Read Makhuwa-Shirima aGalata 2 Bible Online

aGalata 2 - Makhuwa-Shirima bible

aGalata 2

¹Saaviralaaya iyaakha muloko niixexe, kaarowatho oYerusaleemu. Mukwaheene yoole aakihoola Barnaba ni kaamukuxatho Titu.

²Miyo kaarowa niwoko na othupululeliwa, ni kaahaaleela vamaithoniwaya masu ooreeraxa kinaalaleeraaka amalapo. Kaapaka yeeyo wa asitokweene meekhaayaru weera kisuwele miyo kihitthimake, naari kinootthimaka siiyo.

³Awotho khayaamunyesereringhe Titu aaraawe ni miyo weera iineliwe, aarookhalaru muGrego.

⁴Mwaheene yoola okhumelenle, niwoko axunna akina oowootha yaavolowa variyariwahu weera yoone woopoliwawahu nikhalannaahu mwa Kristu, weera eniphuretho hiyo mookaporoni.

⁵Khaniwiiwelenle yaawo hata vakhaani weera ekhaikhai ya masu ooreeraxa ekhale ni nyuwo.

⁶Wa yaale yooniwa ntoko asitokweene — moota yaattharaaya khalayi, miyo nkimpwattha, niwoko Muluku khanthoriha omokoni wa mutthu — asitokweeneene yaawo khayaakaandyeereringhe etthu.

⁷Ohiyanawaya awo yaahaakhulela weera miyo koovahereriwa muteko woowaalaleera masu ooreeraxa amalapo, ntoko Pedru ovahereriwaawe muteko woowaalaleera masu ooreeraxa aYuda.

⁸Vano, Muluku aamulipihenraawe Pedru weera akhale murummwa wa atthu oowiineliwa, aakilipiheratho weera kikhale murummwa wa atthu oohiineliwa.

⁹Yakobe, Pedru ni Yohaane, yaasuweliwe ntoko amarimbu a ekerexa, yaakookolela moono mulopwana miyo ni Barnaba ntoko eneneero ya wiiwanana. Yaapakenle yeeyo niwoko yaahaakhulela mahala Muluku okivanghaawe. Awo yaahiiwanana weera ontthuneya hiyo nirowe wa amalapo ni awo wa atthu oowiineliwa.

¹⁰Awo yaanivekela paahi weera niwuupuwelele oohaawa, seiyo kaatthunaaka ni murima wootheene.

¹¹Awaaka Pedru wAntiyokhiya, kaamooperera ekhove ni ekhove, niwoko aaphwanela yeeyo.

¹²Vano, ehinaaye ophiya akina wa Yakobe, owo aaca ni atthu oohikhala aYuda. Yaaphiyalaaya, aasusa ni aamwalamwala ni atthu oohikhala aYuda, awoovaka atthu oowiineliwa.

¹³aYuda akina yamuthukumanela yoowo munlokotthoni, moota wooweera mpaka Barnaba aakuxiwa ni olokotthawaya.

¹⁴Koonaka weera awo khayeentte ntoko ekhaikhai ya masu ooreeraxa, kaamooperera Pedru variyari wa atthu ootheene: “Nyuwo muYuda, vano khamunkhala ntoko muYuda, mene ntoko oohikhala aYuda. Tivawo, ongwereya hai waanyeserera atthu oohikhala aYuda otthara ekhalelo ya aYuda?”

¹⁵Hiyo nri aYuda mooyariwani ni khanihiyono amalapo, anamattheka,

¹⁶noosuwela weera mutthu khanaakhuleliwa ni Muluku niwoko na miteko sa nlamulo, mene ni nroromelo mwa Yeesu Kristu. Hiihaawo hiyotho noororomela mwa Kristu Yeesu weera nikhale oowaakhuleliwa ni Muluku niwoko na nroromelonahu mwa Kristu. Khanaakhuleliwe niwoko na miteko sa nlamulo. Mwa yeeyo ni miteko sa nlamulo khaawo anaakhuleliwe ni Muluku.

¹⁷Naasaasaka waakhuleliwa ni Muluku niwoko na Kristu, ni hiyo noonelela weera nri anamattheka, weeraka Kristu Murumeiyi a soottheka? Hoye, hata vakhaani!

¹⁸Miyo kaatenke yeele kiphwantaaka, eyo enoonihera weera miyo kootupha malamulo a Muluku.

¹⁹Niwoko na nlamulo kohookhwa wa nlamulo weera kimukhalele Muluku.

²⁰Kookhomeliwa vamoha ni Kristu. Hiiho nkihiyono miyo kinkhala, mene aani Kristu okhanle mwa miyo. Okumi kinkhalaaka vaanaano mweerutthuni, kinkhala kimuroromelaka Mwaana a Muluku okisivenlaawe ni iixinnyerenraawe wa miyo.

²¹Miyo nkinkhootta mahala a Muluku niwoko mutthu aakhuleliwaka ni Muluku niwoko na malamulo, Yeesu okhwiiye siiyo.