Read Makhuwa-Shirima 2 aKorinto 12 Bible Online

2 aKorinto 12 - Makhuwa-Shirima bible

2 aKorinto 12

¹Ontthuneya weera miyo kipwaherereke wiivuwiha, hata kihiwinaka etthu ni seiyo. Kinoopwaherera ni nyoonelo ni soothupulula sa Apwiya.

²Koomusuwela mutthu mmoha mwa Kristu, wa iyaakha muloko niixexe aacopholiwe wa wiirimu wanaararu. Nkisuwenle aari mweerutthuni, naari mmunepani — Muluku onsuwela.

³Koosuwela weera mulopwana ole — hata mweerutthuni, hata mmunepani, nkisuwenle, mene Muluku onsuwela,

⁴aacopholiwe wa oparadiso*, ni aahiiwa itthu sootikhiniheyaxa moota wooweera khaawo ontthuniheriwa othaliha.

⁵Mwa mulopwana owo nkiivuwihe, ohikhanle mwa miyo muneenaaka, sihikhanle mwa soohilipasaka.

⁶Hata miyo kaatthuna wiivuwiha, nkaarwa kikhala naanepa, niwoko kaarwa wuuluma ekhaikhai. Kinsemba opaka yeeyo weera ahikhale mutthu aneera uupuwele mwaha wa miyo oopwahaxa yeeyo owo onkoona ni onkiiwa.

⁷Koovahiwa mwiiwa mweerutthunimwaka, aani murummwa a Satana, weera okihasule, nitho okooceelihe wiivuwihaxa niwoko na wunnuwa wa soothupulula iye.

⁸Kaahaadyoonttelela Apwiya imaara tthaaru weera ekivenxe mwiiwa ole,

⁹mene Awo yannakeerela: “Mahalaaka anookwanelani, niwoko ikurusaka sookwaniheriwa mwa ohilipawanyu. Tivawo nkiivuwihe ni ohakalalaxa mwa ohilipawaka, weera ikuru sa Kristu sikhale mwa miyo.

¹⁰Tivawo, niwoko na osivela wa Kristu, kinghakalalela moohilipanimwaka, mooruwaniwani, moohaawani, moottharatthariwani, ngweeteteyani, niwoko kaahilipaka, miyo koolipa.

¹¹Kaari ntoko naanepa, mene nyuwo mwaakinnyesereriha yeeyo. Waatthuneya miyo olangheriwa ni nyuwo, keenre kihikhalaka ooyevaxa wa arummwa “oottittimiheyaxa,” naamwi kihikhalaka etthu.

¹²Ineneero sa arummwa — ineneero, sootikhiniha ni soowera — saahooniheriwa variyariwanyu ni ovilela otokotoko.

¹³Moota heeni nyuwo mwaaraanyu ooyevaxa wa ikerexa sikina, ohikhanle mwa yeeyo weera miyo kahaatonkwaaka woolemelani? Mukilevelele wa yoohiloka eyo!

¹⁴Vano, koolikana weera kooxekureni emaara yanaararu, ni nkirwa koolemelani, niwoko nkintthuna sooreelasanyu, mene nyuwo asineenaanyu. Ohiya toko yeeyo, khoontthuneya weera anamwane ethukumanyihe sooreela wa asinaangolo, mene asinaangolo wa anamwane.

¹⁵Hiiho, niwoko na otthunawaka, nkileve sootheene kiraakano nitho nkiileve miyo muneenaaka. Woonaka weera kinoosivelaxani, nkisiveleiye vakhaani ni nyuwo?

¹⁶Khamwaha, nkinatoko woolemelani. Vano, kireene oocendyera, kohoopharihani munraakhoni!

¹⁷Apaale miyo koowootothani mwaha wa mukina wa yaawo miyo koorumihenlaakani?

¹⁸Kaamulaihera Titu weera ooxekureni ni kaamuruma munna vamoha ni yoowo. Apaale Titu oowootothani? Khaneettenle hiyo mmunepani mmoharu ni mphironi emoharu?

¹⁹Nyuwo munuupuwela weera ehuhu yootheene ela hiyo nniixaakiha ohoolowanyu? Ninuuluma ntoko atthu ari mwa Kristu vamaithoni wa Muluku, ni sootheene nimpakaahu, ti weera noolipihereni.

²⁰Vano, kinoova weera kooxekurakani, kihoophwanyeni ntoko kinroromelaaka, ni muhikiphwanye ntoko munroromelaanyu. Kinoova weera nkiphwanye variyariwanyu waakhulana, nrima, woonihera wa isara, ohiiwanana, waapa, wootherana, wiixoona, ni onyakulihana.

²¹Kinoovatho weera kooxekurakani veeli, Mulukwaaka anaakiyevihe ohoolowanyu, ni nkikhupanye niwoko na ancipale yaatthenke khalayi ni ahirukunxale mirimasaya wa ohitteela, oraruwa, ni ohuureya yaapankaaya.