Read Makhuwa-Shirima 1 aKorinto 3 Bible Online

1 aKorinto 3 - Makhuwa-Shirima bible

1 aKorinto 3

¹Axunnaka, nkiwenre wuuluma ni nyuwo ntoko atthu a mmunepani, mene ntoko atthu a erutthuru, ntoko anamwane mwa Kristu.

²Nkiwenre woovahani yooca yoolipa, niwoko nyuwo mwannawera owura mukaka paahi. Mwa yeeyo mpaka vaanaano vaava khamungwera,

³niwoko muri atthu a erutthuru. Vano, woonaka weera nookhala nrima ni ohiiwanana variyariwanyu, khamuhiyono atthu a erutthuru, mupakaka ntoko amalapo?

⁴Akhala mukina oneera: “Miyo ti a Pawulo,” ni mukina oneera: “Miyo ti a Apolo,” khamuhiyono a erutthuru?

⁵Woomaleloni, nneereke Apolo taani? Pawulo taani? Ari arumeiyi paahi, yookhavihenreni ororomela. Ni awo ooweeli aapaka yeeyo Apwiya yaarumalaaya paahi.

⁶Miyo kaaphatteiya, Apolo aahelela, mene ti Muluku unnuwihale,

⁷moota wooweera hata yoowo omphatteiya, naari yoowo onghelela ori oottittimiheya, mene Muluku mmoharu paahi unnuwihale.

⁸Yoowo omphatteiya ni yoowo onghelela ankhalano otthuna omoharu paahi, ni ooweeli eniiphwanye ntthuvelonaya, ntoko muteko ovanraawe.

⁹Vano, hiyo nri anamiteko a Muluku. Nyuwo muri ematta nitho yootekiwa ya Muluku.

¹⁰Mwa mahala a Muluku okivanghaawe, miyo kaapaka mathipelo ntoko namateka oosuwela, ni mukina onteka vasulu wa yaawo, mene khula mutthu awehexexeke nnenesene matekelo oneeraawe.

¹¹Khaawo ongwera othipa mathipelo makina, ehikhanle yaale apacereriwe, eyo tiiyo Yesu Kristu.

¹²Vasulu wa yeeyo khula mutthu onoowera oteka ni iyuuma sooreeraxa, hoye hoye maluku ootthuneyaxa, hoye hoye miri, hoye hoye malaxi, hoye hoye mitathi,

¹³mene muteko wa khula mutthu oniwoonihereye, niwoko nihuku nno muteko owo ngwiruuheliwe waara. Ngwithupululiwe ni mooro, ni mooro owo oniweerere mikhalelo sa miteko sa atthu ootheene.

¹⁴Yeeyo mukina otenkaawe yalekela, owo onimwaakhela ntthuvelonawe.

¹⁵Yeeyo mukina otenkaawe yasa, anaahaawe mooyeleelani iwo, wa soothesene anaavuluxiwe ntoko mukina onoopowa avinreene mmooroni.

¹⁶Nyuwo khamusuwenle weera muri Empa ya Muluku, ni weera Munepa wa Muluku onkhala mwa nyuwo?

¹⁷Akhala mukina omphwata Empa ya Muluku, owo anaaphwatiwe ni Muluku, niwoko Empa ya Muluku ti yootteelihiwa, ni nyuwo muri Empeene yeeyo.

¹⁸Muhiilokotthe. Mmoha a nyuwo uupuwela weera ti oosuwela ophimiwa ni ekhalelo ya ehuhu ela, ontthuneya wiitatuxa nsikini weera atatuxiwe musuweli,

¹⁹niwoko miruku sa amalapo ti osikineya vamaithoni wa Muluku. Vano yoolempwa: “Muluku onnaavara asuweli moolokotthanimwaaya.”

²⁰Nitho: “Apwiya ansuwela weera soowuupuwela sa asuweli siri sa ethiru.”

²¹Tivawo, ahikhale mukina aneera avuwihe mwa atthu. Itthu sootheene ti sawinyu —

²²hata akhalaka Pawulo, Apolo, Kefasi, elapo, okumi, okhwa, sa vaanaano, hoye hoye sa muhoolo — sootheene ti sawinyu,

²³ni nyuwo muri a Kristu, ni Kristu a Muluku.