Read Makhuwa-Shirima 2 aKorinto 6 Bible Online

2 aKorinto 6 - Makhuwa-Shirima bible

2 aKorinto 6

¹Ntoko anamiteko a Muluku, hiyo ninniwoopererani weera muhaakhele siiyo mahala a Muluku.

²Niwoko Owo eenre: “Miyo kaawiiwelela weyo ehuhu yootthuneya, ni kaahookhavihera nihuku na ovuluxiwa.” Moone, ehuhu yootthuneya ti ela; vano ti nihuku na ovuluxiwa.

³Khanimukwattuliha akhalaru mutthu mwa yakhalaru etthu, weera mutekwaahu ohiramusiwe.

⁴Ohiyanawaya, ntoko arumeiyi a Muluku, hiyo ninniilaihera mwa soothesene: moovilelani otokotoko, mmakacamihoni, moohaawani, moothananani,

⁵moowaxuliwani, mootthukiwani, moovanyihanani atthu ancipale, mmitekoni sooviha, moohiyuni woohikona, ni mootthukani.

⁶Aani, ninniilaihera mootteelani, moosuwelani, moovilelani, mooreerani, mMunepani Wootteela, moosivelani wa ekhaikhai,

⁷mmasuni a ekhaikhai, mukuruni sa Muluku, ni ikapwitthi sa ekhaikhai sikhaleke sa owana, naari wiixaakiha,

⁸munttittimihoni ni mooveihiwani, ngwaapiwani ni mpilini, ntoko anamalokottha nireenetho a ekhaikhai,

⁹ntoko oohisuweliwa nireenetho oosuwanyeyaxa, ntoko akhwiiye nireenetho ni okumi, ntoko oottaruxiwa, mene nihikhwiiye,

¹⁰oothananihiwa, mene mahuku ootheene nihakalalaka, oohaawa, mene naapuhihaka ancipale, nihikhalanaka etthu, mene nikhalanaka sootheene.

¹¹Nuulumme nnenesene ni nyuwo aKorinto, ni nohoohulelani murimaahu wootheene.

¹²Woosivelaniwahu nyuwo ori woohikota, mene onisivelawanyu hiyo ti wookota.

¹³Vano, munipwatthe hiyo ntoko noopwantthaahuni: munihuleletho murimaanyu. Kingwuulumelani ntoko anamwanaaka.

¹⁴Muhitthukeleliwe vamoha ni mukhwiinyu oohiroromela. Vano, wiiwananawaya heeni waakheliwa ni Muluku ni sootakhala? Hoye hoye wiiwanana heeni oraayano waara ni epiphi?

¹⁵Wiiwanana heeni oraaweno Kristu ni Beliyali? Etthu heeni araayano oororomela ni oohiroromela?

¹⁶Wiiwanana heeni eraayano Empa ya Muluku ni sa miluku soolokottha? Vano hiyo nri Empa ya Muluku mukumi. Ntoko Muluku eenraawe: “Nkikhale vamoha ni yaawo, ni nkeette variyariwaya. Nkikhale Mulukwaaya, ni awosa eniikhale mulokwaaka.”

¹⁷Tivawo: “muvenye wa yaawo ni mususeke,” aneera Apwiya. “Muhitave itthu soohitteela, ni Miyo nkiwaakheleni.

¹⁸Nkikhale Atithinyu, ni nyuwo mmwikhale anamwanaaka alopwana ni athiyana, aneera Apwiya a ikuru sootheene.”