Read Makhuwa-Shirima 2 aKorinto 13 Bible Online

2 aKorinto 13 - Makhuwa-Shirima bible

2 aKorinto 13

¹Ela eniikhale emaara yanaararu kineeraaka kooxekureni. “Milattu sootheene ontthuneya weera sikhaviheriweke ni anamoona eeli, naari araru.”

²Miyo kaawoopererani kaaraaka ni nyuwo emaara yanaaveeli. Vano, kihikhanlewo, kinaalepela yaawo yaatthenke khalayi ni wa akina ootheene: kaahokolowaka, nkiwuurela,

³woonaka weera nyuwo munaasa woonihera weera Kristu onuuluma mwa miyo. Owo khahiyono oohilipa ooreherakani, mene a ikuruxa variyariwanyu.

⁴Vekhaikhai, aathomeiwa moohilipani, mene onkhala ni ikuru sa Muluku. Mooteene yoowo, nri oohilipa mwa Yoowo, mene ni ikuru sa Muluku nnikhale ni Yoowo, noorehererelakani nyuwo.

⁵Mmwiwehawehe nnenesene weera moone nyuwo mwaari munroromeloni. Mooneke asineenaanyu! Khamusuwenle weera Kristu Yeesu ori mwa nyuwo, ohikhanle weera apaale khamwaakhuleliwe?

⁶Koororomela weera moosuwela weera hiyo ti oowaakhuleleya.

⁷Vano, nnimvekela Muluku weera nyuwo muhipake etthu yoonanara. Khoohiyono weera akina yoone weera hiyo nohaakheleliwa, mene weera nyuwo mpake yeeyo eri yooreera, naamwi okhalaka ntoko hiyo nohooceela.

⁸Vano khaningwera ovaanya ekhaikhai, mene waakhulela yeeyo paahi.

⁹Ninnahakalala imaara sootheene nihinlipaahu ni nyuwo munlipaanyu. Nivekelonahu ti weera nyuwo mukhale ookwanelihiwa.

¹⁰Tivawo kinlepaaka itthu iya kihikhanlewo weera, miyo kaarwaaka, khoontthuneya woohiihani, kivarelaka muteko ikuru Apwiya akivanghaaya. Aakivaha ikuru iya weera koopuhiheni, ohikhanle woophwatani.

¹¹Kihipwahereraka axunna, miyo kinoolaxerani. Mwaase wiikwanihera, ni mwiiwe nivekelonaka. Muupuweleke etthu emoharu, mukhaleke ni murettele. Ni Muluku a osivela ni a murettele anaakhale ni nyuwo.

¹²Muulumihaneke ni ebeecu yootteela.

¹³Ootteela ootheene anoovahani isalaama.

¹⁴Mahala a Apwiya Yeesu Kristu, osivela wa Muluku, ni wiiwanana wa Munepa Wootteela okhale ni nyuwo ootheene.