Read Makhuwa-Shirima aGalata 6 Bible Online

aGalata 6 - Makhuwa-Shirima bible

aGalata 6

¹Axunna, mukina amorela mootthekani, nyuwo muneetta ni Munepa Wootteela, munghokoloxere moota woowiiyeviha mphironi yooreera. Mwiipasoope weera muheereriwe.

²Mwaakhelaneke mirindi soolemela, ni hiiho mukwanihere nlamulo na Kristu.

³Mukina iixuupuwela weera ti ootthuneyaxa ahikhanle, oniilokottha muneenaawe.

⁴Khula mutthu iiwehaweheke mmitekonimwawe, ni vano nakhala nthowa na wiivuwiha, nikhaleke ni muneenaawe paahi ahiilikanxeraka ni akina.

⁵Khula mutthu ateexeke yooleemelaawe.

⁶Yoole onghusihiwa masu ooreeraxa akawane itthu sootheene sooreera orinaawe ni muhusihaawe.

⁷Muhilokottheye — ti woowoopiha omutheya Muluku. Vano yeeyo mutthu onaalaawe, onoohephatho.

⁸Yoowo onaala sootthuna sa erutthu, anaahephe ophwatiwa, mene yoole onaala mwa Munepa Wooteela, anaahephe okumi woohimala.

⁹Nihikhulumuwe opaka yooreera, niwoko ehuhu eneeneene nnihephe, hiyo naahiporora.

¹⁰Tivawo, ehuhu yootheene naapakeleke yooreera atthu ootheene, otepaxa wa amusi a munroromeloni.

¹¹Ngwehe malepa matokotoko kinoolepelaakani ni ntatanaka!

¹²Yaale antthuna waasiveliha atthu yeereraka woonyesererani weera mwiineliwe, ampaka yeeyo weera ehittharatthariwe niwoko na muttanda wa Kristu.

¹³Yaawo aniineliwa khaankwanihera nlamulo. Awo antthuna weera nyuwo mwiineliwe, weera awo yiivuwihe mweerutthunimwanyu.

¹⁴Wa miyo, nkinono yoowiivuwihera, ohikhanle mwa muttanda wa Apwiyaahu Yeesu Kristu. Vano ti niwoko na muttanda ola elapo ethomeiwalaaya wa miyo, ni miyo wa elapo.

¹⁵Vano, etthu entthuneya kheehiyono wiineliwa, hoye hoye ohiineliwa, mene aani, okhala ephattuwelo enyowani.

¹⁶Murettele ni ikharari sikhale ni ootheene aneetta ekwaniheraka nlamulo nna, nitho ni aYixrayeli a Muluku.

¹⁷Evenyero vaava, ahikhale anaakixupe, niwoko kookhalano mweerutthunimwaka makhwatta a Yeesu.

¹⁸Axunna, mahala a Apwiyaahu Yeesu Kristu ekhale ni munepaanyu. Ame*.