Read Makhuwa-Shirima 2 aKorinto 7 Bible Online

2 aKorinto 7 - Makhuwa-Shirima bible

2 aKorinto 7

¹Oosiveleya, woonaka weera nookhalano soororomelihiwa iya, niirapihe mwa sootheene simvaliha erutthu ni munepa, nikwaniheraka ntteelihonahu niwoko na omoova Muluku.

²Munivahe nipuro mmurimanimwanyu. Khaawo nimpahunlaahu, khaawo nimunanarihalaahu, khaawo nimpuhenraahu.

³Nkinghima yeeyo weera koothoriheni. Kohooleelani weera muri mmurimanimwahu moota wooweera noolikana okhwa, hoye hoye okhala vamoha ni nyuwo.

⁴Kohoororomelani vancipale. Wiivuwihawahu mwaha wa nyuwo ti otokotoko. Kinniixoona olipihiwa vancipale murimaaka, ohakalalawaka woosareya mwa soohooxa sootheene.

⁵Vano, naaphiyalaahu oMasedoniya, khaniitthuuwale, mene naahaaxiwa ni moota wootheene, eyo tiiyo soohooxa sa omokoni, ni woova wa mpuwa.

⁶Wa soothesene, Muluku onaapepesa oomaniwa, aanipepesa ni ophiya wa Titu.

⁷Khoohiyono paahi ni ophiyawawe, menetho ni opepesa nyuwo mwaampepesaanyu yoowo. Owo aanithalihera sa wunkheliwawanyu ni miyo, othananawanyu ni okeeteteelawanyu, moota wooweera ohakalalawaka kohaandyeereriwa vancipale.

⁸Hata ekarattaaka yoothananihani, nkinrukunxa murima. Kaaroorukunxaru murima — niwoko kinoona weera ekarattaaka yohoothananihani, hata wa ehuhu vakhaani —

⁹vano kinghakalala, khoohiyono niwoko nyuwo moothananihiwa, mene niwoko othananawanyu wohoorukunxani mirima. Vano, nyuwo moothanana ntoko Muluku aatthunaawe, tivawo nyuwo muhinanarihiwaanyu ni hiyo hata vakhaani.

¹⁰Othanana ntoko otthuna wa Muluku onruwera orukunxa murima onkeliha moovuluwani, ni othanana iwo woovira, mene othanana wa elapo ya vathi onruwera okhwa.

¹¹Moone othanana wu ntoko otthuna wa Muluku onruweraaya mwa nyuwo: nthiti heeni, ohaawela heeni okhala oohikhala ni milattu, onyoonyiwa heeni, woova heeni, munkhela heeni, weeteteya heeni, olipiha murima heeni woomuttaruxa yoowo ori ni nthowa! Mwa sootheene nyuwo mohoonihera weera khamunono milattu mwaha wa yeeyo.

¹²Hiiho nkoolepenleni niwoko na yoowo opanke yoonanara, hata niwoko na yoowo onanaringhe, mene weera ohoolo wa Muluku nyuwo muwere woona asineenaanyu moota heeni munikhalenlaanyu nthiti.

¹³Noohakalalihiwa niwoko na sootheene iya. Ohiya olipihiwa murima, noohakalalaxa womoona Titu, ahakalalaka niwoko munepaawe wiitthuuwihiwe ni nyuwo ootheene.

¹⁴Miyo kaamuleela weera kiniivuwiha mwaha wa nyuwo, ni nkuuliwe muru. Ntoko sootheene nooleenlaahuni saaraaya sa ekhaikhai, ovuwa nraahuno mwaha wa nyuwo ohoolo wa Titu wohooniheratho ekhaikhai.

¹⁵Vano, woosivelaniwawe ori wootepaxa, uupuwelaka weera nyuwo ootheene mwaari oowiiwelela, mmwaakhelaka ni woova ni othukumela.

¹⁶Kinoohakalala niwoko kinoowera woororomelani mwa soothesene.