Read Makhuwa-Shirima 1 aKorinto 14 Bible Online

1 aKorinto 14 - Makhuwa-Shirima bible

1 aKorinto 14

¹Mutthareke osivela ni mwaasaase ni nthiti samahala sa Munepa, vancipalexa yamahala ya othalihera otthuna wa Muluku,

²niwoko yoowo onuuluma nuulumo nikina, khanuuluma ni atthu, mene ni Muluku. Wa yeeyo, khaawo oniiwexexa; owo onuuluma matikhinelo mmunepani.

³Vaheera owo onthalihera otthuna wa Muluku onuuluma ni atthu weera aapuhihe, alipihere mirimasaya ni aapepese.

⁴Yoowo onuuluma ni nuulumo nikina, oniipuhiha muneenaawe paahi, mene yoowo onthalihera otthuna wa Muluku, ompuhiha ekerexa.

⁵Kaatthuna weera ootheene nyuwo muulume muulumo makina, mene kintthunaxa weera nyuwo muthalihere otthuna wa Muluku. Yoowo onthalihera otthuna wa Muluku ti oompwahaxa yoowo onuuluma ni muulumo makina, ohikhanle weera mukina onootaphulela muulumo awo weera epuhihiwe ekerexa.

⁶Vano axunnaka, miyo kawa wooxekurani ni kuulumawo ni muulumo makina, eheeni kineeraaka koovareleni? Fataari weera miyo kooleeleni yoothupulula emoha, hoye hoye yoosuwela emoha, naari yoothalihera otthuna wa Muluku emoha, naari nihusiho nimoha.

⁷Moota hiiho, wa itthu siniipiwa sinruma seiyo sihikhanle ni okumi, hata akhalaka mpetta, hoye hoye makita, saahivirikana orumawaya, eniisuwanyeye hai eniipiwa ni mpetta, hoye hoye ni makita?

⁸Ohiya toko yeeyo, nipalapatta naahiruma nnenesene, taani aneera iireherere weera arowe okhottoni?

⁹Hiihotho ni nyuwo. Mwaahuuluma masu oowiiwanyeya ni nlumi, anaasuwele hai mukina etthu onleeliwaawe? Nyuwo mmuulume vasiiyoniwene paahi.

¹⁰Woohihovela, mweelaponi aakhala muulumo oohiyanahiyana, wa soothesene ootheene aakhalano etaphulelowaaya.

¹¹Tivawo, miyo kaahiiwexexa etaphulelo ya yeeyo mukina onuulumaawe, miyo nkikhale namarwaawe yoowo onuuluma, ni owo namarwaaka.

¹²Hiihotho eneereiya wa nyuwo. Mweenre nyuwo mutthunaxaka okhalano samahala sa Munepa, mwaasaase wiikhaliha mmahalani seiyo simpuhiha ekerexa.

¹³Tivawo, yoowo onuuluma ni nuulumo nikina, avekele weera awere otaphulela nuulumo nno.

¹⁴Miyo kavekela ni nuulumo nikina, munepaaka onoovekela, mene soosuwelasaka sinimweemela.

¹⁵Vano, nkeereke hai? Nkivekele ni munepa, mene nkivekeletho ni soosuwela; nkiipe ni munepa, mene nkiipetho ni soosuwela.

¹⁶Nyuwo mwaamuttottopelaka Muluku mmunepani, ongwereya hai yoole ori a yaale ahiniiwexexa weera “Ame*” wa otthapelawanyu, woonaka weera owo khasuwenle yeeyo nyuwo munghimaanyu?

¹⁷Vekhaikhai nyuwo munttottopelaka nnenesene, mene mukina khampuhihiwa.

¹⁸Miyo kinnamutthapela Muluku niwoko kinuuluma mmuulumoni woopwahani nyuwo ootheene.

¹⁹Wa soothesene, mukerexani kintthunaxa wuuluma masu mathanu oowiiwanyeya weera kaahusihe akina, ohiya wuuluma masu mancipale mmuulumoni.

²⁰Axunnaka, muhuupuwele ntoko anamwane. Mukhale anamwane mwa soonanara, mene oowunnuwa mwa wuupuwelawanyu.

²¹Vano, yoolempwa munlamuloni: “Nkuulume ni muloko wa atthu ola ni atthu a muulumo makina ni mwa iyano sa anamarwa, mene orookhalaru hiiho, awo kheerwa ekiiwa, aneera Apwiya.”

²²Tivawo, muulumo ari eneneero, kheehiyono wa yaawo anroromela, mene wa ahinroromela. Wa soothesene, othaliha otthuna wa Muluku ti wa yaawo anroromela, khoohiyono wa ahinroromela.

²³Hiiho, ekerexa yootheene yathukumana ni ootheene yuuluma ni muulumo makina, enavolowa akina oohisuwela, naari oohiroromela, awo kheerwa yeera weera muri ni anepa?

²⁴Avolowatho oohiroromela, naari oohisuwela ootheene yeeraka othaliha otthuna wa Muluku, owo anaaviriyeliwe ni masu a ootheene, ni anaathorihiwe ni masu a ootheene,

²⁵nitho ixiiri sa murimaawe nsikhale soowooneya. Hiiho owo anaamorele vathi ni anaamulape Muluku, akhuwelaka: “Vekhaikhai, Muluku ori variyariwanyu!”

²⁶Tivawo, axunnaka, nnihime eheeni? Mwaathukumanaka, khula mutthu a nyuwo onkhalano ecipo, hoye hoye masu a nihusiho, yoothupulula emoha, masu mmuulumoni, hoye hoye yootaphulela emoha. Mupakeke soothesene weera mpuhihe ekerexa.

²⁷Wa soothesene, yakhala akina anuuluma ni muulumo makina, yuulumeke meeli woohipwaha mararu, mutthu ti mutthu emaaraawe, ni ontthuneya weera mukina ataphuleleke.

²⁸Aahikhala mutthu ootaphulela, amaaleke mukerexani, uulumaka mwaneenaawe, ni ni Muluku.

²⁹Mwaha wa maprofeeti — eeli, hoye hoye araru ethalihereke, ni akina ephimeke nnenesene yeeyo aleelingwaaya.

³⁰Wakhala weera mukina okilaathiye ohooniheriwa etthu, oopacera amaaleke.

³¹Vano, ootheene nyuwo ngwereke othaliha otthuna wa Muluku, mutthu ti mutthu emaaraawe, weera ootheene ehusihiwe ni elipiheriwe.

³²Yaawo anthaliha otthuna wa Muluku anoowera olamula minepasaya.

³³Muluku khahiyono Muluku a ohiiwanana, mene a murettele. Ntoko mukerexani sikina sootheene sa ootteela,

³⁴asithiyana ontthuneya weera ekhaleke oomaala mukerexani, niwoko khaatthuniheriwe wuuluma, mene yiiweleleke ntoko nlamulo nihimalaaya.

³⁵Yatthuna ohusihiwa etthu, yaakoheke asiiyaya owaani, niwoko ti yoowuuliha muru wa muthiyana wuuluma mukerexani.

³⁶Weeraka masu a Muluku akhumelenle eriyaraanyu? Hoye hoye awo awiiye wa nyuwo paahi?

³⁷Akhala mukina onuupuwela weera ori mprofeeti, hoye hoye orino samahala sa Munepa, asuweleke weera yeeyo kinlepaaka ti nlamulo na Apwiya.

³⁸Aahisuwela yeeyo, owotho kharwa asuweliwa.

³⁹Tivawo axunnaka, mwaasaase ni nthiti othaliha otthuna wa Muluku, ni muhimukhoottihe yoowo wuuluma ni muulumo.

⁴⁰Sootheenetho iyo sintthuneya sipakiweke ni ophwanelawaya ni wiiwananawaya.