Read Makhuwa-Shirima 1 aKorinto 5 Bible Online

1 aKorinto 5 - Makhuwa-Shirima bible

1 aKorinto 5

¹Oniiwanyeya weera variyariwanyu wookhala oraruwa, moota ohikhanle hata mpaka variyari wa amalapo. Vekhaikhai ookhala mukina a nyuwo onraruwa ni amwaaraaya atithawe.

²Ni nyuwo munniixoona! Khoontthuneya osareya othanana ni omoomola variyariwanyu yoole opanke yeeyo?

³Hata kihikhalakawo mweerutthuni, kiri ni nyuwo mmunepani. Miyo koomuthoriha yoole opanke yeeyo ntoko kaari vaavaawo.

⁴Nyuwo mwathukumana mwa Nsina na Apwiyaahu Yeesu Kristu, miyo kireene ni nyuwo mmunepani, ni ikuru sa Apwiyaahu Yeesu Kristu sireenewotho,

⁵mumvaherere mulopwana owo wa Satana weera erutthwaawe ephwatiwe, ni muneepaawe ovuluxiwe nihuku na Apwiya.

⁶Wiixoonawanyu khoohiyono wooreera. Khamusuwenle weera eferementu vakhaani ennyarula ephepa eri yootheene?

⁷Mwiixoopole wa eferementu ya khalayi weera mukhale ephepa enyowani ehikhalanne eferementu, ntoko muraanyu vekhaikhai. Vano Kristu eputtiputthaahu ya mPaska* yaahiiviwa.

⁸Tivawo, nipake efesta khoohiyono ni eferementu ya khalayi, hata ni eferementu ya soonanara, naari oraruwa, mene ni ipaawu soohikhalano eferementu soohootha, ni sa ekhaikhai.

⁹Kaahoolepelani ekaratta weera muhiithukumanyihe ni atthu oolavilavi.

¹⁰Wa yeeyo, nkinaahima alavilavi, naari anamilili, naari anamwiiya, naari anamalapela miluku sikina a mweelaponi ela. Kaahima yaawo, waatthuneya nyuwo otthawa elapo ya vathi ela.

¹¹Menetho kinoolepelani weera muhiithukumanyihe ni yaale aneera weera ari aKristu ereene alavilavi, anamilili, anamalapela miluku sikina, anamwaapa, anamawura, naari anamwiiya. Ni atthweene yaawo, hata khoontthuneya ocano vamoha.

¹²Vano, ti mutekwaaka waathoriha yaawo ari omokoni wa ekerexa? Khoontthuneya nyuwo waathoriha yaawo ari mpuwa?

¹³Muluku anaathorihe yaawo ari omokoni. “Mmoomole mulavilavi variyariwanyu.”