootheene. Hiiho ntoko nyuwo mwaavahereraanyu mipatta sa irutthusanyu weera sikhale ipottha sa ohitteela ni onanara onrongha wootepa onanara, vano mvaherere iyo weera sikhale ipottha sa ekhaikhai enrongha wa ntteeliho.

²⁰Mwaaraanyu ipottha sa yoottheka, khamwaakhanle vathi wa ekhaikhai.

²¹Soowiima heeni nyuwo muhemphaanyu wa itthu iye sa khalayi singwuulihihani muru vaanaano? Ommaleloniwaya ti okhwa!

²²Vanonto, mweenre nyuwo mvuluxiwaka mwa yoottheka ni mukhala ipottha sa Muluku, soowiima munghephaanyu sinooronghani wa ntteeliho, ni ommaleloniwaya ti okumi woohimala.

²³Ntthuvelo na yoottheka ti okhwa, mene mahala a Muluku ti okumi woohimala mwa Kristu Yeesu Apwiyaahu.