Read Makhuwa-Shirima 2 aKorinto 1 Bible Online

2 aKorinto 1 - Makhuwa-Shirima bible

2 aKorinto 1

¹Ya Pawulo, murummwa a Kristu Yeesu ntoko otthuna wa Muluku, ni munna Timootheyo. Wa ekerexa ya Muluku eri oKorinto, vamoha ni ootteela ootheene ankhala elapo yootheene ya wAkhaya.

²Wa nyuwo, mahala ni murettele onrweela wa Muluku Atithihu ni wa Apwiya Yeesu Kristu.

³Oottottopeliwa akhale Muluku ni Atiithi a Apwiyaahu Yeesu Kristu, Atiithi a ikharari ni a opepesa wootheene.

⁴Owo onnipepesa mmahooxonimwahu mootheene, weera hiyo niwere waapepesa yaawo ari mmahooxoni ni opepesa naakhenlaahu wa Muluku.

⁵Vano hiiho ntoko soohaawela sa Kristu sinnaattelaaya hiyo, hiihotho onnaattela opepesawahu niwoko na Kristu.

⁶Hiyo naahaawihiwaka, iwo ori wa opepesiwawanyu ni ovuluxiwawanyu. Hiyo napepesiwa, ori wa opepesiwawanyu, ni iwo onoovahani opixa murima weera muvilele ohaawawene weiwo hiyo ninghaawaahu.

⁷Vano owehererawahu mwaha wa nyuwo ti woolipa, niwoko noosuwela weera nyuwo murino opepesiwawene weiwo nraahuno, mooteene yoowo muraanyuno ohaawawene weiwo hiyo nraahuno.

⁸Axunna, hiyo khanintthuna weera nyuwo muhisuwele ohaawa naahaawaahu elapo ya wAsiya. Ohaawawene weiwe waari woopwahaxa ovilela, mpaka ophiyera ehuhu hiyo yoowooceela ororomela weera nnikhale ni okumi.

⁹Mwa yeeyo hiyo asineenaahu naakhalano othoriheliwa okhwa, weera nihiiroromele asineenaahu, mene mwa Muluku onaavenyereriha akhwiiye.

¹⁰Owo oonoopola wa woopiha otokotoko wa okhwa, ni anaapwaherere onoopola. Ninnimuroromela Yoowo weera anaapwaherere onoopola,

¹¹nyuwo munikhaviherakatho ni mavekelowaanyu. Hiiho ancipale eniimutthapele Muluku mwaha wa hiyo niwoko na mahala hiyo nivahiwaahu mwa waakhula wa mavekelo a ancipale.

¹²Vano, ovuwawahu ti wu: Mirimasahu sinkhalela onamoona weera hiyo nanneetta mweelaponimu, vancipalexa variyariwanyu, moota wa murima woowookowa, mwa ekhaikhai enrweela wa Muluku, mwa mahala a Muluku, ni khanneetta mwa miruku sa elapo ya vathi.

¹³Kheewo nnoolepelaahuni muhingweraanyu osoma, hoye hoye wiiwexexa. Koororomela weera,

¹⁴ntoko nyuwo munniiwexexaanyu vakhaani, mmwiiwexexetho vancipale weera munoowera wiivuwiha niwoko na hiyo, hiiho ntoko hiyo nniivuwihe niwoko na nyuwo vanihukuni na Apwiya Yeesu.

¹⁵Kiroromelaka mwa yeeyo, ni weera nyuwo mukhale ooreelihiwaxa, kaavaanela wooxekurani toko

¹⁶kirowaka oMasedoniya ni koohokoleeleni kikhumakawo, weera nyuwo mukikhavihere mukwahaaka wa oYudeiya.

¹⁷Vano, kaavaanenlaaka yeeyo, weeraka miyo kipanke yeeyo ntoko namaceendyaceendya? Hoye hoye weeraka soovaanelasaka kimpaka ntoko mikhalelo sa amalapo, keeraka “aani” ni “hoye” ehuhu emoha yeeyo?

¹⁸Wa soothesene, ntoko Muluku oraawe oororomeleya, mutthengaahu wa nyuwo khoohiyono “aani” ni “hoye,”

¹⁹niwoko Mwaana a Muluku, Yeesu Kristu, Owo onlaleiwa variyariwanyu ni miyo, Silvano ni Timootheyo, khaahiyono “aani” ni “hoye,” mene mwa Yoowo mahuku ootheene wookhala “aani.”

²⁰Soororomelihiwa sootheene sipakiwe ni Muluku siri “aani” paahi mwa Kristu. Tivawo, ti niwoko na Yoowo nneeraahu “Ame*” wa ovuwa wa Muluku.

²¹Ti Muluku onnilipiha hiyo vamoha ni nyuwo mwa Kristu. Owo oonittikitthela,

²²ni oniyaathenre eneneero enoonihera weera nri a Yoowo, ni onihenle Munepaawe mmirimanimwahu ntoko yoororomelihiwa ya yeeyo eneera ewe.

²³Kinimwiitthana Muluku ntoko namoona weera nkaahokoleenle oKorinto weera kiwuureleni nyuwo.

²⁴Khoohiyono weera ninoolamulani nroromelonanyu, mene nimvara muteko vamoha ni nyuwo weera muhakalale, niwoko ti munroromeloni nyuwo munkhalaanyu oolipa.