Read Makhuwa-Shirima 2 aKorinto 9 Bible Online

2 aKorinto 9 - Makhuwa-Shirima bible

2 aKorinto 9

¹Khoontthuneya miyo woolepelani mwaha wa ekhavihero ela wa ootteela.

²Koosuwela otthunawanyu okhavihera, ni kohiivuwiha vamaithoni wa aMasedoniya niwoko na nyuwo. Kaahaaleela weera, okhuma mwaisana, nyuwo a wAkhaiya moolikana okhavihera, ni nthitinanyu noowaalipiha ancipale.

³Wa soothesene, kinaarumiha axunna weera ovuwawahu nraahuno wa nyuwo mwaha wa yeeyo, ohikhale wa siiyo, mene weera nyuwo mukhale oolikana, ntoko miyo kaaleenlaaka weera mweeraanyu mukhale.

⁴Miyo kimpaka yeeyo weera aMasedoniya akina yarowa ni miyo, ni awo yoophwanyani muhilikanne, hiyo woohiyani toko nyuwo — nihuuliwe muru wa nroromelo nne naarinaahu.

⁵Hiiho kohoona weera ontthuneya waavekela axunna weera yooxekureni ehinaaye, ni emalihe sooreherera sa soovaha nyuwo mwaaroromelinghaanyu. Vano, iyo nsikhale soolikana, ntoko mahala a murima ehikhanle onyesereriwa.

⁶Muupuwelele: Yoole onaala vakhaani, anaahephetho vakhaani, ni yoole onaala yoowaatta, anaahephetho yoowaatta.

⁷Khula mutthu avahe ntoko olakenlaawe mmurimanimwawe, ahivahe ni ohovela, naari onyesereriwa, niwoko Muluku onimusivela yoowo omvaha ni ohakalala.

⁸Vano, Muluku ongwera owaandyeererani mahala ootheene, weera mwa itthu sootheene ni mwa ehuhu yootheene, mukhalanaka sootthuneya sootheene, nyuwo mukhale oowaatta mmutekoni wooreera wootheene.

⁹Ntoko elempwalaaya: “Owo aahaakawela sooreelasawe atthu oohaawa; ororomeleyawawe okhale mahuku ootheene.”

¹⁰Yoole onimvaha mmiso yoowo onaala ni yooca wa yoowo onca, Owo anoovaheeni ni anaandyeerere mmiso, ni anunnuwihe soowiima sa waakhuleliwawanyu ni Muluku.

¹¹Nyuwo mmwipuhihiwe moota wootheene weera mvahe ni murima wootheene mwa ehuhu yootheene, ni niwoko na hiyo ovahawanyu onuuphiyere omttottopela Muluku.

¹²Muteko wa Muluku ola nyuwo mumvaraanyu, khoonkhavihera paahi soohaawela sa ootteela, menetho ti nthowa na omttottopela vancipale Muluku.

¹³Niwoko na wooneya muteko ola, akina eniimvuwihe Muluku mwaha wa wiiwelela munlapaanyu mwaha wa masu ooreeraxa, ni niwoko na ekhaviherowaanyu etokotoko mwaavahaka yaawo ni akina ootheene.

¹⁴Ni yoovekelelakani, awo eniyoosivelaxeni niwoko na mahala matokotoko Muluku oovanghaaweni.

¹⁵Atthapeliwe Muluku niwoko na mahalaawe ootikhiniheya!