Read Makhuwa-Shirima aRooma 8 Bible Online

aRooma 8 - Makhuwa-Shirima bible

aRooma 8

¹Tivawo, khaniwowo nttaruxo wa yaawo ari mwa Kristu Yeesu.

²Vano, niwoko na Kristu Yeesu, nlamulo na Munepa wa okumi nookivuluxa wa nlamulo na yoottheka ni na okhwa.

³Yeeyo nlamulo nahaaweraaya opaka niwoko naaraaya nookhulumuliweene ni erutthu, Muluku oopaka, amurumihaka Mwanawe muneenaawe ntoko yooveleelela yoottheka alikanaka ni namattheka. Ni hiiho aathoriha yoottheka mweerutthuni,

⁴weera soonyesereriha sa ekhaikhai sa nlamulo sikwaniheraxeke mwa hiyo nihinkhala munkhaleloni wa erutthu, mene wa Munepa.

⁵Yaawo ankhala munkhaleloni wa erutthu anuupuwela itthu iye erutthu enghaawelaaya, mene yaawo ankhala munkhaleloni wa Munepa, anuupuwela yeeyo Munepa onghaawelaaya.

⁶Muupuwelo wa erutthu yootthekeya onruuha okhwa, mene muupuwelo oneettihiwa ni Munepa onruuha okumi ni murettele.

⁷Muupuwelo wa erutthu yootthekeya ti mwiittana a Muluku, niwoko khooniiwelela nlamulo na Yoowo, hata khoongwera opaka yeeyo.

⁸Yaawo anlamuliwa ni erutthu yootthekeiya khaangwera omusiveliha Muluku.

⁹Wa soothesene, nyuwo khamukhanle munlamuloni na erutthu yootthekeya, Munepa wa Muluku wakhala vekhaikhai mwa nyuwo. Ni akhala mukina ohinono Munepa wa Kristu, owo khahiyono a Yoowo.

¹⁰Kristutho akhala mwa nyuwo, erutthwaanyu enkhala yookhwa niwoko na yoottheka, mene munepa onkhala ni okumi niwoko na waakhuleliwa ni Muluku.

¹¹Vano, wakhala mwa nyuwo Munepa wa Yoole omvenyererihale Yeesu mookhwaani, Yoowo omvenyererihale Kristu mookhwaani anaavahetho okumi wa irutthusanyu sookhwa niwoko na Munepaawe onkhala mwa nyuwo.

¹²Tivawo, axunnaka, nri ni ikoongori, ohikhanle wa erutthu nikhalaka oolamuliweene ni eyo.

¹³Nyuwo mwakhala munkhaleloni wa erutthu yootthekeya, mmwikhwe, mene mwiiva miteko sa erutthu ni Munepa, mmwikhale ni okumi.

¹⁴Ootheene yaawo aneettihiwa ni Munepa wa Muluku ari anamwane a Muluku.

¹⁵Nyuwo khamwaakhenle munepa wa okaporo weera moove veeli, mene mohaakhela Munepa onookhalihani ntoko anamwane. Vano, hiyo ninkhuwela ni Munepa Owo: “Aba,” entaphulela “Tiithi.”

¹⁶Munepeene Yoowo onnakhalela onamoona mwa munepaahu weera nri anamwane a Muluku.

¹⁷Nakhala anamwane, nri vano anamwaakhela a mahala a Muluku vamoha ni Kristu, hiyo nahaawa vekhaikhai vamoha ni Kristu weera nivuwihiwe vamohatho.

¹⁸Kinoona weera soohaawaxasahu sa vaanaanova khasingwereya olikanxiwa ni ovuwa oneera othupululiwe mwa hiyo.

¹⁹Soopattuxiwa sinnaweherera ni ohaawelaxa weera anamwane a Muluku ethupululiwe.

²⁰Vano soopattuxiwa saapakiwe sa siiyo, khasihiyono niwoko na othanlawaya, mene niwoko na otthuna wa Muluku iikaathiyemo

²¹munroromeloni weera soopattuxiwasene iye nsivuluxiwe wa okaporo wa yunttelo, ni hiiho sinoowera waakhela oneethi woovuwaxa wa anamwane a Muluku.

²²Noosuwela weera soopattuxiwa sootheene sinniipulela mpaka vaanaanova ntoko sireene moovoreiyani wa oyara.

²³Ni khasihiyono paahi seiyo, mene hiyo asineenaahu nookhalano soowiima soopacera sa Munepa, nniipulela mpuwamwahu, niwehereraka ni murima wootheene waakhulelawahu ntoko anamwane ni ovuluxiwa wa erutthwaahu.

²⁴Vano munroromeloni nna noovuluxiwa. Mene nroromelo nnooneya, khanihiyono nroromelo. Taani onroromela yeeyo onoonaawe?

²⁵Vaheera naroromela yeeyo nlelo nihoonnaahu, ningweherera ni ovilela.

²⁶Mooteene yoowo Munepa onnikhavihera ohilipawahu, niwoko kanisuwenle nnenesene ovekela, mene Munepeene Yoowo onnanivekelela wa Muluku ni soowiipulela soohiwereya ohimeya.

²⁷Ni Muluku onoona mpaka mpuwa mwa mirima, onsuwela yeeyo Munepa onghaawelaaya, niwoko Munepa onnaavekelela ootteela ntoko Muluku ontthunaawe.

²⁸Noosuwela weera Muluku onneettiha soothesene wa mpuha wa yaale animusivela, yaale yiitthaniwe niwoko na yeeyo Owo aatthunaawe weera yaareye.

²⁹Vano, yaawo Muluku aasuwenlaawe okhuma khalayi, aahaathanlatho weera ekhale oolikana ni Mwanawe, weera Owo akhale Ntthaara variyari wa axunneiye ancipale.

³⁰Yaawo Owo aathanlalaawe okhuma khalayi, oowiitthanatho, ni yaawo aawiitthannaawe, oowaakhulelatho, ni yaawo owaakhulenlaawe, oohaavuwihatho.

³¹Nneereke hai sa itthusene seiya? Muluku aari ni hiyo, taani aniittane ni hiyo?

³²Yoole ohimuurenle Mwanawe mmoharu, mene omvaherenre Yeesu wa hiyo ootheene, vekhaikhai anaanivahe vamoha ni Yoowo itthu sootheenetho.

³³Taani eniiwoothere oothanliwa a Muluku? Ti Muluku ongwaakhulela.

³⁴Taani anaathorihe? Aari Kristu Yeesu okhwiiye. Wootepaxa, Owo oovenyerera ni ori moono mulopwana wa Muluku anivekelelakatho hiyo.

³⁵Taani anaanimwalanyihe wa osivela wa Muluku? Apaale ohaawa, naari sookacamiha, naari ottharatthariwa, naari etala, naari osiwa, naari woopiha, hata ekatana?

³⁶Ntoko elempwalaaya: “Niwoko na nyuwo, nri ngwoopihani mwa okhwa wa mahuku ootheene, ntoko ikhondoolo simvahereriwa wa namwiiva.”

³⁷Mwa itthu sootheene seiyatho, nri anamawina oopwahaxa niwoko na Yoole onisivenle.

³⁸Vano, kooviriyeliwa weera hata okhwa, naari okumi, hata ndyelo, naari munepa woonanara, hata ehuhu ya vaanaano, naari ya muhoolo, hata ikuru sikina,

³⁹hata orakama, naari wiixera, hata yakhalaru etthu ekina epattuxingwe kheerwa ewera onimwalanyiha ni osivela wa Muluku ori mwa Kristu Yeesu, Apwiyaahu.