Read Makhuwa-Shirima aGalata 5 Bible Online

aGalata 5 - Makhuwa-Shirima bible

aGalata 5

¹Kristu oonitaphula hiyo weera nikhale vekhaikhai maneethi. Tivawo, mpwaherere oolipeene ni muhiihiye muvolowakatho moolemelani wa okaporo.

²Mwiiwe nnene yeeyo miyo, Pawulo, kinooleelaakani: Nyuwo mwiinelihiwa, Kristu khamuteko wa nyuwo.

³Kinghimatho wa ootheene yaawo aniihiya yiineliwaka, weera awo annyesereriwa okwanihera malamulo ootheene.

⁴Nyuwo munaasa waakhuleliwa ni Muluku niwoko na malamulo, moomwalamwalihiwa ni Kristu; moothaama mmahalani.

⁵Hiyo ningweherera munroromeloni ninrweela wa Munepa Wootteela waakhuleliwa ni Muluku ori owehererawahu.

⁶Vano, mwa Kristu hata wiineliwa, hata ohiineliwa wookhala mureerelo, mene aani nroromelo nniixoonihera moosivelani.

⁷Nyuwo mwanneetta nnene. Taani owooceelihaleni weera muhipwaherereke ni ekhaikhai?

⁸Mutthweene yoowo kharwiiye wa Yoole ongwiitthanani.

⁹Eferementu vakhaani ennyarula etrigu yincipale.

¹⁰Miyo koosuwela mwa Apwiya weera nyuwo khamurwa muupuwela moota mukina. Yoole onookacamihani, hata akhale akhalaru mutthu, onoohaawa othorihiwa.

¹¹Axunnaka, miyo nlelo kalaleiya wiineliwa, heeni nlelo kinttharatthariwaaka? Mooteene hiiho, wuuliha muru wa muttanda woovenxiwawo.

¹²Mwaha wa yaawo anookacamihani, fataari othikila elopwanaaya yootheene!

¹³Axunna, nyuwo mwiitthaneliwe weera mukhale maneethi. Oneetheene yoowo ohikhale nthowa na otthara otthuna wa erutthu. Ohiyanawaya, murumeelaneke mukina ni mukhwaawe moosivelani.

¹⁴Malamulo ootheene athukumanyiwe mwa nlamulo nimoha: Munsivele mukhwiinyu ntoko muneenaanyu.

¹⁵Nyuwotho mwalumana ni mwakhuurana mukina ni mukhwaawe, mwiipasoope weera muhiphwatane.

¹⁶Tivawo kineera: Mweetteke mwa Munepa Wootteela, ni vano khamurwa mukwanihera sootthuna sa erutthu.

¹⁷Vano, erutthu entthuna yeeyo eniittana ni Munepa, ni Munepa yeeyo eniittana ni erutthu. Iyo sinnawana, moota wooweera nyuwo muhiwere opaka yeeyo muntthunaanyu.

¹⁸Nyuwotho mweettihiwaka ni Munepa Wootteela, khamuhiyono oolamuliwa ni malamulo.

¹⁹Moone, miteko sa erutthu siri soosuwanyeya: oraruwa, ohitteela, olavilavi,

²⁰olapela miluku sikina, okhwiri, wiittana, waakhulana, ehace, isara, wiixoona, ohiiwanana, omwalamwala,

²¹nrima, ohapaliwa, wiipeliwa ni itthu soolikana. Miyo kingwoopererani, ntoko kaawooperenraakani khalayeene, weera yaawo ampaka itthusene seiyo kheerwa yaakhela omwene wa Muluku.

²²Vaheera yoowiima ya Munepa ti osivela, ohakalala, murettele, opixa murima, waahelela akina, murima wooreera, ororomeleya,

²³wiiyeviha ni wiisuumaaliha. Mwa itthusene seiyo, khaniwowo nlamulo.

²⁴Yaale ari a Kristu Yeesu aathomeya soohaawela ni soowiinlela sa erutthu.

²⁵Hapo ninkhala ni okumi mwa Munepa, neetteketho ni Munepa.

²⁶Nihikhale oowiivuwiha, nitannyanaka mukina ni mukhwaawe, naari nihikhalelanaka nrima.