Read Makhuwa-Shirima 1 aKorinto 10 Bible Online

1 aKorinto 10 - Makhuwa-Shirima bible

1 aKorinto 10

¹Axunnaka, muhittiwale weera makholowaahu ootheene yaari vathi vanihutteni, ni ootheene yaalapuwa mphareiyani.

²Mwa Moisesi, ootheene yaawo yaapatisiwa munihutteni ni mphareiyani.

³Ootheene yaaca yooca emoha ya mmunepani,

⁴ni yaawura maahi a mmunepani niwoko yaawura wa mwala wa mmunepani waahoola. Vano mwala ole waari Kristu.

⁵Wa soothesene, Muluku khaasiveliwa ni atthu ancipale a yaawo, tivawo mittembosaya saamwaramwareiyaaya munikareni.

⁶Itthu iye seereiye ntoko ethoonyerowaahu, weera nihihaawele itthu soonanara ntoko awo.

⁷Muhikhale atthu oolapa miluku soolokottha ntoko akina a yaawo. Vano yoolempwa: “Muloko waakilaathi weera oce ni owure, ni waaheemela weera wiine.”

⁸Nihiraruweke ntoko akina a yaawo, vano wa nihuku nimoha yaahookhwa atthu 23 000.

⁹Nihaatannyeke Apwiya ntoko akina a yaawo, vano yaahiiviwa ni inowa.

¹⁰Nitho nihittaandawule ntoko akina a yaawo, vano yaahiiviwa ni ndyelo oophwata.

¹¹Itthu iye saaweereenle yaawo ntoko ethoonyero, ni saalempwa ntoko woopereriwawahu, mwa hiyo oniphiyenre ommaleloni wa ehuhu.

¹²Tivawo, yoole onuupuwela weera oolipa, iipasoope weera ahimore!

¹³Khamweereriwe nyuwo ohikhanle ni sooweereriwa sa omutthu. Muluku ti oororomeleya. Owo khantthunihera weera nyuwo mweereriwe opwaha yeeyo mungweraanyu ovilela. Vano, mweereriwa, Owo onimoovahani moota woowoopowa, weera muwere ovilela yooweereriwa.

¹⁴Tivawo, axunnaka oosiveleya, mutthawe wa olapa miluku soolokottha.

¹⁵Miyo kinuuluma ni atthu a miruku. Muupuwele nyuwo asineenaanyu yeeyo kinghimaaka.

¹⁶Ekoomixi ya nreeliho hiyo ninreelihaahu, kheehiyono wiiwanana ni ephome ya Kristu? Ni epaawu hiyo nimmeyanyaahu, kheehiyono wiiwanana ni erutthu ya Kristu?

¹⁷Woonaka weera eri epaawu emoharu, hiyo nri ancipale nri erutthu emoha, niwoko hiyo ootheene ninca epaawu emoharu yeeyo.

¹⁸Muupuwelele muloko wa aYixrayeli: Yaawo ankhuura ya enama yootteelihiwa valtaarini*, khaaniiwanana ni altaari*?

¹⁹Vano, kintthuna wooleelani eheeni? Enama yootteeliheriwa miluku soolokottha enoonihera etthu? Hoye hoye miluku soolokottha siri soottittimiheya?

²⁰Hoye! Kintthuna ohima weera yeeyo amalapo antteelihaaya, ti yoovahiwa wa minepa soonanara, ohikhanle wa Muluku. Nkintthuna weera nyuwo mwiiwanane ni minepa soonanara.

²¹Nyuwo khamungwera owura ekoomixi ya Apwiya nitho ya minepa soonanara. Khamungwera wiiwanana vameesa a Apwiya nitho a minepa soonanara.

²²Apaale hiyo nintthuna otannya nrima na Apwiya? Hiyo nri oolipa waapwaha Awo?

²³Sootheene kootthuniheriwa,” mene khasihiyono sootheene weera siri sookireera. “Sootheene kootthuniheriwa,” mene khasihiyono sootheene weera siri soowaapuhiha atthu.

²⁴Ootheene anaase mpuha wa mukina, khoohiyono wawaweru.

²⁵Muceeke sootheene sinthumihiwa omerekadu, muhihovelaka etthu niwoko na ohovela wa mmurimanimwanyu,

²⁶niwoko elapo ya vathi ni waattawaya wootheene ti wa Apwiya.

²⁷Awiitthanelani yooca mutthu oohiroromela ni nyuwo mwatthuna orowa, muceeke sootheene mumvahiwaanyu, muhikohaka etthu niwoko na ohovela wa mmurimanimwanyu.

²⁸Vano, mukina aweerelani: “Ela yoovahiwa wa miluku,” muhice, hiiho niwoko na mutthu ooleenleni, hiihotho niwoko na murima,

²⁹eyo tiiyo murima wa mukina, ohikhanle wawinyu. Vano, heeni oneethaaka onthorihiwaaya ni mirima sa atthu akina?

³⁰Miyo kaacaaka kixukuraka, heeni kinthorihiwaaka mwaha wa etthu wa yeeyo kixukurenlaaka?

³¹Tivawo, hata mucaaka, hata muwuraka, hata mupakaka sakhalaru itthu sikina, mupakeke soothesene mumvuwihaka Muluku.

³²Mweette mooteene yoowo weera muhikwakwathuwe, hata aYuda, hata aGrego, hata ekerexa ya Muluku.

³³Miyotho kinimweerera waasiveliha ootheene ni mikhalelo sootheene, niwoko nkinaasa mpuhaaka, mene mpuha wa atthu ancipale, weera evuluwe.