Read Makhuwa-Shirima 1 aKorinto 2 Bible Online

1 aKorinto 2 - Makhuwa-Shirima bible

1 aKorinto 2

¹Axunnaka, wa miyo, kaarwiiyaaka wa nyuwo koolaleerakani ntikhinelo na Muluku, nkaarwiiye ni masu oowaatta, hata ni miruku soowaatta.

²Vano kaaraaka eriyaraanyu, kaalakela weera nkimpwatthelaru etthu ekina, ahikhanle Yeesu Kristu, ni Owo oothomeiwa.

³Kaari oohilipa variyariwanyu, koovaka ni kithukumelaka.

⁴Mmutthenganimwaka ni moolaleiyanimwaka nkeerenre woowinani ni masu a miruku sa atthu, mene maswaaka ni olaleiyawaka waari woonihera wa ikuru sa Munepa,

⁵weera nroromelonanyu nihikhalihiwe mmirukuni sa atthu, mene mukuruni sa Muluku.

⁶Vano nnuuluma miruku variyari wa asitokweene. Miruku iya khasihiyono sa ehuhu ela, naari sa anamalamula a ehuhu ela, niwoko mirukusaya iyo sinoophiya sa siiyo.

⁷Ohiyanawaya, nnuuluma sa miruku sa Muluku, eyo tiiyo, ntikhinelo naari noowiipithiheya. Nno Muluku oolamulela wa ovuwawahu ehinaaye epacerero ya ehuhu.

⁸Khaawo naari namalamula mmoha a ehuhu ela iiwexenxe miruku iye, niwoko yiiwexenxe, saano ehaathomeiye Apwiya a ovuwa.

⁹Wa soothesene, ntoko elempwalaaya: “Itthu niitho nihoonalaaya, ni naaru nihiiwalaaya, ni ohuupuwenlaawe mutthu, ti seiyo Muluku aarehererenlaawe yaawo animusivela.”

¹⁰Muluku oonithupululela yeeyo niwoko na Munepa Wootteela. Munepa Wootteela omphima itthu sootheene mpaka itthu soowiixeraxa sa Muluku.

¹¹Vano, eriyari ya atthu, taani osuwenle itthu sa mutthu, ohikhanle munepa ori mwa yoowo? Ni hiihaawotho, khaawo osuwenle itthu sa Muluku, ohikhanle Munepa Wootteela.

¹²Wa soothesene, hiyo khannaakhela munepa wa elapo ya vathi, mene Munepa ongwa wa Muluku. Hiiho ninniiwexexa itthu Muluku onivanghaawe sa mahala.

¹³Mwa seiyotho ninnuuluma ni masu ooxuttihiwa ni Munepa Wootteela, ohiya toko masu a miruku sa mutthu. Hiiho ninnathalihera ikhaikhai sa mmunepani wa yaawo ari a mmunepani.

¹⁴Mutthu ohikhanleno Munepa Wootteela, khanaakhulela itthu singwa wa Munepa wa Muluku, niwoko siri sa anepa wa yoowo. Owo khangwera wiiwexexa itthu iyo, niwoko ontthuneya ophima iyo ni ekhalelo ya mmunepani.

¹⁵Mutthu a mmunepani onthoriha itthu sootheene, mene owo muneenaawe khaawo onimuthoriha, niwoko:

¹⁶“Taani asuwenle soowuupuwela sa Apwiya weera aaxuttihe?” Vano, hiyo nookhalano soowuupuwela sa Kristu.