Read Makhuwa-Shirima 2 aKorinto 11 Bible Online

2 aKorinto 11 - Makhuwa-Shirima bible

2 aKorinto 11

¹Koororomela weera nyuwo mmukivilele vakhaani, hata miyo mukoonaka ntoko naanepa. Vekhaikhai munookivilela!

²Nthiti kookhalenlaakani, ti nthiti ninrweela wa Muluku. Miyo kohootthomerihani nyuwo wa mulopwana mmoharu ori Kristu, kitthunaka owooniherani wa Yoowo ntoko ootthomeriwa ootteelaxa.

³Yeeyo miyo kinoovaaka ti ela: ntoko enowa yaamulokontthaaya Eva ni mirukusaya soonanara, nkintthuna weera soowuupuwelasanyu sihapuxiwe mwa nthitinanyu wa Kristu na ekhaikhai ni nootteela.

⁴Vano, akhala mukina onoolaleerani Yeesu mukina, ahikhanle Yoowo nnimulaleiyaahu, hoye hoye mwaakhelela munepa mukina, ohikhanle Yoowo mwaakhenlaanyu, naari masu ooreeraxa makina, ehikhanle mwaakhulenlaanyu, nyuwo munoovilela yeeyo wookhweyaxa.

⁵Wa soothesene, nkinroromela okhala mwaamukhaani a arummwa yaala oottittimiheyaxa.

⁶Apaale miyo nkinuuluma masu nnenesene, wa soothesene nkihiyono oohilipa moosuwelani. Mwa yeeyo, noowooniherani yeeyo mwa itthu sootheene.

⁷Weeraka yookhala etthu kitthenkaaka, miyo kiiyevihaka weera koottukhuleni, koolaleerakani ya mahala masu ooreeraxa wa Muluku?

⁸Kohiiyera ikerexa sikina, kaakhelaka mwa seiyo ekhavihero weera koorumeeleni.

⁹Kaaraaka variyariwanyu kihaawelaka etthu, khaawo kaamulemenlaaka, niwoko axunna yaawiiyaaya ekhumaka oMasedoniya yaakivaha yeeyo kaahaawelaaka. Kaapaka yeeyo weera kihoolemeleni nyuwo, ni nkipwaherere moota ola.

¹⁰Hiihotho, ntoko ekhaikhai ya Kristu eraaya mwa miyo, khaawo a elapo ya wAkhaya anaawere okiiyera ovuwa wu.

¹¹Niwoko heeni? Niwoko miyo nkinoosivelani? Muluku oosuwela weera kinnoosivelani!

¹²Vano, nkipwaherere opaka yeeyo kimpakaaka, weera kiwiiyere ehuhu yaale anghaawela wiitthaniwa woolikana hiyo mwa itthu aniivuwiheraaya.

¹³Atthweene yaawo ari arummwa oowootha, anamiteko oolokottha, yiixeeraka ntoko arummwa a Kristu.

¹⁴Ni kheehiyono yootikhiniha, niwoko Satana muneenaawe oniixeera ntoko ndyelo a waara.

¹⁵Tivawo, kheehiyono etthu yootikhiniheya arumeiyaawe yiixeeraka weera ari arumeiyi a ekhaikhai. Ommaleloniwaya onuukhale yeeyo mitekosaya simphwanelaaya.

¹⁶Kineera emaara yanaaveeli: ahikhale mutthu onuupuwela weera miyo kiri naanepa. Mene muupuwelaka hiiho, mukaakhelele ntoko muneeraanyu mmwaakhelele naanepa, weera miyo kiivuwihetho vakhaani.

¹⁷Wiivuwiha wu kineeraka kihime, nkirwa kihima ya mpatta wa Apwiya, mene ntoko naanepa.

¹⁸Woonaka weera ancipale aniivuwiha moota wa omutthu, miyotho nkiivuwihe.

¹⁹Nyuwo mureene atthu oosuwelaxa, munaavilela ni ohakalala anaanepa!

²⁰Mwa yeeyo, nyuwo munaavilela mpaka yaawo anoopakani ipottha, hoye hoye yaawo anoopuherani, naari yaawo angwiiyerani, naari yaawo aniixoona wa nyuwo, hoye hoye anoomanani owiitho.

²¹Wuuliwawaka muru kinaakhulela weera naari ookhulumuwaxa wa yeeyo! Mwa yeeyo akina ootheene antthunaaya wiivuwihera, miyo kinootthunatho. Kinuuluma ntoko naanepa!

²²Awo ari aHeberi? Miyotho! Ari aYixrayeli? Miyotho! Ari anamwane a Abrahaamu? Miyotho!

²³Yakhala arumeiyi a Kristu (miyo kinuulumaxa ntoko naanepa!), miyo kohaapwahaxa! Miyo kootepa ovaraxa muteko, koowalelaxiwa mukaliposo imaara sincipale, kootepaxa owaxuliwa ni ekwamba, ni imaara sincipale kaari ngwoopihani wa okhwa.

²⁴Imaara ithanu koowaxuliwa ni aYuda, kimaniwaka ikwaha imaara miloko miraru niithanniixexe ni ekwamba.

²⁵Koowaxuliwa ni ekopo imaara tthaaru, koovonyiwa maluku emaara emoha, imaara tthaaru nikula miyo kaawenlaaka naattatta mphareiyani, kaavira othana omoha ni ohiyu omoha mphareiyani moowiixa.

²⁶Kaapwaherera keettaka mipatta sincipale, kihaawaka soowoopiha sa mmoolokoni, sa anamwiiya, sa mulokwaaka, sa amalapo, musidadeni, munikareni, mphareiyani ni sa axunna oolokottha.

²⁷Kannavara miteko soovihaxa, imaara sincipale woohikona, kannavoliwa etala ni ntthona, imaara sincipale nkaakhalanne sooca, kannavilela oriira ni pwitipwiti.

²⁸Ohiya toko iyo, khula nihuku kinnateexa olemela wooweeteteela ikerexa soothesene.

²⁹Taani omvoreiwa, miyotho kihivoreiwaka? Taani onttheka, miyotho kihihaawaka?

³⁰Waatthuneyaka wiivuwiha, okhaleke niwoko na itthu sinoonihera ohilipawaka.

³¹Muluku ni Atiithi a Apwiya Yeesu ori ooreelihiwa mahuku ootheene, onsuwela weera nkinootha.

³²oDamasku, guvernadori aathanliwe ni mwene Areta aahaarumiha weera atthu ewehawehe esidade weera kivariwe.

³³Kaakuruxeliwatho munttaangani vaxanelani ya exiri, ni kaahoopowa mmatatanimwaya.