Read Makhuwa-Shirima 1 aKorinto 6 Bible Online

1 aKorinto 6 - Makhuwa-Shirima bible

1 aKorinto 6

¹Akhala mmoha a nyuwo otapanyanne ni munneiye mwa Kristu, ongwereya hai wuulummwa ni atthu oohiroromela, ohiya omuronghela ootteela?

²Khamusuwenle weera ootteela eniithorihe elapo? Mwathoriha elapo, muhingwera hai wuuluma milattu soottittimiheya vakhaani?

³Khamusuwenle weera nnaathorihe andyelo? Ankhatho itthu iye sa okumi ola!

⁴Tivawo, mwaarino milattu soolikana sa okumi ola, mwaakhalihe ntoko aphuki yaawo ari a ekerexa, hata ekhalaka oottittimiheya vakhaani.

⁵Kinghima yeeyo weera kiwuulihiheni muru. Weeraka khawowo mmoha variyariwanyu ori oosuwelaxa weera athorihe mulattu variyari wa axunneiye?

⁶Ongwereya hai muKristu mmoha omuronghela munneiye alipa oowuuluma milattu, ni yeeyo vamaithoni wa oohiroromela?

⁷Vano, wootherana mulattu variyariwanyu ti ethoonyero ya otapanya otokotoko. Ti wookupaleeleya ohaawa ohiroromeleya. Ti wookupaleeleya ohaawa moolokotthani.

⁸Ohiya yeeyo, ti nyuwo asineenaanyu mungwoothera milattu ni mwimpaka soonanara, ni eyo wa axunninyu!

⁹Nyuwo khamusuwenle weera atakhali kheerwa yaakhela omwene wa Muluku? Muhiilokotthe! Hata alavilavi, hata anamalapela a miluku sikina, hata anamararuwa, hata yaawo ankonihana alopwanaru, hoye hoye athiyanaru, hata puuta mulopwana,

¹⁰hata anamwiiya, hata anamilili, hata anamawura, hata anamwaapa, naari alipa angwaakha itthu asikhwaaya kheerwa yaakhela omwene wa Muluku.

¹¹Hiiho yaari akina a nyuwo. Mene nyuwo moorapihiwa, mootteelihiwa, mohaakhuleliwa ni Muluku mwa Nsina na Apwiya Yeesu Kristu ni mwa Munepa wa Mulukwaahu.

¹²“Sootheene kootthuniheriwa,” mene khasihiyono sootheene weera siri sookireera. “Sootheene kootthuniheriwa,” mene nkinrowa olamuliwa ni yakhalaru etthu.

¹³“Sooca sipakeliwe nipwiipwi ni nipwiipwi wa sooca,” mene Muluku anaaphwate soopiili. Vano, erutthu kheehiyono wa olavilavi, mene wa Apwiya, ni Apwiya wa erutthu.

¹⁴Muluku aahaavenyereriha Apwiya ni ikurusawe, ni Owo anaanivenyererihetho hiyo.

¹⁵Nyuwo khamusuwenle weera irutthusanyu siri mipatta sa erutthu ya Kristu? Vano, miyo nkikuxe mipatta sa Kristu weera kipake mipatta sa mapuuta? Hata vakhaani!

¹⁶Khamusuwenle weera yoole onkona ni mapuuta ti erutthu emoha ni yoowo? Vano, ntoko eneeriwaaya: “Ooweeli eniikhale erutthu emoha paahi.”

¹⁷Mene yoowo onkhala mwa Apwiya, ti munepa mmoha ni Yaawo.

¹⁸Mutthawe wa oraruwa. Soottheka sootheene mukina opankaawe, ompakiwa omokoni wa erutthu, mene yoowo onttheka mooraruwani, onttheka mweerutthunimwawe.

¹⁹Khamusuwenle weera erutthwaanyu ti empa ya Munepa Wootteela? Mohaakhela Owo wa Muluku, ni onkhala mwa nyuwo. Tivawo nyuwo khamuhiyono a nyuworu.

²⁰Nyuwo moothummwa ni mutteengo. Tivawo, mumvuwihe Muluku ni erutthwaanyu.