Read Makhuwa-Shirima aGalata 3 Bible Online

aGalata 3 - Makhuwa-Shirima bible

aGalata 3

¹aGalata alolo! Yoolongweni taani? Mwaahooniheriwa Yeesu Kristu ntoko othomeiwalaawe vamuttandani.

²Miyo kaatthuna osuwela etthu emoha paahi: Nyuwo mohaakhela Munepa ni miteko sa malamulo, hoye hoye niwoko mohaakhulela yeeyo mwiiwalaanyu?

³Weeraka muri alolo moota wooweera mwaapacenraanyu ni Munepa Wootteela, vano muntthuna omalihera ni ikurusanyu asineenaanyu?

⁴Weeraka moohaawa ni itthu sincipale wa siiyo? Waari vekhaikhai wa siiyo!

⁵Yoowo onoovahani Munepa ni ompaka sootikhiniha variyari wa nyuwo, ompaka iyo niwoko muniiwelela malamulo, hoye hoye niwoko moororomela yeeyo mwiiwalaanyu?

⁶Mmuupuwelele Abrahaamu: Owo aamuroromela Muluku, ni niwoko na yeeyo aahaakhuleliwa ni Muluku.

⁷Mwiiwexexe nnene weera yaale anroromela ari anamwane a Abrahaamu.

⁸Yoolempwa* ya khalayi, yoonaka ehinaaye weera Muluku onoowaakhulela amalapo niwoko na nroromelonaya mwa Kristu, yaalaleiya toko wa Abrahaamu masu ooreeraxa: “Niwoko na nyuwo miloko sootheene nsireelihiwe.”

⁹Hiiho, yaale anroromela ari ooreelihiwa vamoha ni Abrahaamu, mulopwana a nroromelo.

¹⁰Yaawo ootheene anroromela miteko sa malamulo alaphiwa, niwoko yoolempwa: “Oolaphiwa ootheene yaale ahinkwanihera itthu sootheene silempwe mulivuruni ya malamulo.”

¹¹Yoosuwanyeya weera Muluku khaniwaakhulela atthu eroromelaka malamulo, niwoko mutthu oowaakhuleleya onkhala munroromeloni.

¹²Malamulo khaankhuma wa nroromelo, ohiyanawaya, “Yoowo ompaka itthu iya, onkhala niwoko na seiyo.”

¹³Kristu oonivuluxa munlaphoni na malamulo, athatuwaka nlapho vanipuroniwahu, niwoko yoolempwa: “Oolaphiwa ti ootheene yaale athomeiwale vamuttandani.”

¹⁴Aapakenle yeeyo weera, niwoko na Yoowo, nreeliho na Abrahaamu niphiyetho wa amalapo nitho weera hiyo naakhele munroromeloni yoororomelihiwa ya Munepa.

¹⁵Axunnaka, kinooleelani ni niphwanaphwaniho: mutthu areherenreene yoohiyeraawe*, khaawo anaamalihe, naari anaandyeerere.

¹⁶Hiihotho ni soororomelihiwa saapakeliwe Abrahaamu ni ekhapiraawe. Yoolempwa* kheeneera: ‘ni wa ikhapirasawe’ ntoko ancipale, mene ‘wa ekhapiraawe,’ weera enoonihere weera enuuluma sa mutthu mmoha paahi, eyo tiiyo Kristu.

¹⁷Kinghimaaka ti ela: malamulo awiiye iyaakha 430 vahoolo wa wiiwanana aapankaawe ni Muluku khaammaliha wiiwanana iwe Muluku aakhalinghaawe ahinaaye, moota wooweera malamulo ampakiha soororomeliha sa siiyo.

¹⁸Vano, yoohiyeriwa* yaarwiiye niwoko na nlamulo, kheerwiiye niwoko na yoororomelihiwa. Muluku aamuhiyera Abrahaamu ni yoororomelihiwa yoohiyeriwa* mahaleene.

¹⁹Vano, malamulo yaarweela heeni? Malamulo yaarweela woonihera seiyo siri soohitthuna sa Muluku mpaka ophiya Yoole yoororomelihiwa yaamuhimaaya. Malamulo ale avahiwe ni andyelo mmatatani a mulopwana aari ntoko namitthenga.

²⁰Wa soothesene, namitthenga khanimukhaliha mmoha paahi. Mene Muluku ori mmoha.

²¹Malamulo anniittana ni soororomelihiwa sa Muluku? Hoye! Vano, waari weera yaavahiwa malamulo angwera ovaha okumi, vekhaikhai hiyo naamwaakhuleliwa ni Muluku niwoko na malamulo.

²²Yoolempwatho enghima weera elapo yootheene eri yootthukeya ni soottheka, weera yoororomelihiwa ya Muluku yaavahiwe aKristu niwoko na nroromelo mwa Yeesu Kristu.

²³Nihinaaye ophiya nroromelo, malamulo yaanikhaliha ootthukeya mpaka nroromelo neera nirwe nooniheriwe.

²⁴Hiiho malamulo yaari muhusihaahu weera enironghe wa Kristu, weera hiyo naakhuleliwe ni Muluku niwoko na nroromelo.

²⁵Vanonto, niphiyalaaya nroromelo, khaninlamuliwatho ni malamulo.

²⁶Nyuwo ootheene muri anamwane a Muluku niwoko na nroromelo mwa Kristu Yeesu.

²⁷Vano, yaale apatisiwe mwa Kristu, angwanre Kristu.

²⁸Khawowo muYuda, hata muGrego, epottha, hata neethi, mulopwana, hata muthiyana, niwoko ootheene ti mmoha mwa Kristu Yeesu.

²⁹Ni nyuwo mwaari a Kristu, vano ti ekhapira ya Abrahaamu, ni muri anamwaakhela ntoko yoororomelihiwa enghimaaya.