Read Makhuwa-Shirima 1 aKorinto 16 Bible Online

1 aKorinto 16 - Makhuwa-Shirima bible

1 aKorinto 16

¹Vano, mwaha wa musurukhu wa muloko wa Muluku, mupakeke yeeyo miyo kaalamulenlaaka ikerexa sa oGalata.

²Nihuku noopacera na isimana soothesene, khula mutthu a nyuwo athokororeke mpatta wa musurukhu yoowo mungweraanyu, muthokororaka yoowo weera miyo kaaphiyaka, khoontthuneya othukumanya musurukhu wa ehuhuweene yeeyo.

³Vano, miyo kaaphiyaka, nkaavahe ikaratta sa olaihera yaawo muneeraanyu mwaathanle, ni nkaarume oYerusaleemu ni yoovahaanyu.

⁴Ni koona weera onootthuneya miyo orowatho, awo eniikihoole.

⁵Nkirwe kooxekureni kavira oMasedoniya, niwoko ontthuneya ovira oMasedoniya.

⁶Apaale nkikhale ni nyuwo wa ehuhu ekina, hoye hoye mpaka mulaala wootheene, weera mukikhavihere mukwahaaka wa mapuro ootheene kineeraaka kirowe.

⁷Emaareene yeeyo nkintthuna owoonani woowaakuveya paahi, kinroromela weera nkikhale ni nyuwo ehuhu yincipale, Apwiya yakitthunihera.

⁸Nkikhaletho wEfeso mpaka Pentekoste*,

⁹niwoko koohuleliwa nsele ntokotoko na miteko sooreera, ni aakhala amwiittana ancipale.

¹⁰Vano, awa Timootheyo, mweeteteyeke weera akhale oohoova areene ni nyuwo, niwoko owo onaavarela muteko Apwiya ntoko miyo.

¹¹Tivawo, khaawo aneera amuramuseke. Munkhavihereke opwaherera mukwahaawe ni murettele, weera owo ahokoleele wa miyo. Miyo kinoongweherera vamoha ni axunna.

¹²Mwaha wa munna Apolo, kannamunyeserera weera arowe ooxekureni vamoha ni axunna. Owo khaatthunne hata vakhaani, mene anaarowe akhalano ehuhu yootthuneya.

¹³Mukhale oowehaweha, mukhaleke oowiilipiha munroromeloni, mukhale alopwana oolipiha murima, mukhale oolipa.

¹⁴Mupakeke sootheene moosivelani.

¹⁵Nyuwo moosuwela weera yaawo a vaate wa Stefana yaari aKristu oopacera a wAkhaya, ni weera awo yaahiiveleela waarumeela atthu ootteela. Kinoovekelani axunna

¹⁶weera ngwiiwelele atthu ntoko awo, ni ootheene yaawo amvara muteko vamoha ni hiyo.

¹⁷Koohakalalela orwa wa Stefana, Fortunato ni Akhaiko, niwoko yaawo yaakiruuhela yeeyo yaakihaleela wa nyuwo.

¹⁸Awo aakurunuxa munepaaka nitho munepaanyu. Ngwoonelemo asilopwana ntoko awo.

¹⁹Ikerexa sa wAsiya sinoovahani isalaama. Akila ni Priska anoovahani isalaama sincipale mwa Apwiya, nitho ekerexa enthukumana mpaanimwaya.

²⁰Axunna ootheene anoovahani isalaama. Muulumihane ni ebeecu yootteela.

²¹Miyo, Pawulo, koolepa isalaama iya ni ntatanaka.

²²Akhala mukina ohinaasivela Apwiya, akhaleke oolamphwa. Ewe Apwiya!

²³Mahala a Apwiya Yeesu ekhale ni nyuwo.

²⁴Osivelawaka okhale ni nyuwo ootheene mwa Kristu Yeesu.