Read Makhuwa-Shirima 1 aKorinto 15 Bible Online

1 aKorinto 15 - Makhuwa-Shirima bible

1 aKorinto 15

¹Axunnaka, kintthuna owuupuxerani masu ooreeraxa miyo koolaleenraakani, mwa yaawo nyuwo mwaakhenlaanyu, ni mwa yaawo nyuwo mukhalihiwaanyu.

²Niwoko na masu ooreeraxa awo, nyuwo moovuluxiwa, mwalipihera ovarexexa masu koolaleenraakani. Mwaahipaka yeeyo, muroromenle vasiiyoni.

³Vano yeeyo kaakhenlaaka, miyotho kohooleelani ntoko etthu yoopacera ottittimiheya: weera Kristu okhwenle sootthekasahu ntoko Yoolempwa ehimalaaya,

⁴aavithiwa, ni aavenyerera nihuku nanaararu ntoko Yoolempwa ehimalaaya,

⁵ni aahiixoonihera wa Pedru, ni vahoolowaya wa muloko neeli.

⁶Vahoolowaya aahiixoonihera wa axunna oomalaka macira miloko mithanu vamaarani emoharu; ancipale a yaawo nlelo akumi, ari mweeraru akina a yaawo ekhwiiyeene.

⁷Woottharelana aahiixoonihera wa Yakobe, ni vano wa arummwa ootheene.

⁸Vahoolo wa yaale, aahiixoonihera wa miyo ntoko wa mwaana ohiyariwe ehuhu yootthuneya.

⁹Miyo kiri mukhaanene a arummwa ootheene, ni hata vakhaani nkiphwanenle wiitthaniwa murummwa, niwoko koottharatthara ekerexa ya Muluku.

¹⁰Vano, niwoko na mahala a Muluku miyo kiri yeeyo kiraaka, ni mahalaawe wa miyo khayaahiyono a siiyo. Mwa yeeyo koovara muteko waapwaha yaawo ootheene, wa soothesene nkihiyono miyo, mene mahala a Muluku yaari ni miyo.

¹¹Tivawo, hata kikhalaka miyo, hata ekhalaka awo, ti yeeyo ninlaleiyaahu ni ti yeeyo mwaaroromenlaanyu.

¹²Moone, waalaleiwaka weera Kristu oovenyerera mookhwaani, heeni akina a nyuwo aneeraaya weera khoowowo ovenyerera mookhwaani?

¹³Waahikhanle ovenyerera mookhwaani, vano hata Kristu khavenyerenre,

¹⁴ni Kristu aahivenyerenre, olaleiyawahu ti woohikhala etthu, nitho nroromelonanyu ti na siiyo.

¹⁵Waari weera ookhwa khaamvenyerera, Kristutho khavenyerenre. Hiiho, nniitthaniwe anamoona oolokottha a Muluku, niwoko naakhalenle onamoona weera Muluku aamvenyereriha Yeesu.

¹⁶Vano, ookhwa yaahivenyerera mookhwaani, hata Kristu khavenyerenre.

¹⁷Kristu aahivenyerenre, nroromelonanyu ti na siiyo, ni nlelo muri mootthekanimwanyu.

¹⁸Wa yeeyo, yaawotho akhwiiye mwa Kristu, aariheya.

¹⁹Waari weera hiyo naaroromenle mwa Kristu wa okumi wa vathi ola paahi, nimphwanela ikharari waapwaha ootheene.

²⁰Mwa yeeyo Kristu oovenyerera mookhwaani, akhalaka oopacera variyari wa yaale akhwiiye.

²¹Woonaka weera okhwa orwiiye niwoko na mulopwana mmoha paahi, ovenyerera mookhwaanitho orwiiye niwoko na Mulopwana mmoha paahi.

²²Vano, ntoko ootheene ankhwa mwa Adamu, hiihotho mwa Kristu ootheene eniikhalihiwe ni okumi.

²³Mene mutthu ti mutthu emaaraawe: oopacera Kristu, vahoolowaya, Owo awa, yaawo ari awawe.

²⁴Vano onuuphiye ommaleloni, Owo aavahereraka omwene wa Muluku Atiithi vahoolo wa ophwata elamulelo yootheene, otokweene wootheene, ni ikuru sootheene.

²⁵Ontthuneya weera Owo alamule mpaka ehuhuweene yeeyo amwiittana ootheene eneeraaya yiikaathiwe vathi wa inaawosawe.

²⁶Mwiittana ookisera aneera aphwatiwe, ti okhwa,

²⁷niwoko Owo “ohiikaathi soothesene vathi wa inaawosawe.” Moone, yeeriwaka weera “soothesene” sohiikaathiwa wa Yoowo, onooneya weera eyo kheenimutakansa Muluku muneenaawe, Yoowo omwiiyaathenre soothesene vathi wa Kristu.

²⁸Wa soothesene, iikaatheriwa soothesene Kristu, vano Mwaana muneenaawe aniikaathi mwa Yoowo iikaathiye soothesene wa Mwaana, weera Muluku akhale soothesene mwa ootheene.

²⁹Waahikhanle ovenyerera, eniyeere hai yaawo aniipatisa mwa ookhwa? Vekhaikhai waari weera akhwiiye khamvenyerera, aniipatisera heeni mwa yaawo?

³⁰Hiyotho, heeni ninkhalaahu hiyo ehuhu yootheene ngwoopihani?

³¹Axunnaka, kinnakhwa mahuku ootheene. Yeeyo kinghima mwa ovuwa kiraakano wa nyuwo mwa Kristu Yeesu Apwiyaahu.

³²Miyo kaawana ni axinama a ntuphini wEfeso niwoko na mathowa a mutthu paahi, kiwinne eheeni? Akhwiiye yaahivenyerera, “nnimooca ni ninoowura, niwoko omaalo nnikhwe.”

³³Muhilokotthiwe, “wiiraana ni atthu oonanara ompahula ikhovelelo sooreera.”

³⁴Muupuwelele nnenesene, muhiyerere ottheka, niwoko aakhala akina ahimusuwenle Muluku. Kinghima yeeyo weera kiwuulihiheni muru.

³⁵Vano mukina onoowera okoha: “Eniivenyerere hai akhwiiye? Ni moota heeni wa erutthu eneeraaya erwaaneke?

³⁶Mulolo! Yeeyo nyuwo munaalaanyu kheemmela, ohikhanle weera yaahookhwa toko.

³⁷Nyuwo mwaalaka, khamunaala erutthu eneera ekhaleke, mene paahi enuku ntoko ya etrigu, hoye hoye ya etthu ekina.

³⁸Mulukutho omvaha erutthu ntoko ontthunaawe, ni wa enuku ti enuku erutthwaaya yootthuneya.

³⁹Hata erutthu yootheene kheehiyono yoolikana. Atthu arino erutthwaaya, asinama arino erutthwaaya ekina, ipalame sirino erutthwaaya ekina ni ihopa sirino erutthwaaya ekinatho.

⁴⁰Sookhala irutthu sa wiirimu, ni sikina sa vathi. Vano ovuwa wa seiyo sa wiirimu ori mootaaya, ni seiyo sa vathi ori moota mukina.

⁴¹Mukina ori waara wa nsuwa, mukina wa mweeri, ni mukinatho wa ithenyeeri, ni mpaka ithenyeeri singhiyana waarawaya ekina ni ekhwaaya.

⁴²Hiiho nseereye ni ovenyerera wa ookhwa. Erutthu yooriheya yaaliwe, ni emvenyerera yoohiriheya.

⁴³Enaaliwa yoohittittimiheya, ni emvenyerera moovuwani; enaaliwa yoohilipa, ni emvenyerera ni ikuru.

⁴⁴Enaaliwa erutthu ya mutthu, emvenyerera erutthu ya mmunepani. Yakhala erutthu ya mutthu, enookhalatho erutthu ya mmunepani.

⁴⁵Hiiho yoolempwa: “Mulopwana oopacera, Adamu, aathatuwa erutthu ya okumi”; Adamu ookisera aathatuwa munepa omvaha okumi.

⁴⁶Kheehiyono erutthu ya mmunepani epacenre, mene ya mutthu; ni vahoolowaya ya mmunepani.

⁴⁷Mulopwana oopacera aari a ntthupi na etthaya; anaaveeli a wiirimu.

⁴⁸Ntoko aaraawe yoowo a etthaya, hiihotho yaawo ari a etthaya; ni ntoko aaraawe Yoowo a wiirimu, hiihotho yaawo ari a wiirimu.

⁴⁹Ntoko nikuxalaahu olikana wa mulopwana a etthaya, hiihotho nnikuxe olikana wa mulopwana a wiirimu.

⁵⁰Axunnaka, miyo kinoothaliherani weera erutthu ni ephome kheengwera waakhela omwene wa Muluku, hata yeeyo eri yooriheya kheengwera waakhela yoohiriheya.

⁵¹Mwiiwe, miyo kinooleelani ntikhinelo nimoha: khanihiyono ootheene hiyo nneera nikhwe, mene ootheene hiyo nnitatuxiwe

⁵²wa ehuhu emoha, ngwaaphilani wa maitho, woorumani nipenka nookisera. Vano, nipenka nnirume, akhwiiye eniivenyerere oohiriheya, ni hiyo nnitatuxiwe,

⁵³niwoko ontthuneya weera yeeyo eri yoowuntta eware yoohuntta, ni yeeyo yookhwa eware yoohikhwa.

⁵⁴Yeeyo eri yoowuntta yaawaraka yoohunta, ni yeeyo yookhwa yaawaraka yoohikhwa, hiiho eniikwaniheriwe masu oolempwa: “Okhwa woomiriwa ni owina wookwanela.”

⁵⁵“Okhwa, ori woowi owinawanyu? Okhwa, ori woowi mpuulaanyu?”

⁵⁶Mpuule wa okhwa ti yoottheka ni nlamulo ti ikuru sa yoottheka.

⁵⁷Atthapeliwe Muluku onnivaha owina niwoko na Apwiyaahu Yeesu Kristu!

⁵⁸Tivawo, axunnaka oosiveleya, mwiilipihe ni muhittikinyeye. Mahuku ootheene mupakeke miteko sa Muluku ni murima wootheene, niwoko moosuwela weera mwa Apwiya, mutekwaanyu khoohiyono wa siiyo.